ಗುರುತಿಸಲಾಗದ ವೈಮಾನಿಕ ವಿದ್ಯಮಾನಗಳ ಬಗ್ಗೆ ಅಮೆರಿಕ ಮರೆ ಮಾಚುತ್ತಿದೆ: ಮಾಜಿ ಗುಪ್ತಚರ ಅಧಿಕಾರಿ!

ಗುರುತಿಸಲಾಗದ ವೈಮಾನಿಕ ವಿದ್ಯಮಾನಗಳ ಬಗ್ಗೆ ಅಮೆರಿಕ ಸರ್ಕಾರದ ಬಳಿ ಮಾಹಿತಿ ಇದ್ದು, ಇದನ್ನು ಮರೆ ಮಾಚಲಾಗುತ್ತಿದೆ ಎಂದು ಅಮೆರಿಕದ ವಾಯುಪಡೆಯ ಮಾಜಿ ಗುಪ್ತಚರ ಅಧಿಕಾರಿ ಡೇವಿಡ್ ಗ್ರಶ್ ಆರೋಪಿಸಿದ್ದಾರೆ.

ವಾಷಿಂಗ್ಟನ್ (ಅಮೆರಿಕ): ಅಮೆರಿಕವು ಗುರುತಿಸಲಾಗದ ಹಾರುವ ವಸ್ತುಗಳು (Unidentified Aerial Phenomena - UFO) ಕುರಿತು ದೀರ್ಘಕಾಲದ ಕಾರ್ಯಕ್ರಮವನ್ನು ಮರೆಮಾಚುತ್ತಿದೆ ಎಂದು ಮಾಜಿ ವಾಯುಪಡೆಯ ಗುಪ್ತಚರ ಅಧಿಕಾರಿಯೊಬ್ಬರು ಬುಧವಾರ ಅಮೆರಿಕ​ ಸಂಸತ್ತಿನ ಕಾಂಗ್ರೆಸ್‌ಗೆ ತಿಳಿಸಿದ್ದಾರೆ. ಇದಕ್ಕೆ ಸಂಬಂಧಿಸಿದ ಕೆಲವು ಪುರಾವೆಗಳನ್ನು ಅವರು ಒದಗಿಸಿದ್ದಾರೆ. ಆದರೆ, ಇದನ್ನು ಪೆಂಟಗನ್ ಕಚೇರಿ ತಳ್ಳಿ ಹಾಕಿದೆ.

ಗುರುತಿಸಲಾಗದ ಹಾರುವ ವಸ್ತುಗಳನ್ನು ಗುರುತಿಸಲಾಗದ ವೈಮಾನಿಕ ವಿದ್ಯಮಾನಗಳು (Unidentified Aerial Phenomena - UFO) ಎಂದು ಕರೆಯಲಾಗುತ್ತದೆ. ಇವುಗಳನ್ನು ಅಮೆರಿಕ ಸರ್ಕಾರವು ಗುರುತಿಸಲಾದ ಅಸಂಗತ ವಿದ್ಯಮಾನ (Unidentified flying object - UAP)ಗಳೆಂದು ತನ್ನ ಅಧಿಕೃತ ಪದದೊಂದಿಗೆ ಬಳಸುತ್ತದೆ. ಇದೀಗ ಅಮೆರಿಕದ ವಾಯುಪಡೆಯ ಮಾಜಿ ಗುಪ್ತಚರ ಅಧಿಕಾರಿ ಡೇವಿಡ್ ಗ್ರಶ್, ಯುಎಫ್​ಒಗಳ ಬಗ್ಗೆ ಕೆಲವು ವಿಷಯಗಳನ್ನು ಅಮೆರಿಕ ಮರೆ ಮಾಚುತ್ತಿದೆ ಎಂದು ಹೇಳಿದ್ದಾರೆ.

2019ರಲ್ಲಿ ಟಾಸ್ಕ್‌ಫೋರ್ಸ್ ಮಿಷನ್‌ಗಾಗಿ ಹೆಚ್ಚು ವರ್ಗೀಕರಿಸಿದ ಕಾರ್ಯಕ್ರಮಗಳನ್ನು ಗುರುತಿಸಲು ಯುಎಪಿಗಳ ಬಗ್ಗೆ ಸರ್ಕಾರದ ಕಾರ್ಯಪಡೆಯ ಮುಖ್ಯಸ್ಥರು ಕೇಳಿದ್ದಾರೆ. ಇದೇ ಸಮಯದಲ್ಲಿ ಈ ವಿಷಯವನ್ನು ಅಮೆರಿಕದ ಬೇಹುಗಾರಿಕಾ ಉಪಗ್ರಹಗಳನ್ನು ನಿರ್ವಹಿಸುವ ರಾಷ್ಟ್ರೀಯ ವಿಚಕ್ಷಣಾ ಕಚೇರಿ (National Reconnaissance Office)ಗೆ ವಿವರಿಸಲಾಗಿದೆ ಎಂದು ಡೇವಿಡ್ ಗ್ರಶ್ ತಿಳಿಸಿದ್ದಾರೆ.

ಇದನ್ನೂ ಓದಿ: ಭಾರತದ ಅಕ್ಕಿ ರಫ್ತು ನಿಷೇಧದಿಂದ ಅಮೆರಿಕದಲ್ಲಿ ಎಫೆಕ್ಟ್​: 'ಕುಟುಂಬಕ್ಕೊಂದೇ ಅಕ್ಕಿ ಚೀಲ'

ಬಹು ದಶಕಗಳ ಯುಎಪಿ ಕ್ರ್ಯಾಶ್ ರಿಟ್ರೀವಲ್ ಮತ್ತು ರಿವರ್ಸ್ ಎಂಜಿನಿಯರಿಂಗ್ ಪ್ರೋಗ್ರಾಂಗೆ ನನ್ನ ಅಧಿಕೃತ ಕರ್ತವ್ಯಗಳ ಸಂದರ್ಭದಲ್ಲಿ ನನಗೆ ಪ್ರವೇಶ ನಿರಾಕರಿಸಲಾಗಿತ್ತು ಎಂದು ಡೇವಿಡ್ ಗ್ರಶ್ ಹೇಳಿದ್ದಾರೆ. ಇದೇ ವೇಳೆ, ಅನ್ಯಗ್ರಹ ಜೀವಿಗಳ ಬಗ್ಗೆ ಅಮೆರಿಕ ಸರ್ಕಾರಕ್ಕೆ ಮಾಹಿತಿ ಇದೆಯೇ ಎಂಬ ಪ್ರಶ್ನೆಗೆ ಪ್ರತಿಕ್ರಿಯಿಸಿ, 1930ರ ದಶಕದಿಂದಲೂ ಮಾನವೇತರ ಚಟುವಟಿಕೆಗಳ ಬಗ್ಗೆ ತಿಳಿದುಕೊಳ್ಳಲು ಅಮೆರಿಕಕ್ಕೆ ಅವಕಾಶವಿದೆ ಎಂದು ವಿವರಿಸಿದ್ದಾರೆ.

ಮಾನವರಂತೆಯೇ ಇತರ ಗ್ರಹಗಳಲ್ಲೂ ಜೀವಿಗಳಿವೆ ಎಂಬುದಕ್ಕೆ ಅಮೆರಿಕದ ಬಳಿಯೂ ಪುರಾವೆಗಳಿವೆ. ಇದರಿಂದ ಸಂಗ್ರಹಿಸಲಾದ ಮಾನವೇತರ ಅವಶೇಷಗಳ ಬಗ್ಗೆಯೂ ತನಿಖೆ ಮುಂದುವರಿದಿದೆ ಮತ್ತು ಗುಪ್ತಚರ ಸಂಸ್ಥೆಗಳು ಸಂಪೂರ್ಣ ವಿವರಗಳನ್ನು ಸರ್ಕಾರಕ್ಕೆ ಮೊದಲೇ ಸಲ್ಲಿಸಿವೆ. ಅಪಘಾತಕ್ಕೀಡಾದ ಕ್ರಾಫ್ಟ್ ಮತ್ತು ಅದರ ಪೈಲಟ್‌ಗಳು ನಿಜ. ಈ ಬಗ್ಗೆ ನನ್ನ ಬಳಿ ಮಾಹಿತಿ ಇದೆ. ದಶಕಗಳಿಂದ ಇದಕ್ಕೆ ಸಂಬಂಧಿಸಿದ ಸಂಶೋಧನೆಗಳು ನಡೆಯುತ್ತಿವೆ ಎಂದು ಡೇವಿಡ್ ಗ್ರಶ್ ಮಾಹಿತಿ ನೀಡಿದ್ದಾರೆ.

ಮತ್ತೊಂದೆಡೆ, ಡೇವಿಡ್ ಗ್ರಶ್ ಹೇಳಿಕೆಗಳನ್ನು ಪೆಂಟಗನ್​ ಕಚೇರಿ ನಿರಾಕರಿಸಿದೆ. ರಕ್ಷಣಾ ಇಲಾಖೆಯ ವಕ್ತಾರ ಸ್ಯೂ ಗಾಫ್ ಹೇಳಿಕೆ ಬಿಡುಗಡೆ ಮಾಡಿದ್ದು, ಅನ್ಯಗ್ರಹ ವಸ್ತುಗಳ ಸ್ವಾಧೀನ ಅಥವಾ ರಿವರ್ಸ್ ಎಂಜಿನಿಯರಿಂಗ್ ಬಗ್ಗೆ ಯಾವುದೇ ಕಾರ್ಯಕ್ರಮಗಳು ಹಿಂದೆ ಅಸ್ತಿತ್ವದಲ್ಲಿರುವ ಬಗ್ಗೆ ಅಥವಾ ಪ್ರಸ್ತುತ ಅಸ್ತಿತ್ವದಲ್ಲಿವೆ ಎಂದು ಸಮರ್ಥಿಸಲು ಯಾವುದೇ ಮಾಹಿತಿ ಇಲ್ಲ ಎಂದು ತಿಳಿಸಿದ್ದಾರೆ.

ಇದನ್ನೂ ಓದಿ: ವಿಶ್ವಾದ್ಯಂತ ಪ್ರೀಮಿಯಂ ಚಂದಾದಾರಿಕೆ ಯೋಜನೆ ದರ ಹೆಚ್ಚಿಸಿದ Spotify