ಮುಂಬೈ: ಪ್ರಸಕ್ತ ಸಾಲಿನ ಸಯ್ಯದ್ ಮುಷ್ತಾಕ್ ಅಲಿ ಟೂರ್ನಿ ಮತ್ತೊಂದು ಪಂದ್ಯದಲ್ಲಿ ಬಲಿಷ್ಠ ಮುಂಬೈ ತಂಡದ ಮೇಲೆ ಹರಿಯಾಣ ಸವಾರಿ ಮಾಡಿದ್ದು, 8 ವಿಕೆಟ್ಗಳ ಭರ್ಜರಿ ಗೆಲುವು ದಾಖಲಿಸಿದೆ.
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಮುಂಬೈ ತಂಡ ಹರಿಯಾಣ ಬೌಲಿಂಗ್ ದಾಳಿಗೆ ತತ್ತರಿಸಿ 19.3 ಓವರ್ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 143 ರನ್ ಗಳಿಕೆ ಮಾಡಿತು. ತಂಡದ ಪರ ಆರಂಭಿಕ ಆಟಗಾರ ಜೈಸ್ವಾಲ್ (35), ಸರ್ಫರಾಜ್ ಖಾನ್ (30) ಹಾಗೂ ಅಂಕೋಲ್ಕರ್ (37) ರನ್ ಕಲೆ ಹಾಕಿದರು. ಉಳಿದಂತೆ ಯಾವೊಬ್ಬ ಪ್ಲೇಯರ್ಸ್ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಲಿಲ್ಲ.
ಹರಿಯಾಣ ತಂಡದ ಪರ ಅರುಣ್ 3 ವಿಕೆಟ್, ಜಯಂತ್ ಯಾದವ್ 4 ವಿಕೆಟ್ ಪಡೆದುಕೊಂಡರೆ, ಚಹಾಲ್, ರಾಹುಲ್ ತೆವಾಟಿಯಾ ತಲಾ 1 ವಿಕೆಟ್ ಪಡೆದರು.
144 ರನ್ ಗುರಿ ಬೆನ್ನತ್ತಿದ್ದ ಹರಿಯಾಣ ಆರಂಭದಲ್ಲೇ ಆಘಾತ ಅನುಭವಿಸಿತು. ಚೈತನ್ಯ ಬಿಶ್ಣೋಯಿ 4 ರನ್ಗಳಿಸಿದ್ದ ವೇಳೆ ಅರ್ಜುನ್ ತೆಂಡೂಲ್ಕರ್ ಓವರ್ನಲ್ಲಿ ವಿಕೆಟ್ ಒಪ್ಪಿಸಿದರು. ಇದಾದ ಬಳಿಕ ಕ್ರೀಸಿಗೆ ಬಂದ ಅರುಣ್ ಚಪ್ರಾಣ್ 19 ರನ್ಗಳಿಸಿದರು. ತದನಂತರ ಒಂದಾದ ಹಿಮಾನ್ಶು ರಾಣಾ (75) ಅಜೇಯ ಹಾಗೂ ಶುವಂ ಚೌಹಾಣ್ (43) ರನ್ ಗಳಿಕೆ ಮಾಡಿ ತಂಡವನ್ನು 17.4 ಓವರ್ಗಳಲ್ಲಿ ಗೆಲುವಿನ ದಡ ಮುಟ್ಟಿಸಿದರು.
ಮುಂಬೈ ಪರ ಅರ್ಜುನ್ ತೆಂಡೂಲ್ಕರ್ ಹಾಗೂ ಶಾಮ್ಸ್ ಮುಲಾನಿ ತಲಾ 1ವಿಕೆಟ್ ಪಡೆದುಕೊಂಡರು.
ಅರ್ಜುನ್ ತೆಂಡೂಲ್ಕರ್ ಪದಾರ್ಪಣೆ
ಅಂಡರ್-19 ಹಾಗೂ ಮುಂಬೈನ ವಿವಿಧ ತಂಡಗಳಲ್ಲಿ ಆಡಿದ್ದ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಮಗ ಅರ್ಜುನ್ ತೆಂಡೂಲ್ಕರ್ ಇಂದಿನ ಪಂದ್ಯದಲ್ಲಿ ಆಡುವ ಅವಕಾಶ ಪಡೆದುಕೊಂಡರು. ಈ ಮೂಲಕ ಹಿರಿಯರ ತಂಡದಲ್ಲೂ ಭಾಗಿಯಾಗಿದ್ದಾರೆ.
