ನವದೆಹಲಿ : ಮೆಟಾ ಒಡೆತನದ ಮೈಕ್ರೊಬ್ಲಾಗಿಂಗ್ ಪ್ಲಾಟ್ಫಾರ್ಮ್ ಥ್ರೆಡ್ಸ್ 150 ಮಿಲಿಯನ್ ಸೈನ್-ಅಪ್ ದಾಟಿದೆ. ಆದರೆ ದೈನಂದಿನ ಬಳಕೆದಾರರ ಸಂಖ್ಯೆಯಲ್ಲಿ ಥ್ರೆಡ್ಸ್ ತೀರಾ ಹಿಂದೆ ಬಿದ್ದಿದೆ. ಆರಂಭದಲ್ಲಿ ಥ್ರೆಡ್ಸ್ ಪ್ಲಾಟ್ಫಾರ್ಮ್ನಲ್ಲಿ ಬಳಕೆದಾರನೋರ್ವ ಸರಾಸರಿ 20 ನಿಮಿಷ ಸಮಯ ವ್ಯಯಿಸುತ್ತಿದ್ದ. ಆದರೆ ಈ ಅವಧಿ ಇದೀಗ ಶೇಕಡಾ 50 ರಷ್ಟು ಕುಸಿತವಾಗಿ ಕೇವಲ 10 ನಿಮಿಷ ಮಾತ್ರ ಉಳಿದಿದೆ. ಸೆನ್ಸರ್ ಟವರ್ ಡೇಟಾ ಪ್ರಕಾರ, ಜುಲೈ 5 ರಂದು ಥ್ರೆಡ್ಸ್ ಪ್ಲಾಟ್ಫಾರ್ಮ್ ಪ್ರಾರಂಭವಾದಾಗಿನಿಂದ ಅದರ ದೈನಂದಿನ ಸಕ್ರಿಯ ಬಳಕೆದಾರರ ಸಂಖ್ಯೆ ಸುಮಾರು ಶೇಕಡಾ 20 ರಷ್ಟು ಕಡಿಮೆಯಾಗಿದೆ.
ಸಿಮಿಲರ್ ವೆಬ್‌ ಡೇಟಾ ಪ್ರಕಾರ ಜಾಗತಿಕವಾಗಿ ಆ್ಯಂಡ್ರಾಯ್ಡ್ ಫೋನ್‌ಗಳಲ್ಲಿ ಥ್ರೆಡ್ಸ್ನ ದೈನಂದಿನ ಸಕ್ರಿಯ ಬಳಕೆದಾರರ ಪ್ರಮಾಣ ಶೇಕಡಾ 25 ಕ್ಕಿಂತ ಹೆಚ್ಚು ಕುಸಿತವಾಗಿದೆ. ಬಳಕೆಯ ಸಮಯವು ಶೇಕಡಾ 50ಕ್ಕಿಂತ ಹೆಚ್ಚು ಕಡಿಮೆಯಾಗಿದೆ ಎಂದು ಅದು ಹೇಳಿದೆ. ಆದಾಗ್ಯೂ, ಇವು ಆರಂಭಿಕ ದಿನಗಳಾಗಿದ್ದು, ಮೆಟಾ ಟ್ವಿಟರ್ ತರಹದ ವೈಶಿಷ್ಟ್ಯಗಳನ್ನು ಪರಿಚಯಿಸಿದಂತೆ, ದೈನಂದಿನ ಬಳಕೆಯು ಹೆಚ್ಚಾಗಬಹುದು ಮತ್ತು ಥ್ರೆಡ್ಸ್ ಮತ್ತೆ ಮುನ್ನಡೆ ಸಾಧಿಸಬಹುದು ಎನ್ನಲಾಗಿದೆ.
"ಇವು ಆರಂಭಿಕ ದಿನಗಳಾಗಿದ್ದರೂ, ಥ್ರೆಡ್ಸ್ನ ಆರಂಭಿಕ ಯಶಸ್ಸಿನ ಬಗ್ಗೆ ನಾವು ಉತ್ಸುಕರಾಗಿದ್ದೇವೆ. ಇದು ನಮ್ಮ ನಿರೀಕ್ಷೆಗಳನ್ನು ಮೀರಿದೆ. ನಾವು ಕೇವಲ ಒಂದು ವಾರದ ಹಿಂದೆ ಅಪ್ಲಿಕೇಶನ್ ಅನ್ನು ಪ್ರಾರಂಭಿಸಿದ್ದೇವೆ ಮತ್ತು ಸ್ಥಿರ ಕಾರ್ಯಕ್ಷಮತೆಯನ್ನು ಖಚಿತಪಡಿಸಿಕೊಳ್ಳುವುದು, ಹೊಸ ವೈಶಿಷ್ಟ್ಯಗಳನ್ನು ತಲುಪಿಸುವುದು ಮತ್ತು ಮುಂಬರುವ ತಿಂಗಳುಗಳಲ್ಲಿ ಅನುಭವವನ್ನು ಸುಧಾರಿಸುವುದನ್ನು ಮುಂದುವರಿಸುವುದರತ್ತ ನಾವು ನಮ್ಮ ಗಮನ ಕೇಂದ್ರೀಕರಿಸಿದ್ದೇವೆ” ಎಂದು ಕಂಪನಿಯ ವಕ್ತಾರರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
data.ai ಪ್ರಕಾರ ಥ್ರೆಡ್ಸ್ ಆ್ಯಪ್ ಡೌನ್‌ಲೋಡ್‌ಗಳ ವಿಷಯದಲ್ಲಿ ಭಾರತವು ಮುಂಚೂಣಿಯಲ್ಲಿದ್ದು, ಜಾಗತಿಕ ಡೌನ್‌ಲೋಡ್‌ಗಳ ಪೈಕಿ ಶೇಕಡಾ 33 ರಷ್ಟು ಪಾಲು ಹೊಂದಿದೆ. ಬ್ರೆಜಿಲ್ (ಶೇ 22) ಮತ್ತು ಯುಎಸ್ (ಶೇ 16) ನಂತರದ ಸ್ಥಾನದಲ್ಲಿವೆ. ಏತನ್ಮಧ್ಯೆ ಜಾಗತಿಕವಾಗಿ ಟ್ವಿಟರ್ ಬಳಕೆ ಶೇ 3.5ರಷ್ಟು ಹೆಚ್ಚಾಗಿದೆ ಎಂದು ಮಸ್ಕ್ ಹೇಳಿದ್ದಾರೆ. ಪ್ರೊಫೈಲ್ ಪುಟ ವೀಕ್ಷಣೆಗಳಿಂದ ಬರುವ ಜಾಹೀರಾತು ಆದಾಯವನ್ನು ಕೂಡ ಶೀಘ್ರದಲ್ಲೇ ಬಳಕೆದಾರರೊಂದಿಗೆ ಹಂಚಿಕೊಳ್ಳುವುದಾಗಿ ಟ್ವಿಟರ್ ಹೇಳಿದೆ. ಜಾಹೀರಾತಿನ ಆದಾಯದಲ್ಲಿ ಶೇಕಡಾ 50 ರಷ್ಟು ಕುಸಿತ ಮತ್ತು ಹಿಂದಿನಿಂದ ಬಂದ ಭಾರಿ ಸಾಲದ ಕಾರಣದಿಂದ ಟ್ವಿಟರ್ ಇನ್ನೂ ನಷ್ಟದಲ್ಲಿದೆ ಎಂದು ಮಸ್ಕ್ ಕಳೆದ ವಾರ ಹೇಳಿದ್ದರು.
ಏನಿದು ಥ್ರೆಡ್ಸ್?: ಥ್ರೆಡ್ಸ್ ಇದು ಇನ್ಸ್ಟಾಗ್ರಾಮ್ನ ಸ್ಪಿನ್-ಆಫ್ ಅಪ್ಲಿಕೇಶನ್ ಆಗಿದ್ದು, ಇದು ವಿಷುವಲ್ ಕಂಟೆಂಟ್ಗಿಂತ ಹೆಚ್ಚಾಗಿ ಸಂಭಾಷಣೆಗಳ ಮೇಲೆ ಕೇಂದ್ರೀಕೃತವಾಗಿದೆ. ನಿಮ್ಮ ಇನ್ಸ್ಟಾಗ್ರಾಮ್ ಖಾತೆಯೊಂದಿಗೆ ಲಾಗ್ ಇನ್ ಮಾಡಬಹುದು ಮತ್ತು ಟೆಕ್ಸ್ಟ್ ಅಪ್ಡೇಟ್ಗಳನ್ನು ಹಂಚಿಕೊಳ್ಳಬಹುದು ಮತ್ತು ಸಾರ್ವಜನಿಕ ಚರ್ಚೆಗಳಲ್ಲಿ ಸೇರಬಹುದು. ಅಪ್ಲಿಕೇಶನ್ ವಿನ್ಯಾಸದಲ್ಲಿ ಇನ್ಸ್ಟಾಗ್ರಾಮ್ ಕಾಮೆಂಟ್ ವಿಭಾಗವನ್ನು ಹೋಲುತ್ತದೆ. ಆದರೆ ಪೋಸ್ಟ್‌ಗಳಿಗೆ ಪ್ರತ್ಯುತ್ತರ ಮತ್ತು ಮರು-ಹಂಚಿಕೆಯಂತಹ ಟ್ವಿಟರ್ ರೀತಿಯ ವೈಶಿಷ್ಟ್ಯಗಳನ್ನು ಹೊಂದಿದೆ. ನೀವು 500 ಅಕ್ಷರಗಳವರೆಗಿನ ಪೋಸ್ಟ್‌ಗಳನ್ನು (ಟ್ವಿಟ್ಟರ್‌ನ 280 ಕ್ಕಿಂತ ಹೆಚ್ಚು), ಲಿಂಕ್‌ಗಳು, 10 ಫೋಟೋ ಮತ್ತು 5 ನಿಮಿಷಗಳವರೆಗೆ ವೀಡಿಯೊಗಳನ್ನು ಶೇರ್ ಮಾಡಬಹುದು.
ಇದನ್ನೂ ಓದಿ : ಮೆಟಾದ ಚಾಟ್ಬಾಟ್ CM3leon; ಪಠ್ಯ, ಚಿತ್ರ ವಿನ್ಯಾಸಕ್ಕೆ ಬಂದಿದೆ 'ಊಸರವಳ್ಳಿ'
