ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ನಟನೆಯ 'ಯುವರತ್ನ' ಸಿನಿಮಾ ಚಿತ್ರೀಕರಣ ಬಹುತೇಕ ಮುಕ್ತಾಯದ ಹಂತಕ್ಕೆ ಬಂದಿದೆ. ಇದು ಪುನೀತ್ ರಾಜ್ಕುಮಾರ್ ಹಾಗೂ ನಿರ್ದೇಶಕ ಸಂತೋಷ್ ಆನಂದ್ ರಾಮ್ ಕಾಂಬಿನೇಶನ್ನಲ್ಲಿ ಮೂಡಿಬರುತ್ತಿರುವ ಎರಡನೇ ಚಿತ್ರ.
ಪ್ರಪಂಚದಲ್ಲಿ ಮೂರು ರೀತಿಯ ಜನರಿದ್ದಾರೆ. ರೂಲ್ಸ್ ಫಾಲೋ ಮಾಡುವವರು. ರೂಲ್ಸ್ ಬ್ರೇಕ್ ಮಾಡುವವರು ಹಾಗೂ ರೂಲ್ಸ್ ಹುಟ್ಟುಹಾಕುವವರು. ಈ ಚಿತ್ರದಲ್ಲಿ ಪುನೀತ್ ಮೂರನೇ ವರ್ಗಕ್ಕೆ ಸೇರಿದವರು. ಇನ್ನು ಈ ಚಿತ್ರದಲ್ಲಿ ಪುನೀತ್ 'ರಗ್ಬಿ' ಆಟಗಾರನಾಗಿ ನಟಿಸುತ್ತಿದ್ದಾರೆ. ಇದರಲ್ಲಿ ಪುನೀತ್ ತೊಟ್ಟಿರುವ ಟೀ ಶರ್ಟ್ ಸಂಖ್ಯೆ 29. ಅದು ಪುನೀತ್ ರಾಜ್ಕುಮಾರ್ ಅವರ 29 ನೇ ಕನ್ನಡ ಸಿನಿಮಾ ಎಂದು ಕೂಡಾ ಅರ್ಥ. ಈ ಕ್ರೀಡೆಯ ಬಗ್ಗೆ ತಿಳಿದುಕೊಳ್ಳಲು ಪುನೀತ್ ಮೂರು ತಿಂಗಳ ತರಬೇತಿ ಪಡೆದಿದ್ದಾರಂತೆ. ಇನ್ನು ಈ ಸಿನಿಮಾದಲ್ಲಿ ಪುನೀತ್ ಮೂರು ವಿಭಿನ್ನ ಗೆಟಪ್ನಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ ಎನ್ನಲಾಗಿದೆ.
ಈ ಚಿತ್ರದ ಮೂಲಕ ಸಂತೋಷ್ ಆನಂದ್ ರಾಮ್ ಹ್ಯಾಟ್ರಿಕ್ ನಿರೀಕ್ಷೆಯಲ್ಲಿದ್ದಾರೆ. 'ಶಿಕ್ಷಣ ವ್ಯಾಪಾರ ಆಗಬಾರದು, ಎಲ್ಲರಿಗೂ ಲಭ್ಯ ಆಗಬೇಕು ಎಂಬ ಸಂದೇಶವನ್ನು ಈ ಚಿತ್ರದಲ್ಲಿ ನೀಡಲಾಗಿದೆ. ಎಸ್.ಎಸ್. ತಮನ್ ಈ ಚಿತ್ರದ ಹಾಡುಗಳಿಗೆ ಸಂಗೀತ ಒದಗಿಸಿದ್ದಾರೆ. ಬಾಲಿವುಡ್ ನಟ ಸಂಜಯ್ ದತ್ ಕೂಡಾ ಈ ಸಿನಿಮಾ ಟೀಸರ್ ನೋಡಿ ‘ಬ್ರಿಲಿಯಂಟ್’ ಎಂದು ಉದ್ಘರಿಸಿದ್ದಾರೆ. ಕಿಚ್ಚ ಸುದೀಪ್ ಸಹ ಟೀಸರನ್ನು ಹೊಗಳಿದ್ದಾರೆ.
ಮೈಸೂರು, ಬೆಂಗಳೂರು ಹಾಗೂ ಸುತ್ತಮುತ್ತ ಸಿನಿಮಾ ಚಿತ್ರೀಕರಣ ಮಾಡಲಾಗಿದೆ. ಸಯೇಶ ಸೈಗಲ್, ದಿಗಂತ್, ಧನಂಜಯ್, ರಂಗಾಯಣ ರಘು, ಸೋನು ಗೌಡ, ವಸಿಷ್ಠ ಸಿಂಹ, ರಾಧಿಕಾ ಶರತ್ ಕುಮಾರ್, ಪ್ರಕಾಶ್ ರಾಯ್, ಅರುಣ್ ಗೌಡ, ತ್ರಿವೇಣಿ, ಸಾಧು ಕೋಕಿಲ, ಸುಧಾರಾಣಿ, ಪ್ರಕಾಶ್ ಬೆಳವಾಡಿ, ರವಿಶಂಕರ್ ಗೌಡ, ಅಚ್ಯುತ್ ಕುಮಾರ್, ಗುರುದತ್, ಕುರಿ ಪ್ರತಾಪ್ ಹಾಗೂ ಇನ್ನಿತರರು ತಾರಾ ಬಳಗದಲ್ಲಿದ್ದಾರೆ.
