ಹೈದರಾಬಾದ್: 12ನೇ ಆವೃತ್ತಿಯ ಐಪಿಎಲ್ನಲ್ಲಿ ಟಾಪ್ ಸ್ಕೋರರ್ ಆಗಿರುವ ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್, ಇಂಗ್ಲೆಂಡ್ನ ಜಾನಿ ಬೈರ್ಸ್ಟೋವ್, ಆರ್ಸಿಬಿಯ ಆಧಾರಸ್ಥಂಭವಾಗಿದ್ದ ಮೊಯಿನ್ ಅಲಿ, ಸ್ಟೋಯ್ನಿಸ್ ಸದ್ಯದಲ್ಲೇ ಐಪಿಎಲ್ನಿಂದ ಹೊರ ನಡೆಯಲಿದ್ದಾರೆ.
ಪಾಕಿಸ್ತಾನದ v/s ಇಂಗ್ಲೆಂಡ್ ಏಕದಿನ ಸರಣಿ ಆಯೋಜನೆಗೊಂಡಿರುವ ಹಿನ್ನೆಲೆಯಲ್ಲಿ ರಾಷ್ಟ್ರೀಯ ತಂಡದ ಪರ ಆಡಲು ಜಾನಿ ಬೈರ್ಸ್ಟೋವ್,ಬೆನ್ಸ್ಟೋಕ್ಸ್, ಮೊಯಿನ್ ಅಲಿ ಹಾಗೂ ಜೋಫ್ರಾ ಇಂಗ್ಲೆಂಡ್ಗೆ ಮರಳಲಿದ್ದಾರೆ. ಚೊಚ್ಚಲ ಐಪಿಎಲ್ನಲ್ಲೇ ಭರ್ಜರಿ ಬ್ಯಾಟಿಂಗ್ ಮೂಲಕ ರಂಜಿಸಿದ ಬೈರ್ಸ್ಟೋವ್, ವಾರ್ನರ್‌ರೊಂದಿಗೆ ಉತ್ತಮ ಪ್ರದರ್ಶನ ನೀಡಿದ್ದರು. ಹೈದರಾಬಾದ್ ತಂಡದ ಬೆನ್ನೆಲುಬಾಗಿದ್ದ ಈ ಆರಂಭಿಕ ಜೋಡಿ ಇಬ್ಬರ ಸೇವೆಯನ್ನು ಮಿಸ್ ಮಾಡಿಕೊಳ್ಳುತ್ತಿದೆ.
ಈ ಸಮಸ್ಯೆ ಕೇವಲ ಸನ್ರೈಸರ್ಸ್ಗೆ ಮಾತ್ರವಲ್ಲದೆ, ರಾಜಸ್ಥಾನ, ಆರ್ಸಿಬಿ ತಂಡಗಳಿಗೂ ತಟ್ಟಿದೆ. ಆರ್ಸಿಬಿಗೆ ಕಳೆದೆರಡು ಪಂದ್ಯಗಳ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದ ಮೊಯಿನ್ ಅಲಿ, ಮಾರ್ಕಸ್ ಸ್ಟೋಯ್ನಿಸ್ ಸ್ವದೇಶಕ್ಕೆ ಮರಳಬೇಕಾಗಿದೆ. ಮೊಯಿನ್ಗೆ ರಾಷ್ಟ್ರೀಯ ತಂಡದಿಂದ ಕರೆ ಬಂದರೆ, ಸ್ಟೋಯ್ನಿಸ್ ವಿಶ್ವಕಪ್ ಶಿಬಿರದಲ್ಲಿ ಪಾಲ್ಗೊಳ್ಳಲು ಹೊರಟಿದ್ದಾರೆ.
ಸ್ಟೋಯ್ನಿಸ್ ಜೊತೆಗೆ 'ಆರೆಂಜ್ ಕ್ಯಾಪ್' ಪಡೆದಿರುವ ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್, ರಾಜಸ್ಥಾನ ತಂಡದಲ್ಲಿರುವ ಸ್ಟಿವ್ ಸ್ಮಿತ್, ಆ್ಯಶ್ಟನ್ ಟರ್ನರ್ ವಿಶ್ವಕಪ್ಗೂ ಮುನ್ನ ನಡೆಯಲಿರುವ ತರಬೇತಿ ಶಿಬಿರದಲ್ಲಿ ಪಾಲ್ಗೊಳ್ಳಲು ಇದೇ ತಿಂಗಳ ಕೊನೆಗೆ ಅಥವಾ ಮೇ ಮೊದಲ ವಾರದಲ್ಲಿ ತವರಿಗೆ ಮರಳಲಿದ್ದಾರೆ. ವಾರ್ನರ್ ಹಾಗೂ ಸ್ಮಿತ್ ಬಾಲ್ ಟ್ಯಾಂಪರಿಂಗ್ ಪ್ರಕರಣದ ನಂತರ ಇದೇ ಮೊದಲ ಬಾರಿಗೆ ರಾಷ್ಟ್ರೀಯ ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ.
ಇದೀಗ ಈ ವಿದೇಶಿ ಆಟಗಾರರ ಗೈರಿನಲ್ಲಿ ಕೊನೆಯ 2-3 ಪಂದ್ಯ ಆಡಬೇಕಾಗಿದೆ. ಈ ಮೂರು ತಂಡಗಳು ಹೊರ ಹೋಗುತ್ತಿರುವ ಆಟಗಾರರ ಮೇಲೆ ಹೆಚ್ಚು ಅವಲಂಬಿತವಾಗಿದ್ದ ಹಿನ್ನೆಲೆಯಲ್ಲಿ ಮುಂಬರುವ ಪಂದ್ಯಗಳಲ್ಲಿ ಗೆಲುವು ಕಠಿಣವಾಗಲಿದೆ.
ಈಗಾಗಲೇ ಮೂರು ತಂಡಗಳು ಪ್ಲೇ ಆಫ್ ರೇಸ್ನಿಂದ ಹೊರಬಿದ್ದಿದ್ದು, ಲೆಕ್ಕಾಚಾರದ ಆಧಾರದ ಮೇಲೆ ಕೊನೆ ಆಸೆ ಇಟ್ಟುಕೊಂಡಿವೆ. ಹೀಗಾಗಿ ಸಿಎಸ್ಕೆ, ಡೆಲ್ಲಿ ಹಾಗೂ ಮುಂಬೈ ತಂಡಗಳು ಪ್ಲೇ ಆಫ್ಗೆ ತುಂಬಾ ಹತ್ತಿರದಲ್ಲಿವೆ. ಉಳಿದ ಒಂದು ಸ್ಥಾನಕ್ಕಾಗಿ ಕೊನೆಯ 5 ತಂಡಗಳ ನಡುವೆ ಬಿಗ್ ಫೈಟ್ ನಡೆಯಲಿವೆ.
