ಭಾರತ-ಆಫ್ರಿಕಾ ಪಂದ್ಯ ರದ್ದು ಬೆನ್ನಲ್ಲೇ ಇಂಗ್ಲೆಂಡ್​-ಶ್ರೀಲಂಕಾ ಟೂರ್ನಿಯೂ ಮುಂದೂಡಿಕೆ

ಕೊರೊನಾ ಆತಂಕ ಇಡೀ ಜಗತ್ತಿನಾದ್ಯಂತ ವ್ಯಾಪಿಸಿದೆ. ಗಂಭೀರ ಸಮಸ್ಯೆಯ ವಿಮುಕ್ತಿಗೆ ಪರಿಹಾರ ಕಾಣಲು ಜಗತ್ತು ತಿಣುಕಾಡುತ್ತಿದೆ. ಈ ಸಾಂಕ್ರಾಮಿಕ ಹೆಮ್ಮಾರಿಗೆ ಕ್ರೀಡಾಲೋಕವೂ ತತ್ತರಿಸಿದೆ. ಪೂರ್ವ ನಿಗದಿಯಂತೆ ನಡೆಯಬೇಕಿರುವ ಪಂದ್ಯಗಳೆಲ್ಲವೂ ಒಂದಾದ ಮೇಲೊಂದರಂತೆ ರದ್ದಾಗುತ್ತಿವೆ.

ಕೊಲಂಬೊ: ಡೆಡ್ಲಿ ವೈರಸ್​​ ಕೊರೊನಾ ಮರಣ ಮೃದಂಗ ಬಾರಿಸುತ್ತಿದೆ. ಪ್ರಾಣಕ್ಕೆ ಕುತ್ತು ತರುತ್ತಿರುವ ಮಾರಕ ರೋಗಾಣುವಿನಿಂದ ಜನರ ರಕ್ಷಣೆ ಮಾಡಲು ಜಗತ್ತಿನ ಎಲ್ಲ ದೇಶಗಳು ಹರಸಾಹಸ ಪಡುತ್ತಿವೆ. ಈ ವೈರಸ್ ಹರಡುವ ಆತಂಕದಿಂದ ಮಹತ್ವದ ಅಂತಾರಾಷ್ಟ್ರೀಯ ಕ್ರೀಡಾಕೂಟಗಳು ರದ್ದಾಗುತ್ತಿವೆ. ಈ ಸಾಲಿಗೆ ಹೊಸ ಸೇರ್ಪಡೆ ಭಾರತ-ದಕ್ಷಿಣ ಆಫ್ರಿಕಾ ನಡುವಿನ ಏಕದಿನ ಸರಣಿ.

ಪಂದ್ಯವೊಂದರ ವೇಳೆ ವಿಕೆಟ್ ಪಡೆದ ಸಂಭ್ರಮದಲ್ಲಿ ಶ್ರೀಲಂಕಾ ಕ್ರಿಕೆಟ್​ ತಂಡದ ಆಟಗಾರರು (ಸಂಗ್ರಹ ಚಿತ್ರ)

ಲಕ್ನೋ ಹಾಗೂ ಕೋಲ್ಕತ್ತಾದಲ್ಲಿ ನಡೆಯಬೇಕಾಗಿದ್ದ ಏಕದಿನ ಕ್ರಿಕೆಟ್​ ಪಂದ್ಯ ರದ್ಧುಗೊಂಡಿದ್ದು, ದ. ಆಫ್ರಿಕಾ ತಂಡ ಇದೀಗ ತವರಿಗೆ ಮರಳಲು ಮುಂದಾಗಿದೆ. ಇದರ ಬೆನ್ನಲ್ಲೇ ಮಾರ್ಚ್​ 19ರಿಂದ ಇಂಗ್ಲೆಂಡ್​-ಶ್ರೀಲಂಕಾ ನಡುವೆ ಆರಂಭಗೊಳ್ಳಬೇಕಾಗಿದ್ದ ಎರಡು ಪಂದ್ಯಗಳ ಟೆಸ್ಟ್​ ಸರಣಿ ಮುಂದೂಡಿಕೆಯಾಗಿದೆ.

ಈಗಾಗಲೇ ಇಂಗ್ಲೆಂಡ್​ ತಂಡ ಶ್ರೀಲಂಕಾ ಪ್ರವಾಸದಲ್ಲಿದ್ದು, ನಾಲ್ಕು ದಿನಗಳ ಅಭ್ಯಾಸ ಪಂದ್ಯದಲ್ಲಿ ಭಾಗಿಯಾಗಿದೆ. ಇದರ ಬೆನ್ನಲ್ಲೇ ಇಂಗ್ಲೆಂಡ್​ ಕ್ರಿಕೆಟ್​ ಮಂಡಳಿ ಈ ನಿರ್ಧಾರ ಕೈಗೊಂಡಿದ್ದು, ತನ್ನ ಆಟಗಾರರನ್ನು ಹಿಂದಕ್ಕೆ ಕರೆಯಿಸಿಕೊಳ್ಳಲು ಮುಂದಾಗಿದೆ. ಈಗಾಗಲೇ ನಿಗದಿಯಾಗಿರುವ ಪ್ರಕಾರ, ಮಾರ್ಚ್​ 19ರಂದು ಗಾಲೆ ಮೈದಾನ ತದ ನಂತರ ಕೊಲಂಬೊದಲ್ಲಿ ಟೆಸ್ಟ್​ ಪಂದ್ಯಗಳು ನಡೆಯಬೇಕಾಗಿತ್ತು. ಆದರೀಗ ಪಂದ್ಯಗಳು ಮುಂದೂಡಿಕೆಯಾಗಿವೆ. ಇನ್ನು ಜೂನ್​ ತಿಂಗಳಲ್ಲಿ ಇಂಗ್ಲೆಂಡ್​ ವೆಸ್ಟ್​ ಇಂಡೀಸ್​ ಜತೆ ಕ್ರಿಕೆಟ್​ ಸರಣಿ ಆಡಬೇಕಾಗಿದ್ದು, ಅದೂ ಕೂಡಾ ರದ್ದಾಗುವ ಸಾಧ್ಯತೆ ಕಾಣಿಸಿದೆ.

ಕೊರೊನಾ ವೈರಸ್​ ಭೀತಿಯಿಂದಾಗಿ ಇಂಡಿಯನ್​ ಪ್ರೀಮಿಯರ್​ ಲೀಗ್​ ಅನ್ನು ಏಪ್ರಿಲ್​ 15ರವರೆಗೆ ಮುಂದೂಡಲಾಗಿದ್ದು, ದಿಗ್ಗಜರ ಕ್ರಿಕೆಟ್​ ಟೂರ್ನಿ ರೋಡ್ ಸೇಫ್ಟಿ ವರ್ಲ್ಡ್ ಸಿರೀಸ್ ಕೂಡ ನಡೆಯುತ್ತಿಲ್ಲ.