ನವದೆಹಲಿ: ಚೀನಾದಲ್ಲಿ ಕೊರೊನಾ ಅಟ್ಟಹಾಸ ಮೇರೆ ಮೀರಿದೆ ಎಂದು ವರದಿಯಾಗುತ್ತಿದೆ. ಒಂದೇ ದಿನದಲ್ಲಿ ಸುಮಾರು 37 ಮಿಲಿಯನ್ ಜನರು ಅಂದರೆ 3 ಕೋಟಿಗೂ ಹೆಚ್ಚಿನ ಮಂದಿ ಕೋವಿಡ್ -19 ಸೋಂಕಿಗೆ ಒಳಗಾಗಿರಬಹುದು ಸರ್ಕಾರದ ಉನ್ನತ ಆರೋಗ್ಯ ಪ್ರಾಧಿಕಾರದ ಅಂದಾಜು ಮಾಡಿದೆ. ಇದು ವಿಶ್ವದ ಅತಿದೊಡ್ಡ ಸೋಂಕಿನ ಸಂಖ್ಯೆ ಆಗಿದೆ ಎಂದು ಬ್ಲೂಮ್‌ಬರ್ಗ್ ವರದಿ ಮಾಡಿದೆ.
ಚೀನಾದ ರಾಷ್ಟ್ರೀಯ ಆರೋಗ್ಯ ಆಯೋಗದ ಆಂತರಿಕ ಸಭೆಯಲ್ಲಿ ನಡೆದ ವಿಷಯಗಳ ಪ್ರಕಾರ, 248( 24ಕೋಟಿ) ಮಿಲಿಯನ್ ಜನರು ಅಥವಾ ಜನಸಂಖ್ಯೆಯ ಸುಮಾರು 18 ಪ್ರತಿಶತದಷ್ಟು ಜನರು ವೈರಸ್‌ಗೆ ತುತ್ತಾಗುವ ಇಲ್ಲವೇ ತುತ್ತಾಗಿರುವ ಸಾಧ್ಯತೆಯಿದೆ ಎಂದು ಹೇಳಲಾಗಿದೆ.
ಈ ವಾರಾಂತ್ಯದಲ್ಲಿ ಯಾವುದೇ ರೋಗಲಕ್ಷಣಗಳು ಇಲ್ಲದವರು ಕೆಲಸಕ್ಕೆ ಹೋಗಬಹುದು ಎಂದು ಝೆಜಿಯಾಂಗ್ ಪ್ರಾಂತ್ಯದ ಅಧಿಕಾರಿಗಳು ಹೇಳಿದ್ದಾರೆ. ಇನ್ನು ಚೀನಾದ ಅತಿದೊಡ್ಡ ನಗರಗಳಲ್ಲಿ ಒಂದಾದ ಮತ್ತು ಪ್ರಮುಖ ಉತ್ಪಾದನಾ ಕೇಂದ್ರವಾದ ಚಾಂಗ್‌ಕಿಂಗ್ ಒಂದು ಹೆಜ್ಜೆ ಮುಂದೆ ಹೋಗಿದ್ದು, ಸೌಮ್ಯ ರೋಗಲಕ್ಷಣಗಳನ್ನು ಹೊಂದಿರುವವರಿಗೂ ಪರೀಕ್ಷೆಯಿಲ್ಲದೇ ಕಚೇರಿಗೆ ಮರಳಲು ಅವಕಾಶ ಮಾಡಿಕೊಟ್ಟಿದೆ.
ಮತ್ತೊಂದು ಕಡೆ ಬೀಜಿಂಗ್‌ನಲ್ಲಿನ ನಗರ ಅಧಿಕಾರಿಗಳು, ಈಗಾಗಲೇ ಕ್ವಾರಂಟೈನ್ನಲ್ಲಿರುವ ಕೋವಿಡ್ ಪಾಸಿಟಿವ್ ರೋಗಿಗಳು, ಜ್ವರ ಇಲ್ಲದೇ ಇರುವ ರೋಗಿಗಳು ಯಾವುದೇ ಪರೀಕ್ಷೆ ಇಲ್ಲದೇ ಕೆಲಸಕ್ಕೆ ಹಾಜರಾಗಬಹುದು ಎಂದು ಹೇಳಿದ್ದಾರೆ ಎಂದು ಫಾರ್ಚೂನ್ ವರದಿ ಮಾಡಿದೆ.
ಕೋವಿಡ್ ಏಕಾಏಕಿ ಸಂಪೂರ್ಣವಾಗಿ ನಿಗ್ರಹಿಸಲು ಬೀಜಿಂಗ್ ಲಾಕ್‌ಡೌನ್‌ ಮತ್ತು ಸಾಮೂಹಿಕ ಪರೀಕ್ಷೆಯ ಕಠಿಣ ನೀತಿಗೆ ಮೊರೆ ಹೋಗಿತ್ತು. ಆದರೆ ಜನರು ದಂಗೆ ಏಳುವ ಹಾಗೂ ಆರ್ಥಿಕತೆ ಪೆಟ್ಟು ನೀಡುತ್ತಿರುವ ಹಿನ್ನೆಲೆಯಲ್ಲಿ ತನ್ನ ಕಠಿಣ ನೀತಿಯಲ್ಲಿ ಹಲವು ಬದಲಾವಣೆಗಳನ್ನು ಮಾಡಿಕೊಂಡಿದೆ ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡುತ್ತಿವೆ.
ಇದೀಗ ಚೀನಾ ತನ್ನ ಕೋವಿಡ್ ನಿಯಂತ್ರಣಗಳನ್ನು ತ್ವರಿತವಾಗಿ ಸರಾಗಗೊಳಿಸುತ್ತಿದ್ದಾರೆ. ಆದರೆ, ಪ್ರಕರಣಗಳ ತ್ವರಿತ ಉಲ್ಬಣಗೊಳ್ಳುತ್ತಿದೆ. ಇದು ಚೀನಾ ಜನರನ್ನು ಕಂಗಾಲಾಗುವಂತೆ ಮಾಡಿದೆ.ಈ ನಡುವೆ ಅಧಿಕಾರಿಗಳು ಜನರಿಗೆ ಧೈರ್ಯ ತುಂಬಲು ಪ್ರಯತ್ನಿಸುತ್ತಿದ್ದಾರೆ.
ಇದನ್ನು ಓದಿ:ತವಾಂಗ್ ಸಂಘರ್ಷ; ಭಾರತ - ಚೀನಾ ದ್ವಿಪಕ್ಷೀಯ ಸಂಬಂಧ ಬಲವರ್ಧನೆಗೆ ಅಡ್ಡಿ
