ದುಬೈ: ಗಾಯದ ಕಾರಣದಿಂದ 13ನೇ ಐಪಿಎಲ್ನಲ್ಲಿ ಕೇವಲ ಒಂದೇ ಒಂದು ಪಂದ್ಯವನ್ನಾಡಿರುವ ಇಶಾಂತ್ ಶರ್ಮಾರ ಸ್ಥಾನಕ್ಕೆ ಬೇರೆ ಆಟಗಾರನನ್ನು ಆಯ್ಕೆ ಮಾಡಿಕೊಳ್ಳಲು ಅವಕಾಶ ಕೋರಿ ಡೆಲ್ಲಿ ತಂಡದ ಐಪಿಎಲ್ ಆಡಳಿತ ಮಂಡಳಿಗೆ ಪತ್ರ ಬರೆದಿದೆ ಎಂದು ತಿಳಿದುಬಂದಿದೆ.
ಎಎನ್ಐ ವರದಿಯ ಪ್ರಕಾರ, ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿ ಇಶಾಂತ್ ಶರ್ಮಾರ ಬದಲಿ ಆಟಗಾರನನ್ನ ಎದುರು ನೋಡುತ್ತಿದೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಡೆಲ್ಲಿ ಅಧಿಕಾರಿಯೊಬ್ಬರು, ಹೌದು.. ನಾವು ಇಶಾಂತ್ ಜಾಗಕ್ಕೆ ಬೇರೊಬ್ಬ ಆಟಗಾರನನ್ನು ಆಯ್ಕೆ ಮಾಡಿಕೊಳ್ಳುವುದಕ್ಕಾಗಿ ಐಪಿಎಲ್ ಆಡಳಿತ ಮಂಡಳಿಗೆ ಪತ್ರದ ಮೂಲಕ ಮನವಿ ಸಲ್ಲಿಸಿದ್ದೇವೆ ಎಂದು ಹೇಳಿದ್ದಾರೆ.
ಡೆಲ್ಲಿ ತಂಡದಲ್ಲಿ ಇಶಾಂತ್ರೊಂದಿಗೆ ಶುರುವಾದ ಗಾಯ, ನಂತರ ಅಮಿತ್ ಮಿಶ್ರಾ , ರವಿ ಚಂದ್ರನ್ ಆಶ್ವಿನ್ ಹಾಗೂ ರಿಷಭ್ ಪಂತ್ ವರೆಗೆ ಬಂದು ನಿಂತಿದೆ. ಇದರಲ್ಲಿ ಅಶ್ವಿನ್ ಚೇತರಿಸಿಕೊಂಡಿದ್ದರೆ, ಪಂತ್ ಒಂದು ವಾರ ವಿಶ್ರಾಂತಿಯಲ್ಲಿರಲಿದ್ದಾರೆ. ಇನ್ನು ಅಮಿತ್ ಮಿಶ್ರಾ ಐಪಿಎಲ್ನಿಂದಲೇ ಹೊರಬಿದ್ದಿದ್ದಾರೆ.
ಡೆಲ್ಲಿ ತಂಡ ಆಡಿರುವ 7 ಪಂದ್ಯಗಳಲ್ಲಿ 5 ಜಯ ಹಾಗೂ 2 ಸೋಲುಗಳೊಂದಿಗೆ ಅಂಕಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದೆ.
