ಇಂದು ಪುನೀತ್ ರಾಜ್ಕುಮಾರ್ ಹುಟ್ಟುಹಬ್ಬದ ವಿಶೇಷವಾಗಿ ಅವರ ಅಭಿನಯದ ಹೊಸ ಚಿತ್ರ 'ಜೇಮ್ಸ್' ಮೋಶನ್ ಪೋಸ್ಟರನ್ನು ಚಿತ್ರತಂಡ ಬಿಡುಗಡೆ ಮಾಡಿದೆ. ಜೇಮ್ಸ್ ಟೀಮ್ ಪುನೀತ್ ಭೇಟಿ ಮಾಡಿ ಅವರ ಹುಟ್ಟುಹಬ್ಬಕ್ಕೆ ಶುಭ ಕೋರಿದೆ.
'ಜೇಮ್ಸ್' ಚಿತ್ರದ ನಿರ್ದೇಶಕ ಚೇತನ್ ಕುಮಾರ್, 'ಭರಾಟೆ' ನಿರ್ಮಾಪಕ ಸುಪ್ರೀತ್ ಹಾಗೂ ಇನ್ನಿತರರು ಪುನೀತ್ ನಿವಾಸಕ್ಕೆ ಆಗಮಿಸಿ ಅವರಿಗೆ ಬರ್ತಡೇ ವಿಶ್ ಮಾಡಿದ್ದಾರೆ.
'ಜೇಮ್ಸ್' ಚಿತ್ರದ ಅಫಿಷಿಯಲ್ ಪೋಸ್ಟರನ್ನು ಪವರ್ ಸ್ಟಾರ್ ಕೈಯಲ್ಲಿ ಬಿಡುಗಡೆ ಮಾಡಿಸಿದ್ದಾರೆ. ಚಿತ್ರದ ಮೋಶನ್ ಪೋಸ್ಟರ್ ಬಿಡುಗಡೆಯಾಗುತ್ತಿದ್ದಂತೆ ಅಭಿಮಾನಿಗಳು ಪುನೀತ್ಗೆ ಜೈಕಾರ ಕೂಗಿದರು. ಅಭಿಮಾನಿಯೊಬ್ಬರು ಅತಿ ಕಡಿಮೆ ಸಮಯದಲ್ಲಿ ಪುನೀತ್ ಅವರ ಪೆನ್ಸಿಲ್ ಸ್ಕೆಚ್ ಮಾಡಿ ಅವರ ಆಟೋಗ್ರಾಫ್ ಕೂಡಾ ಪಡೆದರು. ಕಲಾವಿದನ ಕೈ ಚಳಕಕ್ಕೆ ಪುನೀತ್ ಖುಷಿ ವ್ಯಕ್ತಪಡಿಸಿ ಅಭಿಮಾನಿಗೆ ಬೆನ್ನು ತಟ್ಟಿ ಪ್ರೋತ್ಸಾಹಿಸಿದರು.
ಇನ್ನು ಹೊಸಕೋಟೆ ಪುನೀತ್ ರಾಜಕುಮಾರ್ ಅಭಿಮಾನಿಗಳು ಪುನೀತ್ಗೆ ಬೆಳ್ಳಿ ಕಿರೀಟ ತೊಡಿಸಿ ಅವರ ಹುಟ್ಟುಹಬ್ಬವನ್ನು ಸಂಭ್ರಮಿಸಿದರು. ಹೊಸಕೋಟೆ ತಾಲೂಕು ಪಂಚಾಯಿತಿ ಸದಸ್ಯರಾದ ರಾಜೇಂದ್ರ ಎಂಬುವರು ಸುಮಾರು ಒಂದು ಕೆ.ಜಿ 100 ಗ್ರಾಂ ತೂಕದ 65 ಸಾವಿರ ಬೆಲೆ ಬಾಳುವ ಬೆಳ್ಳಿ ಕಿರೀಟವನ್ನು ಪುನೀತ್ ಹುಟ್ಟುಹಬ್ಬಕ್ಕೆ ಉಡುಗೊರೆಯಾಗಿ ನೀಡಿದರು.
