'ಅತಿಥಿ ದೇವೋಭವ' ನಮ್ಮ ಸಂಸ್ಕೃತಿಯಾಗಿದ್ದು ಭಾರತೀಯರು ಇದನ್ನು ಪುರಾತನ ಕಾಲದಿಂದಲೂ ಪಾಲಿಸಿಕೊಂಡು ಬರುತ್ತಿದ್ದಾರೆ. ನಮ್ಮ ಮನೆಗೆ ಅತಿಥಿಗಳು ಬಂದಲ್ಲಿ ಅವರನ್ನು ಪ್ರೀತಿ, ಆದರದಿಂದ ಆರೈಕೆ ಮಾಡುತ್ತೇವೆ.
ಹಾಗೇ ನಮ್ಮ ದೇಶಕ್ಕೆ ವಿದೇಶದವರು ಬಂದರೆ ಕೂಡಾ ಇದೇ ಸಂಸ್ಕೃತಿಯನ್ನು ಅನುಸರಿಸುತ್ತೇವೆ. ಈ ಸಂಸ್ಕೃತಿಗೆ ಹಾಲಿವುಡ್ ನಿರ್ದೇಶಕ ಜೋಯ್ ರುಸ್ಸೋಯ್ ಕೂಡಾ ಮಾರುಹೋಗಿದ್ದಾರೆ. ತಾವು ನಿರ್ದೇಶಿಸಿದ Avengers: Endgame (ಆವೆಂಜರ್ಸ್: ಎಂಡ್ಗೇಮ್) ಸಿನಿಮಾ ಪ್ರಚಾರಕ್ಕಾಗಿ ರುಸ್ಸೋಯ್ ಇತ್ತೀಚೆಗೆ ಭಾರತಕ್ಕೆ ಬಂದಿದ್ದರು. ಮುಂಬೈನಲ್ಲಿ ನಡೆದ ಸಿನಿಮಾ ಪ್ರಚಾರ ಕಾರ್ಯಕ್ರಮದಲ್ಲಿ ರುಸ್ಸೋಯ್ ತಮ್ಮ ಅಭಿಮಾನಿಗಳನ್ನು ಭೇಟಿ ಮಾಡಿದ್ದಾರೆ. ತಮ್ಮ ಹಾಗೂ ಸಿನಿಮಾ ಬಗ್ಗೆ ಅಭಿಮಾನಿಗಳು ತೋರಿದ ಪ್ರೀತಿಗೆ ರುಸ್ಸೋಯ್ ಸಂತೋಷ ವ್ಯಕ್ತಪಡಿಸಿದ್ದಾರೆ.
ಇನ್ನು ಕಾರ್ಯಕ್ರಮದ ನಂತರ ರುಸ್ಸೋಯ್ ಅವರಿಗೆ ಔತಣವನ್ನೂ ಏರ್ಪಡಿಸಲಾಗಿತ್ತು. ಆಯೋಜಕರು ಒಂದು ದೊಡ್ಡ ತಟ್ಟೆಗೆ 'A' ಆಕಾರದಲ್ಲಿ 16 ರೀತಿಯ ತಿಂಡಿಗಳನ್ನು ಚಿಕ್ಕ ಬಟ್ಟಲಿನಲ್ಲಿ ಜೋಡಿಸಿ ಇರಿಸಿದ್ದರು. ಇದನ್ನು ನೋಡಿ ರುಸ್ಸೋಯ್ ಎಮೋಶನಲ್ ಆದರು. ತಮ್ಮನ್ನು ಇಷ್ಟು ಪ್ರೀತಿಯಿಂದ ನೋಡಿಕೊಂಡ ಭಾರತೀಯ ಸಂಸ್ಕೃತಿಗೆ ಅವರು ಹ್ಯಾಟ್ಸಾಫ್ ಹೇಳಿ ಫೋಟೋಗೆ ಪೋಸ್ ಕೂಡಾ ನೀಡಿದ್ದಾರೆ. ಈ ಫೋಟೋಗಳನ್ನು ಅವರು ತಮ್ಮ ಟ್ವಿಟ್ಟರ್ನಲ್ಲಿ ಕೂಡಾ ಷೇರ್ ಮಾಡಿಕೊಂಡಿದ್ದಾರೆ.
ಇನ್ನು ಮುಂಬೈನಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ಖ್ಯಾತ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ ರುಸ್ಸೋಯ್ಗೆ ಸಾಥ್ ನೀಡಿದ್ದರು. Avengers: Endgame ಸಿನಿಮಾ ಇದೇ ತಿಂಗಳ 26 ರಂದು ಬಿಡುಗಡೆಯಾಗುತ್ತಿದೆ.
