ಮಾಸ್ಕೋ (ರಷ್ಯಾ): ಈ ತಿಂಗಳ ಆರಂಭದಲ್ಲಿ ಉಡಾವಣೆಯಾದ ರಷ್ಯಾದ 'ಲೂನಾ-25' ಎಂಬ ಬಾಹ್ಯಾಕಾಶ ನೌಕೆಯಲ್ಲಿ ಚಂದ್ರನ ಕಕ್ಷೆ ತಲುಪಲು ಸಿದ್ಧತೆ ನಡೆಸುತ್ತಿದ್ದ ವೇಳೆ ತಾಂತ್ರಿಕ ದೋಷ ಕಾಣಿಸಿಕೊಂಡಿದೆ ಎಂದು ರಷ್ಯಾ ಬಾಹ್ಯಾಕಾಶ ಸಂಸ್ಥೆ 'ರೋಸ್ಕೋಸ್ಮಾಸ್' ತಿಳಿಸಿದೆ. ಗಗನ ನೌಕೆಯು ಪೂರ್ವಲ್ಯಾಂಡಿಂಗ್ ಕಕ್ಷೆ ಪ್ರವೇಶಿಸಲು ಪ್ರಯತ್ನಿಸುತ್ತಿದ್ದಾಗ ತಾಂತ್ರಿಕ ದೋಷ ಉದ್ಭವಿಸಿತು. ತಜ್ಞರು ಪರಿಸ್ಥಿತಿಯನ್ನು ಪರಿಶೀಲಿಸುತ್ತಿದ್ದಾರೆ ಎಂದು ರೋಸ್ಕೋಸ್ಮಾಸ್ ಟೆಲಿಗ್ರಾಮ್ ಪೋಸ್ಟ್ನಲ್ಲಿ ಮಾಹಿತಿ ನೀಡಿದೆ.
ಕುತೂಹಲದ ಸಂಗತಿಯೆಂದರೆ, ಜುಲೈ 14ರಂದು ಉಡಾವಣೆಗೊಂಡು ಆಗಸ್ಟ್ 6ರಂದು ಚಂದ್ರನ ಕಕ್ಷೆ ತಲುಪಿದ ಭಾರತದ ಚಂದ್ರಯಾನ-3 ನೌಕೆಯಂತೆ ಲೂನಾ-25 ಅದೇ ಸಮಯದಲ್ಲಿ ಮತ್ತು ಅದೇ ಸಾಮಾನ್ಯ ಪ್ರದೇಶದಲ್ಲಿಯೇ ಇಳಿಯಲಿದೆ ಎಂದು ರಷ್ಯಾ ಹೇಳಿತ್ತು. ಭಾರತೀಯ ಬಾಹ್ಯಾಕಾಶ ನೌಕೆಗೂ ಮುಂಚಿತವಾಗಿಯೇ ರಷ್ಯಾದ ಬಾಹ್ಯಾಕಾಶ ನೌಕೆಯನ್ನು ಸೋಮವಾರ ಚಂದ್ರನ ದಕ್ಷಿಣ ಧ್ರುವದಲ್ಲಿ ಇಳಿಯಲು ಸಮಯ ನಿಗದಿಪಡಿಸಲಾಗಿತ್ತು.
ಚಂದ್ರನ ದಕ್ಷಿಣ ಧ್ರುವದಲ್ಲೇನಿದೆ?: ಚಂದ್ರನ ದಕ್ಷಿಣ ಧ್ರುವ ವಿಜ್ಞಾನಿಗಳಿಗೆ ಆಸಕ್ತಿದಾಯಕ ಪ್ರದೇಶ. ಚಂದ್ರನಲ್ಲಿ ಘನೀಕರಣಗೊಂಡಿರುವ ನೀರು ಮತ್ತು ಅಮೂಲ್ಯ ಅಂಶಗಳ ಕುರಿತು ಅನ್ವೇಷಣೆ ನಡೆಸಲು ಉದ್ದೇಶಿಸಲಾಗಿದೆ. ಬಂಡೆಗಳಲ್ಲಿನ ಹೆಪ್ಪುಗಟ್ಟಿದ ನೀರನ್ನು ಭವಿಷ್ಯದ ರಾಕೆಟ್ ಇಂಧನವಾಗಿ ಪರಿವರ್ತಿಸಬಹುದು.
ರೋಸ್ಕೊಸ್ಮೊಸ್ ಬಾಹ್ಯಾಕಾಶ ನೌಕೆಯಿಂದ ತೆಗೆದ ಚಂದ್ರನ ದಕ್ಷಿಣ ಗೋಳಾರ್ಧದಲ್ಲಿರುವ ಮೂರನೇ ಅತಿದೊಡ್ಡ ಝೀಮನ್ ಕುಳಿ ಇರುವ ಚಿತ್ರಗಳನ್ನು ರೋಸ್ಕೋಸ್ಮಾಸ್ ಹಂಚಿಕೊಂಡಿದೆ. ಈ ಕುಳಿಯು 190 ಕಿ.ಮೀ (118 ಮೈಲುಗಳು) ವ್ಯಾಸ ಹೊಂದಿದೆ ಹಾಗೂ 8 ಕಿ.ಮೀ (ಐದು ಮೈಲುಗಳು) ಆಳವಾಗಿದೆ.
