ಬೀಜಿಂಗ್ (ಚೀನಾ) : ಓಪನ್ ಎಐ ನ ಚಾಟ್ ಬಳಸಿ ನಕಲಿ ಸುದ್ದಿ (ಫೇಕ್ ನ್ಯೂಸ್) ತಯಾರಿಸಿ ಅದನ್ನು ಶೇರ್ ಮಾಡಿದ ವ್ಯಕ್ತಿಯೊಬ್ಬನನ್ನು ಚೀನಾದಲ್ಲಿ ಅಧಿಕಾರಿಗಳು ಬಂಧಿಸಿದ್ದಾರೆ. ಚೀನಾದಲ್ಲಿ ಚಾಟ್ ಜಿಪಿಟಿಯನ್ನು ದುರ್ಬಳಕೆ ಮಾಡಿಕೊಂಡ ಮೊದಲ ಪ್ರಕರಣ ಇದಾಗಿರಬಹುದು ಎನ್ನಲಾಗಿದೆ. ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನವನ್ನು ಬಳಸಿಕೊಂಡು ಸುಳ್ಳು ಮತ್ತು ತಪ್ಪಾದ ಮಾಹಿತಿಯನ್ನು ತಯಾರಿಸಿದ ಹಾಂಗ್ ಹೆಸರಿನ ಶಂಕಿತನನ್ನು ಬಂಧಿಸಲಾಗಿದೆ ಎಂದು ವಾಯುವ್ಯ ಚೀನಾದ ಗನ್ಸು ಪ್ರಾಂತ್ಯದ ಪೊಲೀಸರು ತಿಳಿಸಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ಚೀನಾದಲ್ಲಿ ChatGPT ನೇರವಾಗಿ ಲಭ್ಯವಿಲ್ಲದಿದ್ದರೂ, ಬಳಕೆದಾರರು ವಿಶ್ವಾಸಾರ್ಹ VPN ಸಂಪರ್ಕವನ್ನು ಹೊಂದಿದ್ದರೆ ಅದನ್ನು ಬಳಸಬಹುದು. ಚೀನೀ ಸರ್ಚ್ ಇಂಜಿನ್ ಬೈದು ನಡೆಸುತ್ತಿರುವ ಬ್ಲಾಗ್ ಶೈಲಿಯ ಪ್ಲಾಟ್‌ಫಾರ್ಮ್ ಬೈಜಿಯಾಹಾವೊದಲ್ಲಿ 20 ಕ್ಕೂ ಹೆಚ್ಚು ಖಾತೆಗಳಿಂದ ರೈಲು ಅಪಘಾತದ ಕುರಿತು ಎಐ ಲಿಖಿತ ನಕಲಿ ಸುದ್ದಿಯನ್ನು ಪೋಸ್ಟ್ ಮಾಡಲಾಗಿರುವುದನ್ನು ಸೈಬರ್ ಸೆಕ್ಯುರಿಟಿ ತಂಡವು ಕಂಡುಹಿಡಿದಿದೆ. ಅಧಿಕಾರಿಗಳು ಕ್ರಮ ಕೈಗೊಳ್ಳುವ ಮೊದಲೇ ಈ ಫೇಕ್ ನ್ಯೂಸ್ ಅನ್ನು 15,000 ಕ್ಕೂ ಹೆಚ್ಚು ಜನ ಕ್ಲಿಕ್‌ ಮಾಡಿ ಓದಿದ್ದಾರೆ.
ಒಂದೇ ನಕಲಿ ಕಥೆಯ ವಿಭಿನ್ನ ಆವೃತ್ತಿಗಳನ್ನು ತ್ವರಿತವಾಗಿ ತಯಾರಿಸಲು ಚಾಟ್ಜಿಪಿಟಿ ಬಳಸಿದ್ದನ್ನು ಮತ್ತು ಅವುಗಳನ್ನು ತನ್ನ ಬೈಜಿಯಾಹಾವೊ ಖಾತೆಗಳಿಗೆ ಅಪ್‌ಲೋಡ್ ಮಾಡಿರುವುದನ್ನು ಹಾಂಗ್ ಒಪ್ಪಿಕೊಂಡಿದ್ದಾನೆ. ಉದ್ದೇಶಪೂರ್ವಕವಾಗಿ ಜಗಳಗಳನ್ನು ಸೃಷ್ಟಿಸುವುದು ಮತ್ತು ತೊಂದರೆಗಳನ್ನು ಉತ್ತೇಜಿಸುವ ಆರೋಪಗಳನ್ನು ಹಾಂಗ್ ಮೇಲೆ ಹೊರಿಸಲಾಗಿದೆ. ಈ ಆರೋಪ ಸಾಬೀತಾದಲ್ಲಿ ಈತನಿಗೆ ಗರಿಷ್ಠ 5 ವರ್ಷಗಳ ಜೈಲು ಶಿಕ್ಷೆಯಾಗಬಹುದು. ಆದಾಗ್ಯೂ ವಿಶೇಷವಾಗಿ ಗಂಭೀರ ಸ್ವರೂಪದ ಪ್ರಕರಣಗಳಲ್ಲಿ ಅಪರಾಧಿಗಳಿಗೆ 10 ವರ್ಷಗಳವರೆಗೆ ಜೈಲು ಶಿಕ್ಷೆ ಮತ್ತು ಹೆಚ್ಚುವರಿ ದಂಡವನ್ನು ನೀಡಬಹುದು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಮೈಕ್ರೋಸಾಫ್ಟ್ ಮಾಲೀಕತ್ವದ OpenAI ನಿಂದ AI ಚಾಲಿತ ಚಾಟ್‌ಬಾಟ್ ಆಗಿರುವ ಚಾಟ್‌ಜಿಪಿಟಿಯನ್ನು ಚೀನಾ ವಿರೋಧಿಸುತ್ತಿದೆ. ಇದು ಅಮೆರಿಕ ಸರ್ಕಾರ ಹರಡುವ ಸುಳ್ಳು ಸುದ್ದಿಗಳನ್ನು ಹರಡುತ್ತಿದೆ ಎಂದು ಆರೋಪಿಸಿರುವ ಚೀನಾ, ಇದನ್ನು ಚೀನಾದ ಇಂಟರ್ನೆಟ್ ಕಂಪನಿಗಳು ತಮ್ಮ ಅಪ್ಲಿಕೇಶನ್‌ಗಳಲ್ಲಿ ಬಳಸದಂತೆ ಸೂಚನೆ ನೀಡಿದೆ. ತಮ್ಮ ಪ್ಲಾಟ್ಫಾರ್ಮ್ಗಳ ಮೂಲಕ ಗ್ರಾಹಕರಿಗೆ ಚಾಟ್ಜಿಪಿಟಿ ಸೇವೆಗಳನ್ನು ನೀಡದಂತೆ ಅಲಿಬಾಬಾ ಗ್ರೂಪ್‌ನ ಫಿನ್‌ಟೆಕ್ ಅಂಗಸಂಸ್ಥೆಯಾದ ಟೆನ್ಸೆಂಟ್ ಮತ್ತು ಆಂಟ್ ಗ್ರೂಪ್‌ಗೆ ಚೀನಾ ಅಧಿಕಾರಿಗಳು ಆದೇಶ ನೀಡಿದ್ದಾರೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ. ಬಳಕೆದಾರರು AI ಚಾಲಿತ ಚಾಟ್‌ಬಾಟ್‌ಗಳಿಗೆ ಕೇಳಿದ ಪ್ರಶ್ನೆಗಳ ಉತ್ತರಗಳನ್ನು ಯಾವುದೇ ನಿಯಂತ್ರಣವಿಲ್ಲದೆ ನೋಡುವ ವಿಷಯದಲ್ಲಿ ತುಂಬಾ ಚರ್ಚೆಗಳು ನಡೆಯುತ್ತಿವೆ.
ಚಾಟ್ಜಿಪಿಟಿ ಎಂಬುದು ಎಐ ತಂತ್ರಜ್ಞಾನದಿಂದ ಚಾಲಿತವಾಗಿರುವ ನೈಸರ್ಗಿಕ ಭಾಷಾ ಸಂಸ್ಕರಣಾ ಸಾಧನವಾಗಿದ್ದು, ಇದು ಚಾಟ್‌ಬಾಟ್‌ನೊಂದಿಗೆ ಮಾನವ ರೀತಿಯ ಸಂಭಾಷಣೆಗಳನ್ನು ಮತ್ತು ಇನ್ನೂ ಹೆಚ್ಚಿನದನ್ನು ಮಾಡಲು ನಿಮಗೆ ಅವಕಾಶ ಮಾಡಿಕೊಡುತ್ತವೆ. ಭಾಷಾ ಮಾದರಿಯು ಪ್ರಶ್ನೆಗಳಿಗೆ ಉತ್ತರಿಸಬಹುದು ಮತ್ತು ಇಮೇಲ್‌ಗಳು, ಪ್ರಬಂಧಗಳು ಮತ್ತು ಕೋಡ್ ಅನ್ನು ರಚಿಸುವಂತಹ ಕಾರ್ಯಗಳಲ್ಲಿ ನಿಮಗೆ ಸಹಾಯ ಮಾಡುತ್ತದೆ.
ಇದನ್ನೂ ಓದಿ : ಎಚ್ಚರ! ಆ್ಯಂಡ್ರಾಯ್ಡ್ ಪಾಸ್ವರ್ಡ್ ಕದಿಯುತ್ತೆ 'ಫ್ಲುಹಾರ್ಸ್' ಮಾಲ್ವೇರ್!
