ಅಬುಧಾಬಿ: ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಭಾನುವಾರ ಕೆಕೆಆರ್ ವಿರುದ್ಧ 2 ವಿಕೆಟ್ಗಳ ರೋಚಕ ಜಯ ಸಾಧಿಸಿದೆ. ತಂಡದ ನಾಯಕ ಧೋನಿ ತಮ್ಮ ತಂಡ ಈ ಪಂದ್ಯದಲ್ಲಿ ಚೆನ್ನಾಗಿ ಆಡಲಿಲ್ಲ, ಆದರೂ ಕೊನೆಗೆ ಗೆಲುವು ನಮ್ಮದಾಗಿದ್ದು ತುಂಬಾ ಸಂತೋಷ ತಂದಿದೆ ಎಂದು ಸಿಎಸ್ಕೆ ತಂಡದ ನಾಯಕ ಎಂ.ಎಸ್.ಧೋನಿ ಹೇಳಿದ್ದಾರೆ.
ಭಾನುವಾರ ಕೋಲ್ಕತ್ತಾ ನೈಟ್ ರೈಡರ್ಸ್ ನೀಡಿದ್ದ 172 ರನ್ಗಳ ಗುರಿಯನ್ನು ಸಿಎಸ್ಕೆ ಕೊನೆಯ ಎಸೆತದಲ್ಲಿ ತಲುಪಿ 2 ವಿಕೆಟ್ಗಳ ರೋಚಕ ಜಯ ಸಾಧಿಸಿತು. ಇದು ಐಪಿಎಲ್ ಪುನಾರಂಭಗೊಂಡ ನಂತರ ಸಿಎಸ್ಕೆ ಸಾಧಿಸಿದ ಸತತ 3ನೇ ಗೆಲುವಾಗಿದೆ.
"ಇದೊಂದು ಒಳ್ಳೆಯ ಗೆಲುವು. ಕೆಲವೊಮ್ಮೆ ಉತ್ತಮ ಕ್ರಿಕೆಟ್ ಆಡಿದಾಗಲೂ ನೀವು ಸೋತಿರುತ್ತೀರಿ. ಆದರೆ ನೀವು ಚೆನ್ನಾಗಿ ಆಡದಿದ್ದರೂ ಪಂದ್ಯ ಗೆದ್ದಾಗ ಅದು ತುಂಬಾ ಸಂತೋಷ ತರುತ್ತದೆ. ಈ ಪಂದ್ಯದಲ್ಲಿ ಎರಡೂ ತಂಡಗಳೂ ಉತ್ತಮ ಕ್ರಿಕೆಟ್ ಆಡಿವೆ ಮತ್ತು ಇದು ಪ್ರೇಕ್ಷಕರಿಗೆ ತುಂಬಾ ಸಂತೋಷ ಉಂಟುಮಾಡಿದೆ ಎಂದು ಭಾವಿಸುತ್ತೇನೆ" ಎಂದು ಧೋನಿ ಪ್ರಶಸ್ತಿ ಸಮಾರಂಭದಲ್ಲಿ ಹೇಳಿದ್ದಾರೆ.
ನಾವು ಉತ್ತಮವಾಗಿ ಬೌಲಿಂಗ್ ಮಾಡಿದೆವು. ವೇಗದ ಬೌಲರ್ಗಳಿಗೆ ಈ ಪಿಚ್ನಲ್ಲಿ ಬೌಲಿಂಗ್ ಮಾಡುವುದು ಸುಲಭವಲ್ಲ. ಹಾಗಾಗಿ ನಾವು ವೇಗಿಗಳಿಗೆ ಚಿಕ್ಕ ಸ್ಪೆಲ್ ನೀಡಿದೆವು. ನನ್ನ ಪ್ರಕಾರ 170(172) ಈ ಪಿಚ್ನಲ್ಲಿ ತುಂಬಾ ದೊಡ್ಡ ಮೊತ್ತ. ಈ ಪಂದ್ಯವನ್ನು ಅತ್ಯಂತ ರೋಚಕ ಸ್ಥಿತಿಗೆ ಕೊಂಡೊಯ್ದಿದ್ದಕ್ಕೆ ಕೆಕೆಆರ್ಗೆ ಖಂಡಿತ ಮೆಚ್ಚುಗೆ ಸೂಚಿಸಬೇಕು ಎಂದರು.
ಯುಎಇಯಲ್ಲಿ ಸತತ 6ನೇ ಗೆಲುವಿನ ಪ್ರತಿಕ್ರಿಯಿಸಿದ ಧೋನಿ, ನಾವು (ಕಳೆದ ವರ್ಷದ ವೈಫಲ್ಯ) ಅವುಗಳಿಂದ ಕಲಿಯಬೇಕು ಮತ್ತು ಅದನ್ನು ಬಳಸಿಕೊಂಡು ಬಲಿಷ್ಠರಾಗಿ ಹಿಂತಿರುಗಬೇಕು ಎಂದು ಹೇಳಿದರು.
ಇದನ್ನೂ ಓದಿ: ಕೆಕೆಆರ್ ವಿರುದ್ಧ 2 ವಿಕೆಟ್ಗಳ ರೋಚಕ ಜಯ ಸಾಧಿಸಿ ಅಗ್ರಸ್ಥಾನಕ್ಕೇರಿದ ಚೆನ್ನೈ ಸೂಪರ್ ಕಿಂಗ್ಸ್
