ನವದೆಹಲಿ: ಆರ್ಸಿಬಿ ತಂಡದ ಬೌಲರ್ ಡೇಲ್ ಸ್ಟೈನ್ 13ನೇ ಆವೃತ್ತಿಯಲ್ಲಿ ಅತ್ಯಂತ ದುರ್ಬಲವಾಗಿದೆ. ಅವರು ಆಡಿರುವ 3 ಪಂದ್ಯಗಳಿಂದ 11.40 ಎಕಾನಮಿಯಲ್ಲಿ ಕೇವಲ ಒಂದು ವಿಕೆಟ್ ಪಡೆದಿದ್ದಾರೆ. ಆದರೆ, ಅವರ ವೈಫಲ್ಯಕ್ಕೆ ಕಾರಣ ಏನೆಂಬುದನ್ನು ದಕ್ಷಿಣ ಆಫ್ರಿಕಾದ ಮಾಜಿ ವೇಗಿ ಫ್ಯಾನಿ ಡಿ ವಿಲಿಯರ್ಸ್ ಬಹಿರಂಗಪಡಿಸಿದ್ದಾರೆ.
ಐಪಿಎಲ್ಗೂ ಮುನ್ನ ಸಾಕಷ್ಟು ಕ್ರಿಕೆಟ್ ಆಡಿರದೇ ಇರುವುದು ಡೇಲ್ ಸ್ಟೈನ್ ಅವರ ಬೌಲಿಂಗ್ ವೇರಿಯೇಸನ್ ಮೇಲೆ ದುಷ್ಪರಿಣಾಮ ಬೀರಿದೆ ಎಂದು ಹರಿಣಗಳ ಪರ 1990 ರಿಂದ 1998ರವರೆಗೆ 18 ಟೆಸ್ಟ್ ಹಾಗೂ 83 ಏಕದಿನ ಪಂದ್ಯಗಳನ್ನಾಡಿರುವ ವಿಲಿಯರ್ಸ್ ಅಭಿಪ್ರಾಯ ಪಟ್ಟಿದ್ದಾರೆ.
" ಕೋವಿಡ್ 19 ಸಂದರ್ಭದಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ಕಠಿಣವಾದ ನಿಯಮಾವಳಿಗಳಿದ್ದರಿಂದ ಹೊರ ಹೋಗಿ ಅಭ್ಯಾಸ ಮಾಡಲು ಸಾಧ್ಯವಾಗಿಲ್ಲ. ಜೊತೆಗೆ ಸ್ಟೈನ್ ಯುವ ಆಟಗಾರನಲ್ಲ, ಆತ ಈಗಾಗಲೇ ಸಾಕಷ್ಟು ಗಾಯಗಳಿಂದ ನಲುಗಿದ್ದಾರೆ. ಹಾಗಾಗಿ ಅವರಿಗೆ ಐಪಿಎಲ್ಗೂ ಮುನ್ನ ಕೆಲವು ಕ್ರಿಕೆಟ್ ಪಂದ್ಯಗಳನ್ನಾಡುವ ಅವಶ್ಯಕತೆಯಿತ್ತು. ಆದರೆ, ಅದು ಸಾಧ್ಯವಾಗದ ಕಾರಣ ಅವರ ಬೌಲಿಂಗ್ ಮೊನಚು ಕಳೆದುಕೊಂಡಿದೆ, ಇದಕ್ಕೆಲ್ಲ ಕಾರಣ ಕೋವಿಡ್ " ಫ್ಯಾನಿ ಡಿ ವಿಲಿಯರ್ಸ್ ತಿಳಿಸಿದ್ದಾರೆ.
ವೇಗದ ಬೌಲರ್ ಸಾಕಷ್ಟು ಕ್ರಿಕೆಟ್ ಆಡದಿದ್ದರೆ, ಟಿ-20 ಕ್ರಿಕೆಟ್ನಲ್ಲಿ ಅಗತ್ಯವಾಗಿ ಬೇಕಾಗಿರುವ ವೇರಿಯೇಸನ್ಸ್, ಸ್ಲೋ ಬಾಲ್ ಡಿಲಿವರಿ, ಹಾಗೂ ಯಾರ್ಕರ್ಗಳನ್ನು ಎಸೆಯಲು ಸಾಧ್ಯವಾಗುವುದಿಲ್ಲ ಎಂದು ಅವರು ಹೇಳಿದ್ದಾರೆ.
ಆದರೆ, ದಕ್ಷಿಣ ಆಫ್ರಿಕಾದವರೇ ಆದ ಕಗಿಸೋ ರಬಾಡ ಹಾಗೂ ಎನ್ರಿಚ್ ನೋಕಿಯಾ ಅದ್ಭುತ ಪ್ರದರ್ಶನ ತೋರುತ್ತಿದ್ದಾರೆ ಎಂದು ಕೇಳಿದ್ದಕ್ಕೆ, ರಬಾಡ 25 ವರ್ಷದ ಯುವ ಬೌಲರ್ ಆಗಿದ್ದಾರೆ. 34-35 ವರ್ಷವಾದರೆ ಬೌಲಿಂಗ್ ಮಾಡುವುದು ಎಷ್ಟು ಕಷ್ಟ ಎಂಬುದನ್ನು ನಾನು ಅನುಭವಿಸಿದ್ದೇನೆ. ಸ್ಟೈನ್ ಮುಂದೆ ಸಾಕಷ್ಟು ಕ್ರಿಕೆಟ್ ಇರುವುದರಿಂದ ಮುಂದಿನ ವರ್ಷದ ವೇಳೆಗೆ ಉತ್ತಮ ಪ್ರದರ್ಶನ ಕಂಡುಕೊಳ್ಳಲಿದ್ದಾರೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
