ಲಂಡನ್(ಬ್ರಿಟನ್) : ಕೆಂಪು ಸಮುದ್ರದಲ್ಲಿ ವಾಣಿಜ್ಯ ಹಡಗುಗಳ ಮೇಲೆ ನಡೆಯುತ್ತಿರುವ ದಾಳಿಗಳಿಂದಾಗಿ ತೈಲ ಮತ್ತು ಇತರ ಸರಕುಗಳ ಬೆಲೆಗಳು ಹೆಚ್ಚಾಗುವ ಅಪಾಯವಿದೆ ಎಂದು ವಿಶ್ಲೇಷಕರು ಎಚ್ಚರಿಸಿದ್ದಾರೆ ಎಂದು ಮಾಧ್ಯಮ ವರದಿಯೊಂದು ತಿಳಿಸಿದೆ. ಯೆಮೆನ್ ನ ಹೌತಿ ಬಂಡುಕೋರರು ಹಡಗುಗಳ ಮೇಲೆ ಸತತವಾಗಿ ದಾಳಿ ನಡೆಸುತ್ತಿರುವುದರಿಂದ ಹಲವಾರು ಶಿಪ್ಪಿಂಗ್ ಕಂಪನಿಗಳು ಈ ಮಾರ್ಗದ ಮೂಲಕ ಸಾಗಣೆಯನ್ನು ಸ್ಥಗಿತಗೊಳಿಸಿವೆ ಎಂದು ಬಿಬಿಸಿ ವರದಿ ಮಾಡಿದೆ. ವಿಶ್ವದ ಎರಡನೇ ಅತಿದೊಡ್ಡ ಹಡಗು ಸಾರಿಗೆ ಕಂಪನಿ ಮೆರ್ಸ್ಕ್ ಮಂಗಳವಾರ ತನ್ನ ಕೆಲವು ಹಡಗುಗಳನ್ನು ಆಫ್ರಿಕಾದ ಕೇಪ್ ಆಫ್ ಗುಡ್ ಹೋಪ್ ಮೂಲಕ ಸಾಗಿಸುವುದಾಗಿ ಹೇಳಿದೆ.
ಕೆಂಪು ಸಮುದ್ರದಲ್ಲಿ ಹೌತಿಗಳ ದಾಳಿಯಿಂದ ಹಡಗುಗಳನ್ನು ರಕ್ಷಿಸಲು ಈಗ ಅಮೆರಿಕ ಸ್ವತಃ ಮುಂದಾಗಿದ್ದು, ಇದಕ್ಕಾಗಿ ಯುಕೆ, ಕೆನಡಾ, ಫ್ರಾನ್ಸ್, ಬಹ್ರೇನ್, ನಾರ್ವೆ ಮತ್ತು ಸ್ಪೇನ್ ದೇಶಗಳನ್ನೊಳಗೊಂಡ 'ಆಪರೇಷನ್ ಪ್ರಾಸ್ಪೆರಿಟಿ ಗಾರ್ಡಿಯನ್' ಹೆಸರಿನ ರಕ್ಷಣಾ ಕಾರ್ಯಾಚರಣೆ ಆರಂಭಿಸಿದೆ. ಏತನ್ಮಧ್ಯೆ, ಅಮೆರಿಕ ರಕ್ಷಣಾ ಕಾರ್ಯದರ್ಶಿ ಲಾಯ್ಡ್ ಆಸ್ಟಿನ್ ಮಂಗಳವಾರ 40 ಕ್ಕೂ ಹೆಚ್ಚು ದೇಶಗಳ ಸಚಿವರೊಂದಿಗೆ ವರ್ಚುಯಲ್ ಸಭೆ ನಡೆಸಿ ಭದ್ರತಾ ಪ್ರಯತ್ನಗಳಲ್ಲಿ ಭಾಗಿಯಾಗುವಂತೆ ದೇಶಗಳಿಗೆ ಕರೆ ನೀಡಿದರು.
"ಈ ದುಷ್ಟ ಹೌತಿ ದಾಳಿಗಳು ಗಂಭೀರ ಅಂತಾರಾಷ್ಟ್ರೀಯ ಸಮಸ್ಯೆಯಾಗಿದೆ ಮತ್ತು ಇದಕ್ಕೆ ಅಂತಾರಾಷ್ಟ್ರೀಯ ಸಮುದಾಯ ಸೂಕ್ತ ಉತ್ತರ ನೀಡಬೇಕಿದೆ" ಎಂದು ಅವರು ಹೇಳಿದರು. ಕೆಂಪು ಸಮುದ್ರವು ತೈಲ ಮತ್ತು ದ್ರವೀಕೃತ ನೈಸರ್ಗಿಕ ಅನಿಲ ಮತ್ತು ಗ್ರಾಹಕ ಸರಕುಗಳ ಸಾಗಣೆಗೆ ವಿಶ್ವದ ಪ್ರಮುಖ ಮಾರ್ಗಗಳಲ್ಲಿ ಒಂದಾಗಿದೆ. ಇದು ದಕ್ಷಿಣದಲ್ಲಿ ಯೆಮೆನ್ ಕರಾವಳಿ ಮತ್ತು ಉತ್ತರದಲ್ಲಿ ಸೂಯೆಜ್ ಕಾಲುವೆಯ ಬಳಿ ಗೇಟ್ ಆಫ್ ಟೀಯರ್ಸ್ ಎಂದೂ ಕರೆಯಲ್ಪಡುವ ಬಾಬ್ ಅಲ್ - ಮಂದಾಬ್ ಜಲಸಂಧಿಯಿಂದ ಕೂಡಿದೆ.
ಇಸ್ರೇಲ್ ಮತ್ತು ಹಮಾಸ್ ಯುದ್ಧದಲ್ಲಿ ಹೌತಿಗಳು ಹಮಾಸ್ಗೆ ತಮ್ಮ ಬೆಂಬಲ ಘೋಷಿಸಿದೆ. ಹೀಗಾಗಿ ಇಸ್ರೇಲ್ಗೆ ತೆರಳುತ್ತಿವೆ ಎಂದು ಕಂಡು ಬರುವ ವಾಣಿಜ್ಯ ಹಡಗುಗಳ ಮೇಲೆ ಹೌತಿ ಉಗ್ರವಾದಿಗಳು ರಾಕೆಟ್ ದಾಳಿ ನಡೆಸುತ್ತಿದ್ದಾರೆ. ಕೆಂಪು ಸಮುದ್ರದ ಮೂಲಕ ಹಡಗು ಪ್ರಯಾಣದ ಸುರಕ್ಷತೆಗೆ ಅಂತಾ ರಾಷ್ಟ್ರೀಯ ಕಾರ್ಯಾಚರಣೆ ಆರಂಭವಾಗಿದ್ದರೂ ಆ ಮಾರ್ಗದಲ್ಲಿ ಈಗಲೇ ತನ್ನ ಹಡಗುಗಳನ್ನು ಸಾಗಣೆ ಮಾಡುವುದಿಲ್ಲ ಎಂದು ಮೆರ್ಸ್ಕ್ ಹೇಳಿದೆ.
ಇದನ್ನೂ ಓದಿ : ವಿದೇಶಿ ಹಣ ಒಳಹರಿವಿನಲ್ಲಿ ಭಾರತ ಟಾಪ್; 2023ರಲ್ಲಿ ಬಂದಿದ್ದು $125 ಬಿಲಿಯನ್
