ಅಬುಧಾಬಿ: ಟಿ20 ವಿಶ್ವಕಪ್ನ ಸೂಪರ್ 12ರ ಹಂತದ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಆಸ್ಟ್ರೇಲಿಯಾ 8 ವಿಕೆಟ್ ಅಂತರದಲ್ಲಿ ಜಯಗಳಿಸಿದೆ.
ಅಬುಧಾಬಿಯ ಶೇಖ್ ಜಾಯೇದ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಬೌಲಿಂಗ್ ಆಯ್ದುಕೊಂಡ ಆಸ್ಟ್ರೇಲಿಯಾ 22 ಎಸೆತಗಳು ಬಾಕಿ ಇರುವಂತೆಯೇ ವಿಂಡೀಸ್ ನೀಡಿದ ಗುರಿ ತಲುಪಿ, ಗೆಲುವಿನ ನಗೆ ಬೀರಿತು.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ವೆಸ್ಟ್ ಇಂಡೀಸ್ 20 ಓವರ್ಗಳಲ್ಲಿ ಏಳು ವಿಕೆಟ್ ನಷ್ಟಕ್ಕೆ 157 ರನ್ ಗಳಿಸಿತ್ತು. ವೆಸ್ಟ್ ಇಂಡೀಸ್ ಪರ ಎಲ್ವಿನ್ ಲೆವಿಸ್ 29, ಕೀರನ್ ಪೊಲಾರ್ಡ್ 44, ಶಿಮ್ರೋನ್ ಹೆಟ್ಮೇಯರ್ 27, ಆ್ಯಂಡ್ರ್ಯೂ ರಸೆಲ್ 18, ಕ್ರಿಸ್ ಗೇಲ್ 15 ರನ್ಗಳ ಕೊಡುಗೆ ನೀಡಿದ್ದಾರೆ.
ಅಬ್ಬರಿಸಿದ ವಾರ್ನರ್, ಮಾರ್ಷ್:
ವೆಸ್ಟ್ ಇಂಡೀಸ್ ನೀಡಿದ್ದ ರನ್ಗಳನ್ನು ಬೆನ್ನತ್ತಿದ ಆ್ಯರನ್ ಪಿಂಚ್ ಪಡೆ ಕೇವಲ ಎರಡು ವಿಕೆಟ್ ನಷ್ಟಕ್ಕೆ ಗೆಲುವಿನ ದಡ ಸೇರಿತು. ಡೇವಿಡ್ ವಾರ್ನರ್ 56 ಎಸೆತಗಳಲ್ಲಿ 89 ರನ್ ಗಳಿಸಿ ವೆಸ್ಟ್ ಇಂಡೀಸ್ ಬೌಲರ್ಗಳ ನಿದ್ದೆಗೆಡಿಸಿದರೆ, ಮೆಚೆಲ್ ಮಾರ್ಷ್ ಕೂಡಾ 53 ರನ್ ಗಳಿಸಿ ಆಸೀಸ್ ತಂಡ ಗೆಲುವಿಗೆ ಕೊಡುಗೆ ನೀಡಿದ್ದಾರೆ.
ಹೇಜಲ್ವುಡ್ಗೆ 4 ವಿಕೆಟ್: ವೆಸ್ಟ್ ಇಂಡೀಸ್ ಕೇವಲ 2 ವಿಕೆಟ್ ಗಳಿಸಲು ಮಾತ್ರ ಸಾಧ್ಯವಾಗಿದ್ದು, ಅಕೀಲ್ ಹೊಸೈನ್ ಮತ್ತು ಕ್ರಿಸ್ ಗೇಲ್ ತಲಾ ಒಂದೊಂದು ವಿಕೆಟ್ ಮಾತ್ರ ಪಡೆದರು. ಆಸ್ಟ್ರೇಲಿಯಾ ಪರ ಜೋಷ್ ಹೇಜಲ್ವುಡ್ 4 ವಿಕೆಟ್ ಪಡೆದಿದ್ದು, ಮಿಚೆಲ್ ಸ್ಟಾರ್ಕ್, ಪ್ಯಾಟ್ ಕಮ್ಮೀಸ್, ಆ್ಯಂಡಂ ಜಂಪಾ ತಲಾ ಒಂದು ವಿಕೆಟ್ ಪಡೆದಿದ್ದಾರೆ.
