ನವಿ ಮುಂಬೈ: ವನಿದು ಹಸರಂಗ ಎಂಬ ಸ್ಪಿನ್ ಮಾಂತ್ರಿಕನ ಬಲೆಗೆ ಬಿದ್ದ ಸನ್ರೈಸರ್ಸ್ ಹೈದರಾಬಾದ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಮಂಡಿಯೂರಿದೆ. ಆರ್ಸಿಬಿ ನೀಡಿದ 192 ರನ್ಗಳ ಬೃಹತ್ ಮೊತ್ತ ಬೆನ್ನಟ್ಟುವಲ್ಲಿ ವಿಫಲವಾದ ಸನ್ರೈಸರ್ಸ್ 20 ಓವರ್ಗಳಲ್ಲಿ 125 ರನ್ ಗಳಿಸಿ ಆಲೌಟ್ ಆಯಿತು. 67 ರನ್ಗಳ ಗೆಲುವು ಸಾಧಿಸುವ ಮೂಲಕ ಆರ್ಸಿಬಿ ಕಳೆದ ಪಂದ್ಯಕ್ಕೆ ಸೋಲಿಗೆ ಮುಯ್ಯಿ ತೀರಿಸಿಕೊಂಡಿತು.
ಡು ಪ್ಲೆಸಿಸ್ ಹೋರಾಟ: ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಆರ್ಸಿಬಿ ತಂಡವನ್ನು ನಾಯಕ ಡು ಪ್ಲೆಸಿಸ್ ಬೃಹತ್ ಮೊತ್ತದತ್ತ ಕೊಂಡೊಯ್ದರು. 50 ಎಸೆತಗಳಲ್ಲಿ 8 ಬೌಂಡರಿ, 2 ಸಿಕ್ಸರ್ ಸಮೇತ 73 ರನ್ (ಔಟಾಗದೇ) ಗಳಿಸಿ ಮಿಂಚಿದರು. ನಾಯಕನಿಗೆ ಉತ್ತಮ ಸಾಥ್ ನೀಡಿದ ಯುವ ಆಟಗಾರ ರಜತ್ ಪಾಟೀದಾರ್ ಅರ್ಧಶತಕ ಬಾರಿಸುವ ಅಂಚಿನಲ್ಲಿ ಔಟಾದರೂ ತಂಡಕ್ಕೆ ಉತ್ತಮ ಕಾಣಿಕೆ ನೀಡಿದರು. 38 ಎಸೆತಗಳಲ್ಲಿ 48 ರನ್ ಬಾರಿಸಿದ ಪಾಟೀದಾರ್, 4 ಬೌಂಡರಿ, 2 ಸಿಕ್ಸರ್ ಸಿಡಿಸಿದರು.
ಮಿಂಚು ಹರಿಸಿದ ಮ್ಯಾಕ್ಸಿ, ಕಾರ್ತಿಕ್: ಪಾಟೀದಾರ್ ಔಟಾದ ಬಳಿಕ ಮೈದಾನಕ್ಕೆ ಬಂದ ಗ್ಲೆನ್ ಮ್ಯಾಕ್ಸವೆಲ್ ಮೊದಲ ಎಸೆತದಿಂದಲೇ ದಂಡಿಸಲು ಶುರು ಮಾಡಿದರು. 3 ಬೌಂಡರಿ, 2 ಸಿಕ್ಸರ್ ನೆರವಿನಿಂದ 33 ರನ್ ಗಳಿಸಿ ಕಾರ್ತಿಕ್ ತ್ಯಾಗಿಗೆ ವಿಕೆಟ್ ಒಪ್ಪಿಸಿದರು. ಬಳಿಕ ನಡೆದಿದ್ದೇ ದಿನೇಶ್ ಕಾರ್ತಿಕ್ ಆಟ.
ಇನ್ನಿಂಗ್ಸ್ನ 2 ಓವರ್ ಬಾಕಿ ಇದ್ದಾಗ ಅಂಗಳಕ್ಕಿಳಿದ ದಿನೇಶ್ ಕಾರ್ತಿಕ್ ಕೇವಲ 8 ಎಸೆತಗಳಲ್ಲಿ 4 ಸಿಕ್ಸರ್ 1 ಬೌಂಡರಿ ಬಾರಿಸಿ 30 ರನ್ಗಳನ್ನು ಚಚ್ಚಿದರು. ಇದು ತಂಡ ಕೊನೆಯ ಓವರ್ಗಳಲ್ಲಿ ಬೃಹತ್ ಮೊತ್ತ ಪೇರಿಸಲು ಸಾಧ್ಯವಾಯಿತು.
3ನೇ ಬಾರಿ ಸೊನ್ನೆ ಸುತ್ತಿದ ಕೊಹ್ಲಿ: ಇನ್ನು ಸತತವಾಗಿ ಬ್ಯಾಟಿಂಗ್ ವೈಫಲ್ಯ ಅನುಭವಿಸುತ್ತಿರುವ ಬ್ಯಾಟಿಂಗ್ ಕಿಂಗ್ ವಿರಾಟ್ ಕೊಹ್ಲಿ ತಮ್ಮ ಹೆಸರಿಗೆ ತಕ್ಕಂತೆ ಆಟವಾಡುವಲ್ಲಿ ಮತ್ತೊಮ್ಮೆ ವಿಫಲವಾದರು. ಇನ್ನಿಂಗ್ಸ್ನ ಮೊದಲ ಓವರ್ ಎಸೆದ ಜಗದೀಶನ್ ಸುಚಿತ್ರ ಮೊದಲ ಎಸೆತದಲ್ಲೇ ಕೇನ್ ವಿಲಿಯಮ್ಸನ್ಗೆ ಕ್ಯಾಚ್ ನೀಡಿದರು. ಈ ಸೀಸನ್ನಲ್ಲಿ ಕೊಹ್ಲಿ 3 ನೇ ಬಾರಿಗೆ ಸೊನ್ನೆ ಸುತ್ತಿದರು.
ಬ್ಯಾಟಿಂಗ್ ವೈಫಲ್ಯ: 192 ರನ್ಗಳ ಬೃಹತ್ ಮೊತ್ತವನ್ನು ಬೆನ್ನಟ್ಟಿದ ಹೈದರಾಬಾದ್ ತಂಡ ಆರಂಭಿಕ ಆಘಾತ ಅನುಭವಿಸಿತು. 1 ರನ್ ಗಳಿಸುವಷ್ಟರಲ್ಲಿ ಅಭಿಷೇಕ್ ಶರ್ಮಾ, ನಾಯಕ ಕೇನ್ ವಿಲಿಯಮ್ಸನ್ ವಿಕೆಟ್ ಒಪ್ಪಿಸಿದರು. ರಾಹುಲ್ ತ್ರಿಪಾಠಿ 58, ಆ್ಯಡನ್ ಮಾರ್ಕ್ರಮ್ 21, ನಿಕೋಲಸ್ ಪೂರನ್ 19 ರನ್ ಗಳಿಸಿದ್ದು ಬಿಟ್ಟರೆ, ಉಳಿದ 8 ಬ್ಯಾಟ್ಸಮನ್ಗಳು ಎರಡಂಕಿ ಮೊತ್ತ ದಾಟುವಲ್ಲಿ ವಿಫಲರಾದರು.
ಹಸರಂಗ 'ಸನ್'ಸ್ಟ್ರೋಕ್: ಹೈದರಾಬಾದ್ ತಂಡಕ್ಕೆ ಸನ್ಸ್ಟ್ರೋಕ್ ನೀಡಿದ್ದು ಆರ್ಸಿಬಿಯ ವನಿಂದು ಹಸರಂಗ. ತಂಡವನ್ನು ಇನ್ನಿಲ್ಲದಂತೆ ಕಾಡಿದ ಹಸರಂಗ 4 ಓವರ್ಗಳಲ್ಲಿ 5 ವಿಕೆಟ್ ಕಿತ್ತು ಬ್ಯಾಟಿಂಗ್ ಬೆನ್ನೆಲುಬು ಮುರಿದರು.
ಓದಿ: ದಿಢೀರ್‌ ಸ್ವದೇಶಕ್ಕೆ ತೆರಳಿದ ರಾಜಸ್ಥಾನ್ ತಂಡದ ಶಿಮ್ರಾನ್ ಹೆಟ್ಮೆಯರ್: ಇಲ್ಲಿದೆ ಕಾರಣ..
