ಬೆಂಗಳೂರು: ಕಿಚ್ಚ ಸುದೀಪ್ ನಟನೆಯ ಅನೂಪ್ ಬಂಡಾರಿ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಫ್ಯಾಂಟಮ್ ಚಿತ್ರ ಈಗಾಗಲೇ ಸದ್ದು ಮಾಡುತ್ತಿದೆ. ಚಿತ್ರದ ಪೋಸ್ಟರ್ ಹಾಗೂ ಫಸ್ಟ್ ಲುಕ್ಗಳಿಂದಲೇ ಸಿನಿ ರಸಿಕರ ಮನಗೆದ್ದಿದ್ದು, ಚಿತ್ರೀಕರಣ ಭರದಿಂದ ಸಾಗುತ್ತಿದೆ.
ಈ ನಡುವೆ ಕಿಚ್ಚ ಹಾಗೂ ಅನೂಪ್ ತಂಡದಿಂದ ಹೊಸದೊಂದು ಸುದ್ದಿ ಹೊರಬಿದ್ದಿದ್ದು, ಫ್ಯಾಂಟಮ್ ನಂತರ ಕಿಚ್ಚ ಸುದೀಪ್ ಬ್ಯಾನರ್ನಲ್ಲಿ ಇನ್ನೊಂದು ಸಿನಿಮಾ ಮಾಡುವುದಾಗಿ ಅಧಿಕೃತವಾಗಿ ಘೋಷಿಸಿದ್ದಾರೆ.
ಚಿತ್ರಕ್ಕೆ ‘ಅಶ್ವತ್ಥಾಮ’ ಎಂದು ಹೆಸರಿಡಲಾಗಿದ್ದು, ಫ್ಯಾಂಟಮ್ ಬಳಿಕ ಸೆಟ್ಟೇರಲಿದೆ ಎನ್ನಲಾಗಿದೆ. ಚಿತ್ರವೂ ಕಿಚ್ಚ ಕ್ರಿಯೇಷನ್ಸ್ ಅಡಿಯಲ್ಲಿ ನಿರ್ಮಾಣವಾಗುತ್ತಿದ್ದು, ಚಿತ್ರದ ಮುಖ್ಯ ಪಾತ್ರಧಾರಿಗಳ ಕುರಿತಂತೆ ಯಾವುದೇ ಗುಟ್ಟು ಬಿಟ್ಟುಕೊಟ್ಟಿಲ್ಲ. ಇನ್ನು ಚಿತ್ರದ ಪೋಸ್ಟರ್ನಲ್ಲಿ ಮಹಾಭಾರತದ ಅಶ್ವತ್ಥಾಮನ ಜೊತೆ ಗನ್ ಹಿಡಿದ ಖಡಕ್ ಲುಕ್ ಸಹ ಕಾಣಬಹುದಾಗಿದೆ.
ಇನ್ನು ಸಿನಿ ರಸಿಕರಲ್ಲಿ ಫ್ಯಾಂಟಮ್ ಕುರಿತಂತೆ ಮಾತು ಹೆಚ್ಚಾಗುತ್ತಿರುವ ವೇಳೆ ‘ಅಶ್ವತ್ಥಾಮ’ನ ಕುರಿತು ಇನ್ನಷ್ಟು ಕುತೂಹಲ ಮೂಡಿದೆ.
