ಗುವಾಹಟಿ: ಅಂಡರ್ 19 ವಿಶ್ವಕಪ್ ವಿಜೇತ ಭಾರತ ತಂಡದ ನಾಯಕ ಯಶ್ ಧುಲ್ ರಣಜಿ ಟ್ರೋಫಿಯಲ್ಲಿ ತಮ್ಮ ಬ್ಯಾಟಿಂಗ್ ಪ್ರದರ್ಶನವನ್ನು ಮುಂದುವರಿಸಿದ್ದು, ಆಡುತ್ತಿರುವ 3ನೇ ಪಂದ್ಯದಲ್ಲೇ ದ್ವಿಶತಕ ಸಿಡಿಸಿ ಸಂಭ್ರಮಿಸಿದ್ದಾರೆ. ಇದು ಈ ಆವೃತ್ತಿಯಲ್ಲಿ ಸಿಡಿಸಿದ 3ನೇ ಶತಕವಾಗಿದೆ.
ಅಂಡರ್ 19 ವಿಶ್ವಕಪ್ನಲ್ಲಿ ದೇಶಕ್ಕೆ ಟ್ರೋಫಿ ಗೆದ್ದುಕೊಟ್ಟಿದ್ದ ಯಶ್, ನಂತರ ರಣಜಿ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದ ಪಂದ್ಯದ ಎರಡೂ ಇನ್ನಿಂಗ್ಸ್ಗಳಲ್ಲೂ ಶತಕ ಸಿಡಿಸಿ ಕ್ರಿಕೆಟ್ ವಲಯಲ್ಲಿ ಮೆಚ್ಚುಗೆಗೆ ಪಾತ್ರರಾಗಿದ್ದರು. ಇದೀಗ ತಮ್ಮ 3ನೇ ಪ್ರಥಮ ದರ್ಜೆ ಪಂದ್ಯದಲ್ಲಿ ದ್ವಿಶತದ ರುಚಿಯನ್ನು ಸವಿದಿದ್ದಾರೆ.
ಛತ್ತಿಸ್ಗಡದ ವಿರುದ್ಧ ನಡೆದ ಕೊನೆಯ ಲೀಗ್ ಪಂದ್ಯದಲ್ಲಿ ಯಶ್ ಧುಲ್ 261 ಎಸೆತಗಳಲ್ಲಿ 26 ಬೌಂಡರಿ ಸಹಿತ ಅಜೇಯ 200ರನ್ಗಳಿಸಿದರು. ತಮ್ಮ ಆರಂಭಿಕ ಬ್ಯಾಟರ್ ಧ್ರುವ್ ಶೋರೆ ಜೊತೆಗೂಡಿ ಮೊದಲ ವಿಕೆಟ್ಗೆ 246 ರನ್ಗಳನ್ನು ಸೇರಿಸಿ ಗೆಲುವಿನ ಆಸೆಯಲ್ಲಿದ್ದ ಛತ್ತಿಸ್ಗಡಕ್ಕೆ ನಿರಾಶೆ ಮೂಡಿಸಿದರು.
ಯಶ್ ಧುಲ್ 3 ಪಂದ್ಯಗಳಲ್ಲಿ 119ರ ಸರಾಸರಿಯಲ್ಲಿ 200 ಗರಿಷ್ಠ ರನ್ ಸೇರಿದಂತೆ 3 ಶತಕ ಸಹಿತ 479 ರನ್ ಸಿಡಿಸಿ 2022ರ ರಣಜಿ ಟ್ರೋಫಿಯಲ್ಲಿ ಗರಿಷ್ಠ ರನ್ ಸಿಡಿಸಿದ 5ನೇ ಬ್ಯಾಟರ್ ಎನಿಸಿಕೊಂಡರು.
ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಛತ್ತಿಸ್ಗಡ 482 ರನ್ಗಳಿಸಿ ಡಿಕ್ಲೇರ್ ಘೋಷಿಸಿಕೊಂಡಿತ್ತು. ಇದಕ್ಕುತ್ತರವಾಗಿ ಡೆಲ್ಲಿ ಮೊದಲ ಇನ್ನಿಂಗ್ಸ್ನಲ್ಲಿ ಕೇವಲ 295ಕ್ಕೆ ಆಲೌಟ್ ಆಗಿ ಫಾಲೊ ಆನ್ಗೆ ತುತ್ತಾಗಿತ್ತು. ಆದರೆ ಎರಡನೇ ಇನ್ನಿಂಗ್ಸ್ನಲ್ಲಿ 2 ವಿಕೆಟ್ ಕಳೆದುಕೊಂಡು 396 ರನ್ಗಳಿಸಿ ಪಂದ್ಯ ಡ್ರಾ ಸಾಧಿಸಿತು.
ಹೆಚ್ ಗುಂಪಿನ ಮತ್ತೊಂದು ಪಂದ್ಯದಲ್ಲಿ ಜಾರ್ಖಂಡ್ ತಂಡ ತಮಿಳುನಾಡಿನ ವಿರುದ್ಧ 2 ವಿಕೆಟ್ಗಳ ರೋಚಕ ಜಯ ಸಾಧಿಸಿ 12 ಅಂಕಗಳೊಂದಿಗೆ ಅಗ್ರಸ್ಥಾನ ಪಡೆದುಕೊಂಡಿತು. ಛತ್ತಿಸ್ಗಡ 10 ಅಂಕ ಪಡೆದು ದ್ವಿತೀಯ ಸ್ಥಾನ ಪಡೆದರೆ, ತಮಿಳುನಾಡು(6) ಮತ್ತು ಡೆಲ್ಲಿ(2) ಅಂಕ ಪಡೆದು ಕೊನೆಯ ಸ್ಥಾನ ಪಡೆದುಕೊಂಡವು.
ಇದನ್ನೂ ಓದಿ:ಶ್ರೀ'ಲಂಕಾ ದಹನ' ಮಾಡಿದ ಜಡೇಜಾ: ಭಾರತಕ್ಕೆ ಇನ್ನಿಂಗ್ಸ್ ಮತ್ತು 222 ರನ್ಗಳ ಜಯ
