ಟಾಲಿವುಡ್ ಪ್ರಿನ್ಸ್ ಮಹೇಶ್ ಬಾಬು ನಟನೆಯ 'ಸರಿಲೇರು ನೀಕೆವ್ವರು' ಚಿತ್ರದ ಟೀಸರ್ ಇಂದು ಬಿಡುಗಡೆಯಾಗಿದೆ. ಪಕ್ಕಾ ಮಾಸ್ ಮಸಾಲ ಚಿತ್ರದ ಟೀಸರ್ನಲ್ಲಿ ಪ್ರಿನ್ಸ್ ಡೈಲಾಗ್ ಡೆಲಿವರಿ ಅಭಿಮಾನಿಗಳನ್ನು ರಂಜಿಸುತ್ತಿದೆ.
ಸೈನಿಕರ ನಿಸ್ವಾರ್ಥ ಸೇವೆಯನ್ನ ಹಿನ್ನೆಲೆಯಲ್ಲಿ ಹೇಳುತ್ತಾ ಸಾಗುವ ಮಹೇಶ್ ಬಾಬು ಸಹ ಕೆಲ ಸೆಕೆಂಡ್ ಆರ್ಮಿ ಡ್ರೆಸ್ನಲ್ಲಿ ಕಾಣಿಸುತ್ತಾರೆ. ನಂತರದಲ್ಲಿ ಪೋಷಕ ಪಾತ್ರಧಾರಿಗಳಾದ ವಿಜಯಶಾಂತಿ, ರಾಜೇಂದ್ರ ಪ್ರಸಾದ್ ಹಾಗೂ ಹಿರಿಯ ನಟ ಪ್ರಕಾಶ್ ರೈ ಅವರನ್ನು ಟೀಸರ್ನಲ್ಲಿ ತೋರಿಸಲಾಗಿದೆ.
ಟೀಸರ್ನಲ್ಲಿ ಡೈಲಾಗ್ನಷ್ಟೇ ದೇವಿಶ್ರೀ ಪ್ರಸಾದ್ ಹಿನ್ನಲೆ ಸಂಗೀತ ಧೂಳೆಬ್ಬಿಸುತ್ತಿದೆ. ಸ್ಟಾರ್ ಹೀರೋಗೆ ಅಗತ್ಯವಾದ ಅಬ್ಬರ ಮ್ಯೂಸಿಕ್ ಝಲಕ್ ಟೀಸರ್ನಲ್ಲಿ ಕೇಳಿಸುತ್ತಿದೆ. ರತ್ನವೇಲು ಸಿನಿಮಾಟೋಗ್ರಫಿ ಟೀಸರ್ನಲ್ಲಿ ಮತ್ತೊಂದು ಉಲ್ಲೇಖನೀಯ ಅಂಶ. ಮಹೇಶ್ ಬಾಬು ಈ ಚಿತ್ರದಲ್ಲಿ ಮೇಜರ್ ಅಜಯ್ ಕೃಷ್ಣ ಪಾತ್ರದಲ್ಲಿ ನಟಿಸಿದ್ದಾರೆ.
ಅನಿಲ್ ರವಿಪುಡಿ ನಿರ್ದೇಶನದ ಈ ಚಿತ್ರದಲ್ಲಿ ಮಹೇಶ್ ಬಾಬುಗೆ ಜೋಡಿಯಾಗಿ ಕನ್ನಡತಿ ರಶ್ಮಿಕಾ ಮಂದಣ್ಣ ನಟಿಸಿದ್ದಾಳೆ. ಆದರೆ, ಟೀಸರ್ನಲ್ಲಿ ರಶ್ಮಿಕಾ ಒಂದೇ ಒಂದು ದೃಶ್ಯದಲ್ಲೂ ಕಾಣಿಸಿಲ್ಲ ಎನ್ನುವುದು ವಿಶೇಷ.
'ಸರಿಲೇರು ನೀಕೆವ್ವರು' ಚಿತ್ರವನ್ನು ಸ್ವತಃ ಹೀರೋ ಮಹೇಶ್ ಬಾಬು, ದಿಲ್ ರಾಜು ಹಾಗೂ ರಾಮಬ್ರಹ್ಮಂ ಸುಂಕಾರ ನಿರ್ಮಾಣ ಮಾಡಿದ್ದಾರೆ. ಈ ಬಹುನಿರೀಕ್ಷಿತ ಸಿನಿಮಾ 2020ರ ಸಂಕ್ರಾಂತಿ ಹಬ್ಬಕ್ಕೆ(ಜ.12) ತೆರೆಗಪ್ಪಳಿಸಲಿದೆ. ಆದರೆ, ಇದೇ ದಿನದಂದು ಅಲ್ಲು ಅರ್ಜುನ್ ನಟನೆಯ 'ಅಲಾ ವೈಕುಂಠಪುರಮ್ಲೋ' ಚಿತ್ರ ಸಹ ರಿಲೀಸ್ ಆಗಲಿದೆ.
- " class="align-text-top noRightClick twitterSection" data="">
