ಅಭಿಮಾನಿಗಳು ಪವರ್ ಸ್ಟಾರ್ ಪುನೀತ್ ರಾಜ್ಕುಮಾರ್ ಅವರನ್ನು ಎಷ್ಟು ಇಷ್ಟ ಪಡುತ್ತಾರೋ ಅದೇ ರೀತಿ ಪುನೀತ್ ಕೂಡಾ ಅಭಿಮಾನಿಗಳನ್ನು ಗೌರವಿಸುತ್ತಾರೆ. ಅವರಲ್ಲಿರುವ ಕಲೆಗೆ ಬೆನ್ನು ತಟ್ಟಿ ಪ್ರೋತ್ಸಾಹಿಸುತ್ತಾ ಬಂದಿದ್ದಾರೆ. ತಮ್ಮ ಪೇಂಟಿಂಗ್ ಮಾಡಿದ ಅಭಿಮಾನಿಯೊಬ್ಬರ ಬಗ್ಗೆ ಪುನೀತ್ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ.
ಪುನೀತ್ ರಾಜ್ಕುಮಾರ್ಗೆ ಅಭಿಮಾನಿಗಳು ಉಡುಗೊರೆ ನೀಡುವುದು, ಅವರ ಹೆಸರನ್ನು ಹಚ್ಚೆ ಹಾಕಿಸಿಕೊಳ್ಳುವುದು, ಅವರ ಪೇಂಟಿಂಗ್ ಮಾಡುವ ಮೂಲಕ ತಮ್ಮ ಅಭಿಮಾನ ಮೆರೆಯುತ್ತಾರೆ. ಇಲ್ಲೊಬ್ಬರು ಅಭಿಮಾನಿ ಪುನೀತ್ ಅವರ ಪೇಂಟಿಂಗ್ ಮಾಡುವ ಮೂಲಕ ಅಭಿಮಾನ ಮೆರೆದಿದ್ದಾರೆ. ಅದರಲ್ಲೇನು ವಿಶೇಷ ಅಂತೀರಾ..? ಈ ಅಭಿಮಾನಿ ಪೇಂಟಿಂಗ್ ಮಾಡಿರುವುದು ಮೊಣಕೈ ಮೂಲಕ. ಬೆರಳಿನಲ್ಲಿ ಪೆನ್ಸಿಲ್ ಅಥವಾ ಬ್ರಷ್ ಹಿಡಿದು ಪೇಂಟಿಂಗ್ ಮಾಡುವುದು ಸಾಮಾನ್ಯ. ಆದರೆ ಮೊಣಕೈ ಮೂಲಕ ಪೇಂಟಿಂಗ್ ಎಂದರೆ ಸ್ವಲ್ಪ ಕಷ್ಟವೇ ಸರಿ. ಆದರೆ ಈ ಅಭಿಮಾನಿ ಮೊಣಕೈ ಮೂಲಕ ಪುನೀತ್ ಅವರ ಸುಂದರ ಪೇಂಟಿಂಗ್ ಮಾಡಿದ್ದಾರೆ.
ದಾವಣಗೆರೆಯ ಹರಿಹರ ತಾಲೂಕಿನ ಗಂಗಾನರಸಿ ಎಂಬ ಗ್ರಾಮದ ಈ ಅಭಿಮಾನಿ ಹೆಸರು ನಾಗರಾಜ್. ಪವರ್ ಸ್ಟಾರ್ ಅಪ್ಪಟ ಅಭಿಮಾನಿ ಆಗಿರುವ ನಾಗರಾಜ್ ತಮ್ಮ ಕಲೆಯಿಂದಲೇ ಪುನೀತ್ ಮನಸ್ಸನ್ನು ಕದಿಯುವಲ್ಲಿ ಯಶಸ್ವಿ ಆಗಿದ್ದಾರೆ. ನಾಗರಾಜ್ ಅವರ ಈ ಕಲೆಗೆ ಸ್ವತ: ಪುನೀತ್ ರಾಜ್ಕುಮಾರ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ನಾಗರಾಜ್ ಚಿತ್ರ ಬಿಡಿಸುತ್ತಿರುವ ವಿಡಿಯೋವನ್ನು ಪುನೀತ್ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳುವ ಮೂಲಕ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
