ಮುಂಬೈ: ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಮತ್ತು ನ್ಯೂಜಿಲೆಂಡಿನ ಕೇನ್ ವಿಲಿಯಮ್ಸನ್ ವಿಶ್ವದ ಸ್ಟಾರ್ ಬ್ಯಾಟ್ಸ್ಮ್ಯಾನ್ಗಳು. ಅದಕ್ಕಿಂತ ಮಿಗಿಲಾಗಿ ಇಬ್ಬರು ಒಳ್ಳೆಯ ಸ್ನೇಹಿತರು. ಕಿಂಗ್‌ ಕೊಹ್ಲಿಯನ್ನ ಕಿವೀಸ್ ನಾಯಕ ಕೇನ್ ಮನಸಾರೆ ಹಾಡಿ ಹೊಗಳಿದ್ದಾರೆ.
ವಿರಾಟ್ ಕೊಹ್ಲಿ ತನ್ನ ಅಬ್ಬರದ ಆಟದೊಂದಿಗೆ ಮೈದಾನದಲ್ಲಿ ರನ್ ಮಳೆ ಸುರಿಸಿದ್ರೆ, ಕೇನ್ ವಿಲಿಯಮ್ಸನ್ ತನ್ನ ಕೂಲ್ ಆಟದೊಂದಿಗೆ ರನ್ ಗಳಿಸುತ್ತಾರೆ. ಕೊಹ್ಲಿ ಪ್ರಸ್ತುತ ಅತ್ಯುತ್ತಮ ಬ್ಯಾಟ್ಸ್‌ಮನ್‌. ಕೊಹ್ಲಿಯ ಆಟದಲ್ಲಿ ಪರಿಪಕ್ವತೆ ಇದೆ. ಮೈದಾನಕ್ಕೆ ಬ್ಯಾಟ್ ಹಿಡಿದು ಇಳಿದ್ರೆ ರನ್ಗಳ ಮಳೆಯನ್ನೇ ಸುರಿಸಬೇಕು ಎಂಬ ಛಲ ಆತನಲ್ಲಿದೆ. ಆದ್ದರಿಂದಲೇ ಕೊಹ್ಲಿ ಭಾರತದ ರನ್ ಮಷಿನ್ ಆಗಿ, ಬೌಲರ್ಗಳಿಗೆ ದುಸ್ವಪ್ನವಾಗಿದ್ದಾರೆ ಎಂದು ಕೊಹ್ಲಿ ಆಟದ ವೈಖರಿಯನ್ನ ಬಣ್ಣಿಸಿದ್ದಾರೆ ಕೇನ್.
ಕೊಹ್ಲಿ ಕೇವಲ ಆಟಗಾರನಾಗಿ ಮಾತ್ರವಲ್ಲ, ತಂಡದ ಉತ್ತಮ ನಾಯಕನಾಗಿಯೂ ಕೆಲಸ ನಿರ್ವಹಿಸುವ ಚಾಕಚಕ್ಯತೆ ಹೊಂದಿರುವಾತ. 2008ಕ್ಕೆ ಹೋಲಿಸಿದ್ರೆ ವಿರಾಟ್ ಕೊಹ್ಲಿಯಲ್ಲಿ ಸಾಕಷ್ಟು ಬದಲಾವಣೆಗಳಾಗಿವೆ. ಓರ್ವ ಸಾಮಾನ್ಯ ಕ್ರಿಕೆಟ್ ಆಟಗಾರನಾಗಿ ಬಂದು ನಾಯಕತ್ವದ ಜತೆಗೆ ದಾಖಲೆ ನಿರ್ಮಾಣ ಮಾಡುವುದರ ಹಿಂದೆ ಸಾಕಷ್ಟು ಶ್ರಮವಿರಬೇಕು, ಕೊಹ್ಲಿ ಆ ನಿಟ್ಟಿನಲ್ಲಿ ಸಾಕಷ್ಟು ಕಾರ್ಯಗಳನ್ನ ಮಾಡಿದ್ದಾರೆ ಎಂದು ಕೇನ್ ವಿಲಿಯಮ್ಸನ್ ಅಭಿಪ್ರಾಯಪಟ್ಟಿದ್ದಾರೆ.
ಕ್ರಿಕೆಟ್ ಆಟದಲ್ಲಿ ದೇಹದ ಜತೆಗೆ ಆತನ ಮೆದುಳು ಸಹ ಅಷ್ಟೇ ಸಾಮರ್ಥ್ಯ ಹೊಂದಿದೆ. ಮೈದಾನಕ್ಕೆ ಬ್ಯಾಟ್ ಹಿಡಿದು ಇಳಿದ್ರೆ ಸಾಧ್ಯವಾದಷ್ಟು ರನ್ ಗಳಿಸಬೇಕು, ಎದುರಾಳಿಗಳನ್ನು ಬಗ್ಗು ಬಡಿಯಬೇಕು ಎಂಬ ಇಚ್ಛಾಶಕ್ತಿ ಹೊಂದಿರುವ ಕಾರಣದಿಂದಾಗಿ ಕೊಹ್ಲಿಗೆ ಸಾಧನೆ ಮಾಡಲು ಸಾಧ್ಯವಾಗಿದೆ. ತಾನು ಮತ್ತು ಕೊಹ್ಲಿ ಆಟದಲ್ಲಿ ಎದುರಾಳಿಗಳಾದರೂ ಪರಸ್ಪರ ಸ್ನೇಹಿತರೆ ಎಂದು ಕೇನ್ ಸಂತಸ ವ್ಯಕ್ತಪಡಿಸಿದ್ದಾರೆ.
ವಿರಾಟ್ ಕೊಹ್ಲಿ ಮೇ 22ರಂದು ಇನ್‌ಸ್ಟಾಗ್ರಾಮ್ನಲ್ಲಿ ಪೋಸ್ಟ್ವೊಂದನ್ನ ಕಳುಹಿಸಿದ್ದರು. ಆ ಪೋಸ್ಟ್ ನೋಡಿ ನಾನು ತುಂಬಾ ಸಂತಸಗೊಂಡಿದ್ದೆ. ಇದು ಕೊಹ್ಲಿಯ ಸರಳತನ ಹಾಗೂ ನಮ್ಮ ಮೇಲೆ ಇರುವ ಪ್ರೀತಿ ತೋರಿಸುತ್ತದೆ ಎಂದಿದ್ದಾರೆ.
ಆಸ್ಟ್ರೇಲಿಯಾದಲ್ಲಿ ನಡೆದ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಕೊಹ್ಲಿ ಹೇಳಿದ ಮಾತುಗಳನ್ನು ನೆನಪಿಸಿಕೊಂಡ ವಿಲಿಯಮ್ಸನ್, ಫಲಿತಾಂಶಗಳಿಂದ ನಾಯಕತ್ವವನ್ನು ನಿರ್ಧರಿಸಬಹುದು ಎಂದು ನಾನು ಭಾವಿಸುವುದಿಲ್ಲ. ನೀವು ತಂಡವನ್ನು ಹೇಗೆ ಒಗ್ಗೂಡಿಸುತ್ತೀರಿ ಹಾಗೂ ನಿಮ್ಮ ಸಹ ಆಟಗಾರರು ತಂಡದಲ್ಲಿ ಹೇಗೆ ಕಾರ್ಯನಿರ್ವಹಿಸುತ್ತಾರೆ ಎಂಬುದು ಮುಖ್ಯ ಎಂಬ ಕೊಹ್ಲಿಯ ಮಾತು ಸತ್ಯ ಎಂದು ನಾನು ಭಾವಿಸುತ್ತೇನೆ ಎಂದಿದ್ದಾರೆ.
ಕೊಹ್ಲಿ ಓರ್ವ ಕ್ರಿಕೆಟ್ ಆಟಗಾರನಾಗಿ ಮಾತ್ರವಲ್ಲದೆ, ಒಳ್ಳೆಯ ಸ್ನೇಹಿತ ಕೂಡ ಹೌದು. ಭಾರತವಲ್ಲದೆ ಇತರ ತಂಡದ ಆಟಗಾರರನ್ನೂ ಸಹ ಗೌರವದಿಂದ ಕಾಣುವ ಕೊಹ್ಲಿ ಓರ್ವ ಸ್ಮಾರ್ಟ್ ಕ್ರಿಕೆಟಿಗ ಅಂದ್ರೆ ತಪ್ಪಾಗಲಾರದು ಎಂದು ಕೇನ್ ವಿಲಿಯಮ್ಸನ್, ಕೊಹ್ಲಿ ಬಗೆಗಿನ ಭಾವನೆಗಳನ್ನು ತೆರೆದಿಟ್ಟಿದ್ದಾರೆ.
