ಮೆಲ್ಬೋರ್ನ್: ಕಳೆದ ಎರಡು ದಿನಗಳಿಂದ ಆಸ್ಟ್ರೇಲಿಯಾ ಕ್ರಿಕೆಟ್ ಸಂಸ್ಥೆಯಲ್ಲಿ ಅಚ್ಚರಿಯ ಬೆಳವಣಿಗೆ ಕಂಡುಬರುತ್ತಿದೆ. ಆರ್ಥಿಕ ಪರಿಸ್ಥಿತಿ ನಿರ್ವಹಿಸಲಾಗದೆ ಸಿಇಒ ಕೆವಿನ್ ರಾಬರ್ಟ್ ರಾಜಿಮೆ ನೀಡಿದರೆ, ನಿಕ್ ಹಾಕ್ಲೆರನ್ನು ಹಂಗಾಮಿ ಸಿಇಒ ಆಗಿ ನೇಮಕ ಮಾಡಲಾಗಿತ್ತು. ಇದೀಗ ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಆ್ಯಂಡ್ರ್ಯೂ ಸ್ಟ್ರಾಸ್ ಹೆಸರು ಕೇಳಿ ಬರುತ್ತಿದೆ.
ಕೊರೊನಾ ವೈರಸ್ನಿಂದ ಕಳೆದ ಮೂರು ತಿಂಗಳನಿಂದ ಯಾವುದೇ ಕ್ರಿಕೆಟ್ ಟೂರ್ನಿಯಿಲ್ಲದೆ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿತ್ತು. ಇದರಿಂದ ಅಪಾರ ನಷ್ಟವನ್ನು ಎದುರಿಸಿದ್ದ ಕ್ರಿಕೆಟ್ ಆಸ್ಟ್ರೇಲಿಯಾ ನಷ್ಟಪರಿಹಾರವಾಗಿ ಸಿಬ್ಬಂದಿ ಹಾಗೂ ಆಟಗಾರರ ವೃತನದ ಶೇ 20ರಷ್ಟನ್ನು ಕಡಿತಗೊಳಿಸಿತ್ತು. ರಾಜ್ಯ ಸಂಸ್ಥೆಗಳಿಗೆ ಅನುದಾನ ಕಡಿತ ಮಾಡಿದರು. ಆಟಗಾರರ ವೇತನ ಪರಿಷ್ಕರಿಸಲು ಮುಂದಾಗಿತ್ತು. ಈ ಕ್ರಮಗಳಿಂದ ತೀವ್ರ ಟೀಕೆಗಳಿಗೆ ಗುರಿಯಾಗಿದ್ದವು. ಅದರಿಂದಾಗಿಯೇ ಕೆವಿನ್ ರಾಬರ್ಟ್ ತಮ್ಮ ಸಿಇಒ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.
ಸಿಇಒ ಸ್ಥಾನಕ್ಕರೆ ಕೆವಿನ್ ರಾಬರ್ಟ್ಸ್‌ ರಾಜೀನಾಮೆ ನೀಡುತ್ತಿದ್ದಂತೆ ಹಂಗಾಮಿ ಸಿಇಒ ಆಗಿ 2020ರ ಟಿ20 ವಿಶ್ವಕಪ್ ಸಿಇಒ ಆಗಿರುವ ನಿಕ್ ಹಾಕ್ಲೆ ಅಧಿಕಾರ ವಹಿಸಿಕೊಂಡಿದ್ದರು.
ಮಂಡಳಿ ಆರ್ಥಿಕ ಸಂಕಷ್ಟಕ್ಕೆ ಒಳಗಾಗಿದೆ. ಆದರೆ ಕೆಲವೇ ದಿನಗಳಲ್ಲಿ ಇದರಿಂದ ಹೊರಬರಲಿದ್ದೇವೆ. ಸಂಸ್ಥೆಗೆ ಹೊಸ ಸಿಇಒ ನೇಮಕ ಮಾಡುವುದು ಮಂಡಳಿಯ ಪ್ರಮುಖ ಕಾರ್ಯವಾಗಿದೆ. ಈ ಹುದ್ದೆಗಾಗಿ ದೇಶ ಮತ್ತು ವಿದೇಶಗಳಲ್ಲಿ ಸೂಕ್ತ ಅಭ್ಯರ್ಥಿಯನ್ನು ಹುಡುಕುತ್ತಿದ್ದೇವೆ ಎಂದು ಸಿಎ ಮುಖ್ಯಸ್ಥ ಇಯರ್ಲ್ ಎಡ್ಡಿಂಗ್ಸ್ ಈಚೆಗೆ ಹೇಳಿದ್ದರು.
ಇದೀಗ ಸಿಇಒ ಹುದ್ದೆಗೆ ನೇಮಕ ಕೋರಿ ಅರ್ಜಿ ಸಲ್ಲಿಸುವಂತೆ ಇಂಗ್ಲೆಂಡ್ ತಂಡ ದ ಮಾಜಿ ನಾಯಕ ಆ್ಯಂಡ್ರ್ಯೂ ಸ್ಟ್ರಾಸ್ ಅವರಿಗೆ ಕ್ರಿಕೆಟ್ ಆಸ್ಟ್ರೇಲಿಯಾ ಕೇಳಿಕೊಂಡಿದೆ ಎಂದು ಪತ್ರಿಕೆಯೊಂದು ವರದಿ ಮಾಡಿದೆ. ಸ್ಟ್ರಾಸ್ ಅವರು ಇಂಗ್ಲೆಂಡ್ ಮತ್ತು ವೇಲ್ಸ್‌ ಕ್ರಿಕೆಟ್ ಮಂಡಳಿಯ ನಿರ್ಧೇಶಕರಾಗಿ 2015 ರಿಂದ 2018ರವರೆಗೆ ಕಾರ್ಯನಿರ್ವಹಿಸಿದ್ದರು.
43 ವರ್ಷದ ಸ್ಟ್ರಾಸ್ 100 ಟೆಸ್ಟ್ ಪಂದ್ಯಗಳಿಂದ 7037 ರನ್ ಹಾಗೂ 127 ಏಕದಿನ ಪಂದ್ಯಗಳಿಂದ 4205ರನ್ ಗಳಿಸಿದ್ದಾರೆ. ಕ್ರಿಕೆಟ್ ಆಟಗಾರನಾಗಿ ಹಾಗೂ ಅಧಿಕಾರಿಯಾಗಿ ಅಪಾರ ಅನುಭವ ಹೊಂದಿರುವ ಸ್ಟ್ರಾಸ್ ಕ್ರಿಕೆಟ್ ಆಸ್ಟ್ರೇಲಿಯಾದ ಸಿಇಒ ಆಗಿ ನೇಮಕವಾಗುವ ಸಾಧ್ಯತೆಯಿದ ಎನ್ನಲಾಗುತ್ತಿದೆ.
