ಮೆಲ್ಬೋರ್ನ್ : ಆಸ್ಟ್ರೇಲಿಯಾ ಬೌಲಿಂಗ್ ದಾಳಿಯನ್ನು ಅಂದಾಜಿಸುವಲ್ಲಿ ಮತ್ತೊಮ್ಮೆ ವಿಫಲರಾಗಿರುವ ಇಂಗ್ಲೆಂಡ್ ತಂಡ ಆ್ಯಶಸ್ನ ಮೂರನೇ ಟೆಸ್ಟ್ ಪಂದ್ಯದ ಮೊದಲ ದಿನ ತನ್ನ ಮೊದಲ ಇನ್ನಿಂಗ್ಸ್ನಲ್ಲಿ ಕೇವಲ 185ರನ್ಗಳಿಗೆ ಆಲೌಟ್ ಆಗಿದೆ.
ಮೊದಲ ಟೆಸ್ಟ್ನಲ್ಲಿ 9 ವಿಕೆಟ್ ಮತ್ತು 2ನೇ ಟೆಸ್ಟ್ ಪಂದ್ಯದಲ್ಲಿ 275 ರನ್ಗಳಿಂದ ಸೋಲು ಕಂಡಿದ್ದ ಇಂಗ್ಲೆಂಡ್ ಮೆಲ್ಬೋರ್ನ್ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಬಾಕ್ಸಿಂಗ್ ಡೇ ಟೆಸ್ಟ್ನಲ್ಲಿ ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿಯಿತು.
ಎಂದಿನಂತೆ ಇಂಗ್ಲೆಂಡ್ ಆರಂಭಿಕರ ವೈಫಲ್ಯ ಈ ಪಂದ್ಯದಲ್ಲೂ ಮುಂದುವರಿಯಿತು. ಹಸೀಬ್ ಹಮೀಮ್ 10 ಎಸೆತಗಳನ್ನೆದುರಿಸಿ ಶೂನ್ಯ ಸಂಪಾದಿಸಿದರೆ, ಜಾಕ್ ಕ್ರಾಲೆ 12ಕ್ಕೆ ವಿಕೆಟ್ ಒಪ್ಪಿಸಿದರು. ನಂತರ ಬಂದ ಮಲನ್ ಆಟವೂ ಕೇವಲ 14 ರನ್ಗಳಿಗೆ ಮುಗಿಯಿತು. ಈ ಮೂವರನ್ನು ಆಸೀಸ್ ನಾಯಕ ಪ್ಯಾಟ್ ಕಮಿನ್ಸ್ ಪಡೆದರು.
ಒಂದು ಕಡೆ ವಿಕೆಟ್ ಬೀಳುತ್ತಿದ್ದರು ಜವಾಬ್ದಾರಿಯುತ ಬ್ಯಾಟಿಂಗ್ ಮಾಡಿದ ನಾಯಕ ರೂಟ್ 82 ಎಸೆತಗಳಲ್ಲಿ 4 ಬೌಂಡರಿ ಸಹಿತ 50 ರನ್ಗಳಿಸಿದರು. ಆದರೆ, ತಮ್ಮ ಎರಡನೇ ಸ್ಪೆಲ್ನಲ್ಲಿ ಮಿಚೆಲ್ ಸ್ಟಾರ್ಕ್ ಬೌಲಿಂಗ್ನಲ್ಲಿ ಕೀಪರ್ ಅಲೆಕ್ಸ್ ಕ್ಯಾರಿಗೆ ಕ್ಯಾಚ್ ನೀಡಿ ಔಟಾದರು. ರೂಟ್ ವಿಕೆಟ್ ಪತನದ ನಂತರ ಇಂಗ್ಲೆಂಗ್ ಪೆವಿಲಿಯನ್ ಪರೇಡ್ ನಡೆಸಿತು.
ಬೆನ್ ಸ್ಟೋಕ್ಸ್(25), ಜೋಶ್ ಬಟ್ಲರ್(3), ಮಾರ್ಕ್ ವುಡ್(5), ಬೈರ್ಸ್ಟೋವ್(35) ಜಾಕ್ ಲೀಚ್ 13) ಮತ್ತು ಒಲ್ಲಿ ರಾಬಿನ್ಸನ್(22) ರನ್ಗಳಿಸಿ ಔಟಾದರು. ಆಸೀಸ್ ಪರ ಪ್ಯಾಟ್ ಕಮಿನ್ಸ್ 36ಕ್ಕೆ3, ನೇಥನ್ ಲಿಯಾನ್ 36ಕ್ಕೆ 3, ಮಿಚೆಲ್ ಸ್ಟಾರ್ಕ್ 54ಕ್ಕೆ2, ಸ್ಕಾಟ್ ಬೋಲ್ಯಾಂಡ್ ಮತ್ತು ಕ್ಯಾಮೆರಾನ್ ಗ್ರೀನ್ ತಲಾ ಒಂದು ವಿಕೆಟ್ ಪಡೆದರು.
ಇನ್ನು 186 ರನ್ಗಳನ್ನು ಹಿಂಬಾಲಿಸಿರುವ ಆಸ್ಟ್ರೇಲಿಯಾ ಮೊದಲ ದಿನದಂತ್ಯದ ವೇಳೆ ಆರಂಭಿಕ ಡೇವಿಡ್ ವಾರ್ನರ್(38) ವಿಕೆಟ್ ಕಳೆದುಕೊಂಡು 61 ರನ್ಗಳಿಸಿದೆ. ಮಾರ್ಕಸ್ ಹ್ಯಾರೀಸ್(20) ಮತ್ತು ಲಿಯಾನ್(0) ಬ್ಯಾಟಿಂಗ್ ಕಾಯ್ದಿರಿಸಿದ್ದಾರೆ.
ಇದನ್ನೂ ಓದಿ:ಅಡಿಲೇಡ್ ಟೆಸ್ಟ್ ತಪ್ಪಿಸಿಕೊಂಡಿದ್ದಕ್ಕಾಗಿ ನಿಜಕ್ಕೂ ಕೋಪ ಬಂದಿತ್ತು: ಪ್ಯಾಟ್ ಕಮ್ಮಿನ್ಸ್
