ಶಾರ್ಜಾ: ಕೆಕೆಆರ್ ವಿರುದ್ಧದ ಪಂದ್ಯದಲ್ಲಿ ಅಬ್ಬರಿಸಿದ ಎಬಿ ಡಿ ವಿಲಿಯರ್ಸ್ ಆರ್ಸಿಬಿ ಜಯ ಸಾಧಿಸಲು ನೆರವಾಗಿದ್ದರು. ಈ ಬಗ್ಗೆ ಮಾತನಾಡಿರುವ ಕೋಲ್ಕತ್ತಾ ತಂಡದ ನಾಯಕ ದಿನೇಶ್ ಕಾರ್ತಿಕ್, ಎರಡು ತಂಡಗಳ ಬ್ಯಾಟ್ಸ್ಮನ್ಗಳಿಗಿಂತ ಎಬಿಡಿ ಆಟ ವಿಭಿನ್ನವಾಗಿತ್ತು. ಅವರ ಆಟದಿಂದಲೇ ಆರ್ಸಿಬಿಗೆ ಗೆಲುವು ದೊರೆಯಿತೆಂದು ಅಭಿಪ್ರಾಯಪಟ್ಟಿದ್ದಾರೆ.
ವಿಲಿಯರ್ಸ್ ಸೋಮವಾರ ನಡೆದ ಪಂದ್ಯದಲ್ಲಿ 33 ಎಸೆತಗಳಲ್ಲಿ 6 ಸಿಕ್ಸರ್, 5 ಬೌಂಡರಿ ಸಹಿತ 73 ರನ್ ಗಳಿಸಿದ್ದರು. ಅವರ ಬ್ಯಾಟಿಂಗ್ ಅಬ್ಬರ ಆರ್ಸಿಬಿ 82 ರನ್ಗಳ ಬೃಹತ್ ಅಂತರದ ಜಯ ಸಾಧಿಸಲು ನೆರವಾಗಿತ್ತು.
ಅವರು(ಎಬಿಡಿ) ವಿಶ್ವಶ್ರೇಷ್ಠ ಬ್ಯಾಟ್ಸ್ಮನ್ ಮತ್ತು ಸಿಡಿದು ನಿಂತರೆ ಅವರನ್ನು ನಿಲ್ಲಿಸುವುದು ಕಷ್ಟ. ನಿನ್ನೆಯ ಪಂದ್ಯ ಅದಕ್ಕೆ ಸಾಕ್ಷಿ. ನಿನ್ನೆಯ ಪಂದ್ಯದಲ್ಲಿ ಅವರ ಇನ್ನಿಂಗ್ಸ್ ಎರಡು ತಂಡಗಳು ಬ್ಯಾಟ್ಸ್ಮನ್ಗಳಿಗಿಂತ ಬಹಳ ವಿಭಿನ್ನವಾಗಿತ್ತು ಎಂದು ಕಾರ್ತಿಕ್ ಪಂದ್ಯದ ನಂತರ ನಡೆದ ಮಾಧ್ಯಮಗೋಷ್ಟಿಯಲ್ಲಿ ತಿಳಿಸಿದ್ದಾರೆ.
195 ರನ್ಗಳ ಮೊತ್ತವನ್ನು ಬೆನ್ನಟ್ಟಿದ ಕೆಕೆಆರ್ ಕೇವಲ 112 ರನ್ಗಳನ್ನಷ್ಟೇ ದಾಖಲಿಸಲು ಶಕ್ತವಾಯಿತು. ಕ್ರಿಸ್ ಮೋರಿಸ್ ಹಾಗೂ ವಾಷಿಂಗ್ಟನ್ ಸುಂದರ್ 2 ವಿಕೆಟ್ ಪಡೆದು ಆರ್ಸಿಬಿ ಗೆಲುವಿಗೆ ನೆರವಾಗಿದ್ದರು.
ಬ್ಯಾಟಿಂಗ್ ಪ್ರದರ್ಶನದ ಬಗ್ಗೆ ಮಾತನಾಡಿರುವ ಕಾರ್ತಿಕ್, ತಂಡದ ಬ್ಯಾಟಿಂಗ್ ವಿಭಾಗ ಮತ್ತಷ್ಟು ಚೇತರಿಕೆ ಕಾಣಬೇಕು ಎಂದು ಹೇಳಿದರು.
ನಾವೆಲ್ಲ ಒಂದು ಕಡೆ ಕುಳಿತುಕೊಂಡು, ಪಂದ್ಯದಲ್ಲಿ ಮಾಡುತ್ತಿರುವ ತಪ್ಪುಗಳನ್ನು ತಿದ್ದಿಕೊಳ್ಳುವ ಅಗತ್ಯವಿದೆ. ಬ್ಯಾಟಿಂಗ್ ವಿಭಾಗದಲ್ಲಿ ನಾವು ಹೆಚ್ಚಿನ ಕೆಲಸ ಮಾಡಬೇಕು ಹಾಗೂ ಮುಂದಿನ ಪಂದ್ಯಗಳಿಗೆ ಸುಧಾರಣೆಯಾಗಬೇಕು. ಮುಂದಿನ ಪಂದ್ಯಕ್ಕೆ ನಮಗೆ ಇನ್ನೂ ಮೂರು ದಿನಗಳ ಕಾಲ ಸಮಯವಿದ್ದು, ಫ್ರೆಶ್‌ ಆಗಿ ಆರಂಭಿಸುತ್ತೇವೆ ಎಂದು ಕಾರ್ತಿಕ್ ತಿಳಿಸಿದರು.
