ದುಬೈ: 5 ತಿಂಗಳ ನಂತರ ನೆಟ್ಸ್ನಲ್ಲಿ ಅಭ್ಯಾಸ ಮಾಡುವಾಗ ಸ್ವಲ್ಪ ಭಯವಿತ್ತು, ಆದರೆ ಐಪಿಎಲ್ಗೂ ಮುನ್ನ ನಡೆದ ತಮ್ಮ ಮೊದಲ ತರಬೇತಿ ಸೆಷನ್ ಅತ್ಯುತ್ತಮ ಅನುಭವ ನೀಡಿದೆ ಎಂದು ಭಾರತ ಹಾಗೂ ಆರ್ಸಿಬಿ ತಂಡದ ನಾಯಕ ವಿರಾಟ್ ಕೊಹ್ಲಿ ತಿಳಿಸಿದ್ದಾರೆ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಕ್ವಾರಂಟೈನ್ ಬಳಿಕೆ ತಮ್ಮ ಮೊದಲ ಬಾರಿಗೆ ತರಬೇತಿ ನಡೆಸಿದೆ. ನೆಟ್ ಸೆಷನ್ನಲ್ಲಿ ದಕ್ಷಿಣ ಆಫ್ರಿಕಾದ ಲೆಜೆಂಡ್ ಡೇಲ್ ಸ್ಟೈನ್ ಹಾಗೂ ಆರ್ಸಿಬಿ ಡೈರೆಕ್ಟರ್ ಮೈಕ್ ಹೆಸನ್ ಕೂಡ ಪಾಲ್ಗೊಂಡಿದ್ದರು.
ನೆಟ್ ಸೆಷನ್ ನಂತರ ಮಾತನಾಡಿರುವ ಕೊಹ್ಲಿ " ಪ್ರಾಮಾಣಿಕವಾಗಿ ಹೇಳುತ್ತೇನೆ, ಈ ನೆಟ್ ಸೆಷನ್ ನಿರೀಕ್ಷೆಗಿಂತ ಚೆನ್ನಾಗಿ ಸಾಗಿದೆ. ನಾನು 5 ತಿಂಗಳಿನಿಂದ ಬ್ಯಾಟಿಂಗ್ ಮಾಡಿರದ ಕಾರಣ ಸ್ವಲ್ಪ ಭಯವಿತ್ತು. ಬ್ಯಾಟ್ ಹಿಡಿದು 5 ತಿಂಗಳಾಗಿತ್ತು. ಆದ್ರೆ ಇದು ನಾವು ನಿರೀಕ್ಷೆ ಮಾಡಿದ್ದಕ್ಕಿಂತ ಚೆನ್ನಾಗಿ ಬಂದಿದೆ" ಎಂದು ಆರ್ಸಿಬಿ ವೆಬ್ಸೈಟ್ಗೆ ಕೊಹ್ಲಿ ತಿಳಿಸಿದ್ದಾರೆ.
ಕಳೆದ ವರ್ಷದ ಆರ್ಸಿಬಿ ತಂಡದ ಅತಿ ಹೆಚ್ಚು ರನ್ ಗಳಿಸಿರುವ ಬ್ಯಾಟ್ಸ್ಮನ್ ಆಗಿರುವ ಕೊಹ್ಲಿ, ಲಾಕ್ ಡೌನ್ ಸಮಯದಲ್ಲಿ ತಮ್ಮ ದೇಹದ ಫಿಟ್ನೆಸ್ ಕಾಪಾಡಿಕೊಂಡಿದ್ದರಿಂದ ಈಗ ನೆಟ್ ಸೆಷನ್ನಲ್ಲಿ ಉತ್ತಮವಾಗಿ ಪ್ರದರ್ಶನ ನೀಡಲು ನೆರವಾಗಿದೆ ಎಂದಿದ್ದಾರೆ.
" ಲಾಕ್‌ಡೌನ್ ಸಮಯದಲ್ಲಿ ನಾನು ಸ್ವಲ್ಪ ತರಬೇತಿ ಪಡೆದಿದ್ದೇನೆ, ಆದ್ದರಿಂದ ನಾನು ಸಾಕಷ್ಟು ಫಿಟ್ನೆಸ್ ಹೊಂದಿದ್ದೇನೆ. ಇದು ನನಗೆ ಸಹಾಯ ಮಾಡುತ್ತಿದೆ. ಏಕೆಂದರೆ ದೇಹವು ಹಗುರವಾಗಿದ್ದರೆ ನೀವು ಉತ್ತಮವಾಗಿ ಪ್ರತಿಕ್ರಿಯಿಸುತ್ತೀರಾ, ನಾನು ಚೆಂಡಿನ ಮೇಲೆ ಹೆಚ್ಚು ಸಮಯವನ್ನು ಹೊಂದಿದ್ದೇನೆ ಎಂದು ಭಾವಿಸುತ್ತೇನೆ. ಅದು ದೊಡ್ಡ ಪ್ಲಸ್ ಪಾಯಿಂಟ್ " ಎಂದು ಕೊಹ್ಲಿ ತಿಳಿಸಿದ್ದಾರೆ.
ದೇಹ ಫಿಟ್ ಇಲ್ಲದಿದ್ದರೆ ಇಷ್ಟು ಹೆಚ್ಚು ಸಮಯ ನೆಟ್ನಲ್ಲಿ ಅಭ್ಯಾಸ ಮಾಡಲು ಸಾಧ್ಯವಾಗುತ್ತಿರಲಿಲ್ಲ. ಆದರೆ ತರಬೇತಿ ನಾನು ನಿರೀಕ್ಷೆ ಮಾಡಿದ್ದಕ್ಕಿಂತ ಉತ್ತಮವಾಗಿ ಸಾಗಿದೆ ಎಂದಿದ್ದಾರೆ.
ಸೆಪ್ಟೆಂಬರ್ 19ರಿಂದ ಯುಎಇಯಲ್ಲಿ 13ನೇ ಐಪಿಎಲ್ ಟೂರ್ನಿ ಆರಂಭವಾಗಲಿದ್ದು ಫೈನಲ್ ಪಂದ್ಯ ನವೆಂಬರ್ 10ರಂದು ನಡೆಯಲಿದೆ.
