ಸಿಡ್ನಿ: ಆಸ್ಟ್ರೇಲಿಯಾ ತಂಡ ವಿರಾಟ್ ಕೊಹ್ಲಿಯೊಂದಿಗೆ ಮಾತಿನ ಚಕಮಕಿಯಲ್ಲಿ ತೊಡಗಬಾರದು. ಅದರ ಬದಲು ಟೀಂ ಇಂಡಿಯಾ ನಾಯಕನ ವಿರುದ್ಧ ಸಮತೋಲಿತ ತಂತ್ರದ ವಿಧಾನ ಅಳವಡಿಸಿಕೊಳ್ಳಬೇಕು ಎಂದು ಆಸೀಸ್ ಸೀಮಿತ ಓವರ್‌ಗಳ ನಾಯಕ ಆ್ಯರೋನ್ ಫಿಂಚ್ ಎಚ್ಚರಿಕೆ ನೀಡಿದ್ದಾರೆ.
"ಒಬ್ಬ ವ್ಯಕ್ತಿಯಾಗಿ ಕೊಹ್ಲಿ ಮೈದಾನದಲ್ಲಿ ಹೆಚ್ಚು ಆರಾಮವಾಗಿ ಇರುತ್ತಾರೆ. ಇದರಿಂದ ಆಟದ ಗತಿಯನ್ನು ಅರ್ಥಮಾಡಿಕೊಳ್ಳುತ್ತಾರೆ. ಅವರನ್ನು ಕೆಣಕುವ ಮೊದಲು ತಂಡದಲ್ಲಿ ಉತ್ತಮ ಸಮತೋಲನವಿದೆಯಾ? ಇಲ್ಲವೇ? ಎಂಬುದನ್ನು ನೋಡಬೇಕು. ಒಂದು ವೇಳೆ ಸಮತೋಲನ ಇಲ್ಲದಿದ್ದರೆ ಅವರು ಅಕ್ರಮಣಕಾರಿ ಆಗುತ್ತಾರೆ. ಒಂದು ಬಾರಿ ಅವರು ಸಿಡಿದು ನಿಂತರೆ ಎದುರಾಳಿಯ ಮೇಲೆ ಯಾವುದೇ ದಯೆ ತೋರುವುದಿಲ್ಲ" ಎಂದು ಸಲಹೆ ನೀಡಿದ್ದಾರೆ.
ಈ ಹಿಂದೆ, ಆಸ್ಟ್ರೇಲಿಯಾದ ಮಾಜಿ ನಾಯಕ ಸ್ಟೀವ್ ವಾ ಅವರು ಕೊಹ್ಲಿಯನ್ನು ಸ್ಲೆಡ್ಜ್ ಮಾಡುವುದರಿಂದ ದೂರವಿರಬೇಕು ಎಂದು ಎಚ್ಚರಿಕೆ ನೀಡಿದ್ದರು. ಏಕೆಂದರೆ ಇದು ವಿರಾಟ್ ಕೊಹ್ಲಿಯನ್ನು ಉತ್ತಮ ಪ್ರದರ್ಶನ ನೀಡಲು ಪ್ರೇರೇಪಿಸುತ್ತದೆ ಎಂದಿದ್ದಾರೆ.
ಸ್ಲೆಡ್ಜಿಂಗ್ ವಿರಾಟ್ ಕೊಹ್ಲಿಯನ್ನು ಚಿಂತೆಗೀಡುಮಾಡುವುದಿಲ್ಲ. ಇದು ಶ್ರೇಷ್ಠ ಆಟಗಾರರ ವಿರುದ್ಧ ಕೆಲಸ ಮಾಡುವುದಿಲ್ಲ. ಯಾವುದೇ ಹೆಚ್ಚುವರಿ ಪ್ರೇರಣೆ ಅವರನ್ನು ಮತ್ತಷ್ಟು ರನ್ಗಳಿಸಲು ಪ್ರೇರೇಪಿಸುತ್ತದೆ ಎಂದು ಭಾವಿಸುತ್ತೇನೆ. ಆದ್ದರಿಂದ, ನೀವು ಕೊಹ್ಲಿಯನ್ನು ಕೆಣಕದಿರುವುದು ಉತ್ತಮ ಎಂದು ಸ್ಟೀವಾ ಈ ಹಿಂದೆ ಹೇಳಿದ್ದರು.
