ಕ್ರೈಸ್ಟ್ ಚರ್ಚ್: ನ್ಯೂಜಿಲ್ಯಾಂಡ್ ವಿರುದ್ಧ ಸೋಲಿನಲ್ಲೂ ಮಿಂಚಿದ್ದ ಏಕೈಕ ಬೌಲರ್ ಇಶಾಂತ್ ಶರ್ಮಾ ಗಾಯದಿಂದ ಚೇತರಿಸಿಕೊಂಡು ಬಂದ ಪಂದ್ಯದಲ್ಲೇ 5 ವಿಕೆಟ್ ಪಡೆದಿದ್ದಕ್ಕೆ ಆಸೀಸ್ ಲೆಜೆಂಡ್ ಬೌಲರ್ ಗ್ಲೆನ್ ಮೆಕ್ಗ್ರಾತ್ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
ನ್ಯೂಜಿಲ್ಯಾಂಡ್ ವಿರುದ್ಧ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತೀಯ ಬೌಲರ್ಗಳು ಉತ್ತಮ ಪ್ರದರ್ಶನ ತೋರುವಲ್ಲಿ ವಿಫಲರಾದರೂ ಇಶಾಂತ್ ಶರ್ಮಾ ಮಾತ್ರ ಅದ್ಭುತ ಪ್ರದರ್ಶನ ತೋರಿ 5 ವಿಕೆಟ್ ಪಡೆದಿದ್ದರು. ಆದರೆ, ಅವರ ಏಕಾಂಗಿ ಪ್ರದರ್ಶನ ಕೊಹ್ಲಿ ಪಡೆಯ ಸೋಲನ್ನು ತಪ್ಪಿಸಲಾಗಿರಲಿಲ್ಲ. ಬ್ಯಾಟಿಂಗ್ ವೈಫಲ್ಯದ ಕಾರಣ 10 ವಿಕೆಟ್ಗಳ ಸೋಲು ಕಾಣಬೇಕಾಯಿತು. ಆದರೆ, ಭಾರತೀಯ ಹಿರಿಯ ಬೌಲರ್ ಬಗ್ಗೆ ಆಸೀಸ್ನ ಲೆಜೆಂಡ್ ಮೆಕ್ಗ್ರಾತ್ ಮಾತ್ರ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
"ಇಶಾಂತ್ಗೆ ತುಂಬಾ ಅನುಭವವಿದೆ. ಅವರು ಕಳೆದೆರಡು ವರ್ಷಗಳಿಂದ ಮರಳಿ ಮತ್ತೆ ಕ್ರಿಕೆಟ್ನಲ್ಲಿ ಸಕ್ರಿಯವಾಗಿ ಉಳಿದಿರುವುದು ನಿಜಕ್ಕೂ ಪ್ರಭಾವಶಾಲಿ ಆಂಶವಾಗಿದೆ. ನಾನು ಆತನ ವೃತ್ತಿ ಜೀವನ ಯಾವಾಗಲೋ ಅಂತ್ಯವಾಗಿದೆ ಅಂದುಕೊಂಡಿದ್ದೆ. ಆದರೆ, ತನ್ನನ್ನು ತಾನು ಪುನರ್ಶೋಧಿಸಿಕೊಂಡು ಅದ್ಭುತ ಬೌಲಿಂಗ್ ಮಾಡುತ್ತಿದ್ದಾರೆ" ಎಂದು ಮೆಕ್ಗ್ರಾತ್ ಭಾರತೀಯ ಬೌಲರ್ ಬಗ್ಗೆ ಗುಣಗಾನ ಮಾಡಿದ್ದಾರೆ.
ಆಶ್ಚರ್ಯವೆಂದರೆ ಮೆಕ್ಗ್ರಾತ್ ಭಾರತ ತಂಡದ ಬೌಲಿಂಗ್ ಪ್ರದರ್ಶನ ಮೊದಲ ಟೆಸ್ಟ್ನಲ್ಲಿ ಉತ್ತಮವಾಗಿತ್ತು ಎಂದಿದ್ದಾರೆ. ಆದರೆ, ಇಶಾಂತ್ ಜೊತೆಗೆ ಆತನ ಸಹಬೌಲರ್ಗಳಾದ ಜಸ್ಪ್ರಿತ್ ಬುಮ್ರಾ ಹಾಗೂ ಮೊಹಮ್ಮದ್ ಶಮಿ ಕೇವಲ ಒಂದು ವಿಕೆಟ್ ಪಡೆದು ನೀರಸ ಪ್ರದರ್ಶನ ತೋರಿದ್ದದರು. ಆದರೂ ಮೆಕ್ಗ್ರಾತ್ ಭಾರತದ ಬೌಲಿಂಗ್ ಅನ್ನು ಮಾತ್ರ ಬಿಟ್ಟುಕೊಟ್ಟಿಲ್ಲ.
ನಾನು ಈಗಲೂ ಭಾರತದ ಬೌಲಿಂಗ್ ಕ್ರಮಾಂಕದ ಬಗ್ಗೆ ಸಂಪೂರ್ಣ ಭರವಸೆಯಿಟ್ಟಿದ್ದೇನೆ. ಕೆಲವರು ಗಾಯಗಳಿಂದ ಚೇತರಿಸಿಕೊಂಡು ಬಂದಿದ್ದಾರೆ. ಶರ್ಮಾ ಗಾಯದಿಂದ ಬಂದು 5 ವಿಕೆಟ್ ಪಡೆದಿದ್ದಾರೆ. ಬುಮ್ರಾ ಕೂಡ ಒಂದೆರೆಡು ಗಾಯಗಳಿಗೆ ತುತ್ತಾಗಿ ಹಿಂತಿರುಗಿ ಬಂದಿದ್ದಾರೆ. ಹಾಗಾಗಿ ಭಾರತದ ಬೌಲಿಂಗ್ ಈಗಲೂ ವಿಶ್ವಶ್ರೇಷ್ಠ ಬೌಲಿಂಗ್ ಪಡೆಯಾಗಿದೆ. ಅದರಲ್ಲಿ ಯಾವುದೇ ಅನುಮಾನವಿಲ್ಲ ಎಂದು ವಿಶ್ವಕಂಡ ಶ್ರೇಷ್ಠ ವೇಗದ ಬೌಲರ್ ಅಭಿಪ್ರಾಯಪಟ್ಟಿದ್ದಾರೆ.
