ಕನ್ನಡ ಚಿತ್ರರಂಗಕ್ಕೆ ದೊಡ್ಡ ಫೇಮ್ ತಂದುಕೊಟ್ಟ ಕೆಜಿಎಫ್ ಸರಣಿ ಚಿತ್ರದಲ್ಲಿ ರಾಕಿಂಗ್ ಸ್ಟಾರ್ ಯಶ್ ಬ್ಯುಸಿಯಾಗಿದ್ದಾರೆ. ಅದ್ದೂರಿಯಾಗಿ ನಡೆಯುತ್ತಿರುವ ಚಿತ್ರದ ಶೂಟಿಂಗ್ ಈಗಾಗಲೇ ಭಾರತದ ಸಿನಿ ರಸಿಕರನ್ನು ತನ್ನತ್ತ ಸೆಳೆಯುತ್ತಿದೆ. ಈ ಚಿತ್ರ ಕಣ್ತುಂಬಿಕೊಳ್ಳಲು ಕಾತರದಿಂದ ಕಾಯುತ್ತಿರುವ ರಾಕಿ ಭಾಯ್ ಅಭಿಮಾನಿಗಳಿಗೆ ಸದ್ಯ ಗುಡ್ ನ್ಯೂಸ್ವೊಂದು ಕೇಳಿ ಬಂದಿದೆ. ಎಲ್ಲ ಅಂದುಕೊಂಡಂತಾದ್ರೆ ಮತ್ತೊಂದು ಪ್ಯಾನ್ ಇಂಡಿಯಾ ಸಿನಿಮಾದಲ್ಲಿ ರಾಕಿಂಗ್ ಸ್ಟಾರ್ ಯಶ್ ಮಿಂಚಲಿದ್ದಾರೆ.
ಹೌದು, ಸಕ್ಸಸ್ಫುಲ್ ಡೈರೆಕ್ಟರ್ ಪುರಿ ಜಗನಾಥ್ ಅವರ ಮೋಸ್ಟ್ ಎಕ್ಸ್ಪೆಕ್ಟೆಡ್ 'ಜನ ಗಣ ಮನ' ಚಿತ್ರಕ್ಕೆ ರಾಕಿಭಾಯ್ ನಾಯಕರಾಗಲಿದ್ದಾರೆ. ಕಳೆದ ಕೆಲ ವರ್ಷದಿಂದ ದೇಶವನ್ನೇ ಬೆಚ್ಚಿಬೀಳಿಸಿರುವ ಕ್ರೈಮ್ ಸ್ಟೋರಿಗಳ ಕಥಾ ಹಂದರದ ಈ ಚಿತ್ರಕ್ಕೆ ಕನ್ನಡದ ಸೂಪರ್ ಸ್ಟಾರ್ ಯಶ್ ನಾಯಕ ನಟ. ಈಗಾಗಲೇ ಎರಡು ಬಾರಿ ಯಶ್ ಜತೆ ಮಾತುಕತೆ ನಡೆಸಿರುವ ನಿರ್ದೇಶಕ ಪುರಿ, ಶೀಘ್ರದಲ್ಲೇ ಕೊನೆಯ ಹಂತದ ಟಾಕ್ ನಡೆಸಲಿದ್ದಾರಂತೆ.
ಹಾಗೇ ನೋಡಿದ್ರೆ ಈ ಮೊದಲು'ಜನ ಗಣ ಮನ' ಚಿತ್ರಕ್ಕೆ ಟಾಲಿವುಡ್ ಪ್ರಿನ್ಸ್ ಮಹೇಶ್ ಬಾಬು ನಾಯಕ ಎಂದು ತೀರ್ಮಾನಿಸಲಾಗಿತ್ತು. ಆದರೆ, ಕೆಲವೊಂದು ಕಾರಣಗಳಿಂದ ಚಿತ್ರತಂಡ ಇವರನ್ನು ಕೈಬಿಟ್ಟು ರಾಕಿ ಭಾಯ್ಗೆ ಮಣೆ ಹಾಕುತ್ತಿದೆ. ಕನ್ನಡ ಹಾಗೂ ತೆಲುಗು ಭಾಷೆಗಳಲ್ಲಿ ಸಿದ್ಧವಾಗಲಿರುವ ಈ ಸಿನಿಮಾ ತಮಿಳು ಹಾಗೂ ಹಿಂದಿಗೆ ಡಬ್ ಆಗಲಿದೆಯಂತೆ.
ಸದ್ಯ ಯಶ್ ಕೆಜಿಎಫ್ 2 ಸಿನಿಮಾ ಶೂಟಿಂಗ್ನಲ್ಲಿ ಬ್ಯುಸಿಯಾಗಿದ್ದಾರೆ. ಈ ಸಿನಿಮಾ ಕಂಪ್ಲೀಟ್ ಆದ್ಮೇಲೆ ಪುರಿ ಚಿತ್ರದಲ್ಲಿ ನಟಿಸಲಿದ್ದಾರೆ ಎನ್ನುವ ಮಾತು ಕೇಳಿ ಬರುತ್ತಿದೆ.
