ಲಂಡನ್: ಮೈಕ್ರೋಸಾಫ್ಟ್ ಮಾರುಕಟ್ಟೆ ಮೌಲ್ಯದ ಪ್ರಕಾರ ಆ್ಯಪಲ್ ಅನ್ನು ಹಿಂದಿಕ್ಕಿ ವಿಶ್ವದ ಅತಿದೊಡ್ಡ ಕಂಪನಿಯಾಗಿ ಹೊರಹೊಮ್ಮಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ. ಈ ಮೂಲಕ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದ ಬೆಳವಣಿಗೆಯು ಎರಡು ಬಿಗ್ ಟೆಕ್ ಕಂಪನಿಗಳ ನಡುವಿನ ದಶಕಗಳ ಪೈಪೋಟಿಗೆ ಹೊಸ ತಿರುವು ನೀಡಿದಂತಾಗಿದೆ.
ಮೈಕ್ರೊಸಾಫ್ಟ್ ಕಂಪನಿಯ ಷೇರುಗಳು ಗುರುವಾರದ ಆರಂಭಿಕ ವಹಿವಾಟಿನಲ್ಲಿ ಶೇಕಡಾ 1ರಷ್ಟು ಏರಿಕೆಯಾಗಿ ಅದರ ಮಾರುಕಟ್ಟೆ ಮೌಲ್ಯವನ್ನು 2.87 ಟ್ರಿಲಿಯನ್ ಡಾಲರ್ಗೆ ಕೊಂಡೊಯ್ದವು. ಇದು ಆ್ಯಪಲ್‌ನ ಮಾರುಕಟ್ಟೆ ಮೌಲ್ಯಕ್ಕಿಂತ ತುಸುವೇ ಜಾಸ್ತಿಯಾಗಿದೆ. ಗುರುವಾರ ಆ್ಯಪಲ್‌ನ ಷೇರುಗಳು ಸುಮಾರು 1 ಪ್ರತಿಶತದಷ್ಟು ಕುಸಿದವು. ನ್ಯೂಯಾರ್ಕ್ನಲ್ಲಿ ಬೆಳಗ್ಗೆ ವಹಿವಾಟು ಮುಂದುವರೆದಂತೆ ಮೈಕ್ರೊಸಾಫ್ಟ್ ಹಾಗೂ ಆ್ಯಪಲ್ ಆಗಾಗ ನಂಬರ್ ಒನ್ ಸ್ಥಾನಕ್ಕೇರಿ ಕೆಳಗಿಳಿದವು.
ಎಐನ ಹೊಸ ತಲೆಮಾರಿನ ತಂತ್ರಜ್ಞಾನದ ಅಭಿವೃದ್ಧಿಯ ನಿರೀಕ್ಷೆಯಿಂದ ಹೂಡಿಕೆದಾರರು ಉತ್ಸಾಹ ತೋರಿದ್ದರಿಂದ ಮೈಕ್ರೊಸಾಫ್ಟ್ ಷೇರು ಬೆಲೆಗಳು ಏರಿಕೆಯಾಗಿವೆ ಎಂದು ಫೈನಾನ್ಷಿಯಲ್ ಟೈಮ್ಸ್ ವರದಿ ಮಾಡಿದೆ. ವಿಶ್ವದ ಅತ್ಯಂತ ಜನಪ್ರಿಯ ಎಐ ಚಾಟ್ಬಾಟ್ ಚಾಟ್ ಜಿಪಿಟಿಯ ತಯಾರಕ ಕಂಪನಿ ಓಪನ್ ಎಐ ಅನ್ನು ಮೈಕ್ರೊಸಾಫ್ಟ್ ಬೆಂಬಲಿಸುತ್ತಿದೆ. ಪ್ರಮುಖವಾಗಿ ಚೀನಾ ಸೇರಿದಂತೆ ವಿಶ್ವದ ಕೆಲ ದೇಶಗಳಲ್ಲಿ ಐಫೋನ್ ಮಾರಾಟ ಕುಸಿತವು ಆ್ಯಪಲ್ ಷೇರುಗಳ ಮೇಲೆ ಪ್ರತಿಕೂಲ ಪರಿಣಾಮ ಬೀರಿದೆ.
ಆ್ಯಪಲ್ ಮತ್ತು ಮೈಕ್ರೋಸಾಫ್ಟ್ 1980 ರ ದಶಕದಿಂದಲೂ ಪ್ರತಿಸ್ಪರ್ಧಿಗಳಾಗಿವೆ. ಆಗ ಬಿಲ್ ಗೇಟ್ಸ್ ಸ್ಥಾಪಿಸಿದ ಮೈಕ್ರೊಸಾಫ್ಟ್ ಕಂಪನಿಯು ತನ್ನ ಮ್ಯಾಕಿಂತೋಷ್ ಕಂಪ್ಯೂಟರ್ ಸಾಫ್ಟ್ವೇರ್ನ ವಿನ್ಯಾಸ ಮತ್ತು ರಚನೆಯನ್ನು ಕದ್ದಿದೆ ಎಂದು ಸ್ಟೀವ್ ಜಾಬ್ಸ್ ಮತ್ತು ಸ್ಟೀವ್ ವೋಜ್ನಿಯಾಕ್‌ರಿಂದ ಸ್ಥಾಪಿತವಾದ ಆ್ಯಪಲ್ ಆರೋಪಿಸಿತ್ತು.
ಆ್ಯಪಲ್ 1990ರ ದಶಕದ ಆರಂಭದಲ್ಲಿ ವಿಂಡೋಸ್ ವಿರುದ್ಧ ಆ್ಯಪಲ್ ಕೃತಿಸ್ವಾಮ್ಯ ಮೊಕದ್ದಮೆ ದಾಖಲಿಸಿತ್ತು. ಆದರೆ ಈ ಮೊಕದ್ದಮೆಯನ್ನು ಆ್ಯಪಲ್ ಸೋತ ನಂತರ ಮೈಕ್ರೊಸಾಫ್ಟ್ ದಶಕಗಳ ಕಾಲ ಪಿಸಿ ಮಾರುಕಟ್ಟೆಯಲ್ಲಿ ಪ್ರಾಬಲ್ಯ ಸಾಧಿಸಿದೆ. ಮೈಕ್ರೋಸಾಫ್ಟ್ ವಿಶ್ವದ ಅತಿದೊಡ್ಡ ಕಂಪ್ಯೂಟರ್ ಸಾಫ್ಟ್ ವೇರ್ ಮಾರಾಟಗಾರ ಕಂಪನಿಯಾಗಿದೆ. ಇದು ಕ್ಲೌಡ್ ಕಂಪ್ಯೂಟಿಂಗ್ ಸೇವೆಗಳು, ವಿಡಿಯೋ ಗೇಮ್‌ಗಳು, ಕಂಪ್ಯೂಟರ್ ಮತ್ತು ಗೇಮಿಂಗ್ ಹಾರ್ಡ್‌ವೇರ್, ಸರ್ಚ್ ಮತ್ತು ಇತರ ಆನ್‌ಲೈನ್ ಸೇವೆಗಳ ಪ್ರಮುಖ ಪೂರೈಕೆದಾರನಾಗಿದೆ.
ಇದನ್ನೂ ಓದಿ: ಎಐ ಚಾಲಿತ ಸುಳ್ಳು ಮಾಹಿತಿ ವಿಶ್ವಕ್ಕೆ ಅತಿದೊಡ್ಡ ಅಪಾಯ: ವಿಶ್ವ ಆರ್ಥಿಕ ವೇದಿಕೆ ವರದಿ
