ಮ್ಯಾಂಚೆಸ್ಟರ್: ಆಸ್ಟ್ರೇಲಿಯಾ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ ಅಲೆಕ್ಸ್ ಕ್ಯಾರಿ(106) ಹಾಗೂ ಗ್ಲೇನ್ ಮ್ಯಾಕ್ಸ್ವೆಲ್(108)ಸಮಯೋಚಿತ ಬ್ಯಾಟಿಂಗ್ ನೆರವಿನಿಂದ ವಿಶ್ವ ಚಾಂಪಿಯನ್ ಇಂಗ್ಲೆಂಡ್ ಮೇಲೆ ಸವಾರಿ ನಡೆಸಿದ ಕಾಂಗರೂ ಪಡೆ ಮೂರು ಏಕದಿನ ಪಂದ್ಯಗಳ ಸರಣಿಯನ್ನ 2-1 ಅಂತರದಿಂದ ತನ್ನದಾಗಿಸಿಕೊಂಡಿದೆ.
ಎಮಿರೇಟ್ಟ್ ಓಲ್ಡ್ ಟ್ರಾಫರ್ಡ್ ಕ್ರೀಡಾಂಗಣದಲ್ಲಿ ನಡೆದ ಮೂರನೇ ಏಕದಿನ ಫೈನಲ್ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಇಂಗ್ಲೆಂಡ್ ತಂಡ ಆರಂಭಿಕ ಆಘಾತದ ನಡುವೆ ಕೂಡ ಬ್ಯಾರಿಸ್ಟೋ 112ರನ್, ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ಗಳಾದ ಬಿಲ್ಲಿಂಗ್ಸ್(57) ಹಾಗೂ ಕ್ರೀಸ್ ವೋಕ್ಸ್(53)ರನ್ಗಳ ಸಹಾಯದಿಂದ ನಿಗದಿತ 50 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು ಸ್ಪರ್ಧಾತ್ಮಕ 302ರನ್ಗಳಿಕೆ ಮಾಡಿತು.
ಆರಂಭಿಕರಾಗಿ ಕಣಕ್ಕಿಳಿದ ರಾಯ್(0) ಹಾಗೂ ರೂಟ್(0) ಖಾತೆ ತೆರೆಯದೇ ಪೆವಿಲಿಯನ್ ಸೇರಿಕೊಂಡರು. ಆಸ್ಟ್ರೇಲಿಯಾ ಪರ ಸ್ಟಾರ್ಕ್, ಜಂಪಾ ತಲಾ 3ವಿಕೆಟ್ ಪಡೆದರೆ ಕುಮ್ಮಿನ್ಸ್ 1ವಿಕೆಟ್ ಪಡೆದುಕೊಂಡರು.
303ರನ್ಗಳ ಗುರಿ ಬೆನ್ನತ್ತಿದ್ದ ಆಸ್ಟ್ರೇಲಿಯಾ ತಂಡ 73ರನ್ಗಳಿಕೆ ಮಾಡುವಷ್ಟರಲ್ಲಿ ಆರಂಭಿಕ 5 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕುವುದರ ಜೊತೆಗೆ ಸರಣಿ ಕೈಚೆಲ್ಲುವ ಹಂತಕ್ಕೆ ಬಂದು ನಿಂತಿತ್ತು. ಆರಂಭದಲ್ಲೇ ವಾರ್ನರ್(24), ಫಿಂಚ್(12), ಸ್ಟೋನಿಸ್(4),ಮಾರ್ನೂಸ್(20) ಹಾಗೂ ಮಿಚಲ್ ಮಾರ್ಸ್(2)ರನ್ಗಳಿಕೆ ಮಾಡಿ ನಿರಾಸೆ ಮೂಡಿಸಿದರು.
ಈ ವೇಳೆ ಒಂದಾದ ವಿಕೆಟ್ ಕೀಪರ್ ಅಲೆಕ್ಸ್ ಕ್ಯಾರಿ ಹಾಗೂ ಆಲ್ರೌಂಡರ್ ಗ್ಲೇನ್ ಮ್ಯಾಕ್ಸ್ವೆಲ್ ತಂಡದ ಜವಾಬ್ದಾರಿ ಹೊತ್ತುಕೊಂಡು ಸಮಯೋಚಿತ ಬ್ಯಾಟಿಂಗ್ ನಡೆಸಿದರು. 212ರನ್ಗಳ ಜೊತೆಯಾಟ ಆಡುವ ಮೂಲಕ ಇಬ್ಬರು ಶತಕ ಸಿಡಿಸಿ ಮಿಂಚಿದರು. ಕ್ಯಾರಿ (106) ಮ್ಯಾಕ್ಸ್ವೆಲ್(108)ರನ್ಗಳಿಕೆ ಮಾಡಿ ತಂಡವನ್ನ ಗೆಲುವಿನ ದಡಕ್ಕೆ ತಂದು ನಿಲ್ಲಿಸಿದರು.
ಇವರ ವಿಕೆಟ್ ಪತನಗೊಳ್ಳುತ್ತಿದ್ದಂತೆ ಕಮ್ಮಿನ್ಸ್ ಅಜೇಯ 4ರನ್ಹಾಗೂ ಸ್ಟಾರ್ಕ್ 11ರನ್ಗಳಿಸಿ ತಂಡವನ್ನ ಗೆಲುವಿನ ದಡ ಸೇರಿಸಿದರು. ತಂಡ ಕೊನೆಯದಾಗಿ 49.4 ಓವರ್ಗಳಲ್ಲಿ 7ವಿಕೆಟ್ನಷ್ಟಕ್ಕೆ 305ರನ್ಗಳಿಕೆ ಮಾಡಿ ಜಯದ ನಗೆ ಬೀರಿತು. ಜತೆಗೆ ಸರಣಿಯಲ್ಲಿ 2-1 ಅಂತರದ ಗೆಲುವು ದಾಖಲು ಮಾಡಿತು.
ಸಂಕ್ಷಿಪ್ತ ವಿವರ
ಇಂಗ್ಲೆಂಡ್: 302/7, ಬ್ಯಾರಿಸ್ಟೋ 112ರನ್
ಆಸ್ಟ್ರೇಲಿಯಾ 305/7, ಕ್ಯಾರಿ 106ರನ್, ಮ್ಯಾಕ್ಸ್ವೆಲ್ 108ರನ್
2-1 ಅಂತರದಲ್ಲಿ ಸರಣಿ ಗೆದ್ದ ಆಸ್ಟ್ರೇಲಿಯಾ
