ಲಂಡನ್: ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ರಿಷಭ್ ಪಂತ್ ಭಾರತ ತಂಡದಲ್ಲಿರುವ ಅಪಾಯಕಾರಿ ಬ್ಯಾಟ್ಸ್ಮನ್ ಹಾಗೂ ಗೇಮ್ ಚೇಂಜರ್ ಎಂದು ನ್ಯೂಜಿಲ್ಯಾಂಡ್ ತಂಡದ ಬೌಲಿಂಗ್ ಕೋಚ್ ಶೇನ್ ಜರ್ಗನ್ಸೆನ್ ಅಭಿಪ್ರಾಯ ಪಟ್ಟಿದ್ದಾರೆ.
ಜರ್ಗನ್ಸೆನ್ ಪ್ರಕಾರ ರಿಷಭ್ ಪಂತ್ ಎದುರಾಳಿಯಿಂದ ಪಂದ್ಯವನ್ನು ಯಾವುದೇ ಸಮಯದಲ್ಲಾದರೂ ಏಕಾಂಗಿಯಾಗಿ ಕಸಿದುಕೊಳ್ಳುವ ಸಾಮರ್ಥ್ಯ ಹೊಂದಿದ್ದಾರೆ. ವಿಶ್ವದ ನಂಬರ್ 1 ತಂಡದ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವ ಪಂತ್ರಿಂದ ಉಂಟಾಗುವ ಪರಿಣಾಮದ ಬಗ್ಗೆ ನ್ಯೂಜಿಲ್ಯಾಂಡ್ ತಂಡ ಎಚ್ಚರಿಕೆಯಿಂದ ಇರಬೇಕೆಂದು ತಿಳಿಸಿದ್ದಾರೆ.
" ಪಂತ್ ಅತ್ಯಂತ ಅಪಾಯಕಾರಿ ಆಟಗಾರನಾಗಿದ್ದು, ಅವರು ಏಕಾಂಗಿಯಾಗಿ ಆಟವನ್ನು ಬದಲಾಯಿಸಬಲ್ಲರು. ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ವಿರುದ್ಧ ಅದನ್ನು ಅದ್ಭುತವಾಗಿ ಮಾಡಿದನ್ನು ನಾವು ನೋಡಿದ್ದೇವೆ. ಅವರು ಅತ್ಯಂತ ಸಕಾರಾತ್ಮಕ ಮನಸ್ಸಿನವರು, ಆದರೂ, ಅವರ ವಿಕೆಟ್ ತೆಗೆದುಕೊಳ್ಳುವ ಅವಕಾಶ ನಮ್ಮ ಬೌಲರ್ಗಳಿಗೆ ಬರುತ್ತದೆ" ಎಂದು ಜರ್ಗೆನ್ಸನ್ ಆಂಗ್ಲ ಪತ್ರಿಕೆ ಟೆಲಿಗ್ರಾಫ್ಗೆ ತಿಳಿಸಿದ್ದಾರೆ.
ನಮ್ಮ ಬೌಲರ್ಗಳು ಕೂಡ ಅತ್ಯುತ್ತಮವಾಗಿ ಬೌಲಿಂಗ್ ಮಾಡುವ ಅವಶ್ಯಕತೆಯಿದೆ. ಆರಾಮವಾಗಿದ್ದು, ಪಂತ್ ರನ್ಗಳಿಸದಿರಲು ಎಷ್ಟು ಸಾಧ್ಯವೋ ಅಷ್ಟು ಕಷ್ಟಪಡುವ ಹಾಗೆ ಮಾಡಬೇಕು. ಏಕೆಂದರೆ ಅವರು ಸುಲಭವಾಗಿ ರನ್ಗಳಿಸುವ ಬ್ಯಾಟ್ಸ್ಮನ್ ಮತ್ತು ಆತನನ್ನು ಕಟ್ಟಿ ಹಾಕುವುದು ಕಠಿಣ, ನಾವಿದನ್ನು ತಲೆಯಲ್ಲಿಟ್ಟುಕೊಳ್ಳಬೇಕು ಎಂದು ಅವರು ತಿಳಿಸಿದ್ದಾರೆ.
ಆಸ್ಟ್ರೇಲಿಯಾ ಪ್ರವಾಸದಲ್ಲಿ ಮೊದಲೆ ಪಂದ್ಯದವರೆಗೆ ತಂಡದಲ್ಲಿ ಅವಕಾಶ ಪಡೆಯುವುದಕ್ಕೆ ಸಾಧ್ಯವಾಗದ ಪಂತ್, ನಂತರದ ಪಂದ್ಯಗಳಲ್ಲಿ ಅಬ್ಬರಿಸಿ ತಮ್ಮ ಸಾಮರ್ಥ್ಯ ಸಾಬೀತುಪಡಿಸಿದ್ದರು. ಅವರು ಸಿಡ್ನಿ ಟೆಸ್ಟ್ನಲ್ಲಿ 97ರನ್ ಸಿಡಿಸಿ ಭಾರತ ಡ್ರಾ ಸಾಧಿಸಲು ನೆರವಾದರೆ, ಗಬ್ಬಾ ಟೆಸ್ಟ್ನಲ್ಲಿ ಅಜೇಯ 89 ರನ್ ಸಿಡಿಸಿ ಐತಿಹಾಸಿಕ ಜಯದಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಅದೇ ಪ್ರದರ್ಶನವನ್ನು ಇಂಗ್ಲೆಂಡ್ ವಿರುದ್ಧ ತೋರಿಸಿದ್ದರು.
ಇದನ್ನು ಓದಿ:WTC ಫೈನಲ್ನಲ್ಲಿ ಭಾರತದ ವಿರುದ್ಧ ಮೇಲುಗೈ ಸಾಧಿಸಲು ಇಂಗ್ಲೆಂಡ್ ಸರಣಿ ಅನುಕೂಲ : ಟೇಲರ್
