ಮಂಗಳಗೌರಿ ಮದುವೆ ಧಾರಾವಾಹಿಯಲ್ಲಿ ರಾಜೀವನ ಪ್ರೇಯಸಿ ಸ್ನೇಹ ಆಗಿ ಅಭಿನಯಿಸುತ್ತಿರುವ ಯಶಸ್ವಿ ಸ್ವಾಮಿ ತಾವು ಬಣ್ಣದ ಲೋಕಕ್ಕೆ ಬರಬೇಕು ಎಂದು ಕನಸಲ್ಲೂ ಊಹಿಸಿರಲಿಲ್ಲ. ಆದರೆ ಆಕಸ್ಮಿಕವಾಗಿ ಬಣ್ಣದ ಲೋಕಕ್ಕೆ ಬಂದ ಚೆಲುವೆ ಈಗ ಕಿರುತೆರೆಯಲ್ಲಿ ಹೆಸರು ಮಾಡುವ ಮೂಲಕ ಧಾರಾವಾಹಿಪ್ರಿಯರಿಗೆ ಬಹಳ ಹತ್ತಿರವಾಗಿದ್ದಾರೆ.
'ರಾಜ ರಾಣಿ' ಧಾರಾವಾಹಿಯಲ್ಲಿ ನಟಿಸಿರುವ ಯಶಸ್ವಿ ನಂತರ 'ಅಸಾಧ್ಯ ಅಳಿಯಂದಿರು' ಧಾರಾವಾಹಿಯಲ್ಲಿ ಕೂಡಾ ಬಣ್ಣ ಹಚ್ಚಿದ್ದರು. ನಟನೆ ಮಾತ್ರವಲ್ಲ ನಿರೂಪಣೆಯಲ್ಲಿಯೂ ತೊಡಗಿಸಿಕೊಂಡಿದ್ದ ಯಶಸ್ವಿ ಇಂಚರಾ ಟಿವಿಯ ನಿರೂಪಕಿಯಾಗಿ ಗಮನ ಸೆಳೆದಿದ್ದರು. ಓದಿನ ಸಲುವಾಗಿ ನಟನೆಯಿಂದ ಬ್ರೇಕ್ ತೆಗೆದುಕೊಂಡ ಯಶಸ್ವಿ ನಂತರ ಉದಯ ವಾಹಿನಿಯ 'ಅವಳು' ಧಾರಾವಾಹಿ ಮೂಲಕ ಕಿರುತೆರೆಗೆ ವಾಪಸ್ ಬಂದರು. ಅವಳು ಧಾರಾವಾಹಿಯಲ್ಲಿ ಶ್ವೇತಾ ಪಾತ್ರಧಾರಿಯಾಗಿ ಕಾಣಿಸಿಕೊಂಡ ಈಕೆ ಒಂದು ವರ್ಷಗಳ ಕಾಲ ಆ ಪಾತ್ರದ ಮೂಲಕ ವೀಕ್ಷಕರಿಗೆ ಮನರಂಜನೆ ನೀಡಿದ್ದರು. ಬಣ್ಣದ ಲೋಕದಲ್ಲಿ ಪಳಗಿರುವ ಯಶಸ್ವಿ ಇದೀಗ ಯಾವುದೇ ಪಾತ್ರ ದೊರೆತರೂ ನಟಿಸಲು ತಯಾರಾಗಿದ್ದಾರೆ. ಕಳೆದೆರಡು ವರ್ಷಗಳಿಂದ 'ಮಂಗಳ ಗೌರಿ ಮದುವೆ' ಧಾರಾವಾಹಿಯ ಸ್ನೇಹ ಆಗಿ ನಟಿಸುತ್ತಿದ್ದಾರೆ. ಫಾರ್ಚ್ಯೂನರ್ ಸಿನಿಮಾದಲ್ಲಿ ಸಣ್ಣ ಪಾತ್ರದಲ್ಲಿ ಕೂಡಾ ಯಶಸ್ವಿ ಕಾಣಿಸಿಕೊಂಡಿದ್ದಾರೆ.
