ಲಿಸ್ಬನ್: ಕ್ರಿಶ್ಚಿಯಾನೋ ರೊನಾಲ್ಡೋ ಅಂತಹ ವಿಶ್ವ ಶ್ರೇಷ್ಟ ಆಟಗಾರನನ್ನ ಹೊಂದಿರುವ ಪೊರ್ಚುಗಲ್ ತಂಡವನ್ನು 1-0 ಗೋಲುಗಳಿಂದ ಮಣಿಸಿದ ಫ್ರಾನ್ಸ್ ಯುಇಎಫ್ಎ ನೇಷನ್ಸ್ ಲೀಗ್ನಲ್ಲಿ ಅಂತಿಮ ನಾಲ್ಕರ ಘಟ್ಟ ಪ್ರವೇಶಿಸಿದೆ.
ಫ್ರಾನ್ಸ್ನ ಮಿಡ್ ಫೀಲ್ಡರ್ ಎನ್ಗೋಲೊ ಕಾಂಟ್ ಫ್ರಾನ್ಸ್ ಪರ ಏಕೈಕ ಗೋಲುಗಳಿಸಿ ಪೋರ್ಚುಗಲ್ನ ನೇಷನ್ಸ್ ಲೀಗ್ ಪ್ರಶಸ್ತಿಯನ್ನು ಉಳಿಸಿಕೊಳ್ಳುವ ಪ್ರಯತ್ನವನ್ನು ಕೊನೆಗಾಣಿಸಿತು. ಅವರು 54ನೇ ನಿಮಿಷದಲ್ಲಿ ಈ ಗೆಲುವಿನ ಗೋಲು ಸಿಡಿಸಿದ್ದರು.
ಈ ಸೋಲಿನ ಮೂಲಕ ಆರು ವರ್ಷಗಳಲ್ಲಿ ಇದು ತವರಿನಲ್ಲಿ ಮೊದಲ ಸೋಲಾಯಿತು. ಹಾಲಿ ಚಾಂಪಿಯನ್ ಪೋರ್ಚುಗಲ್ ಕೋಚ್ ಫರ್ನಾಂಡೊ ಸ್ಯಾಂಟೋಸ್ ನೇತೃತ್ವದಲ್ಲಿ ಇದುವರೆಗೆ ತವರಿನಲ್ಲಿ ಸೋಲು ಕಂಡಿರಲಿಲ್ಲ.
ಕಾಂಟ್ ತಮ್ಮ ವೃತ್ತಿ ಜೀವನದ 60ನೇ ಪಂದ್ಯದಲ್ಲಿ 2ನೇ ಅಂತಾರಾಷ್ಟ್ರೀಯ ಗೋಲುಗಳಿಸಿ ತಂಡಕ್ಕೆ ಗೆಲುವು ತಂದುಕೊಟ್ಟರು. ಅವರು 2016ರಲ್ಲಿ ರಷ್ಯಾ ವಿರುದ್ಧ ಸೌಹಾರ್ದ ಪಂದ್ಯದಲ್ಲಿ ಗೋಲು ಸಿಡಿಸಿದ್ದರು.
