ವಿಶ್ವದ ನಂ.1 ಧನಿಕ ಟೆಸ್ಲಾ ಸಿಇಒ ಎಲಾನ್ ಮಸ್ಕ್ರ ಟ್ವಿಟ್ಟರ್ ಖರೀದಿ ಮಾಡುವ ಕನಸಿಗೆ ಹಿನ್ನಡೆ ಉಂಟಾಗಿದೆ. ಟ್ವಿಟ್ಟರ್ ನಿರ್ದೇಶಕರ ಮಂಡಳಿಯು ಎಲಾನ್ಮಸ್ಕ್ ಅವರ ಈ ಆಫರ್ ಅನ್ನು ಅಧಿಕೃತವಾಗಿ ತಿರಸ್ಕರಿಸಿದೆ. ಅಲ್ಲದೇ, ಟ್ವಿಟ್ಟರ್ ಮೇಲೆ ಅಧಿಕಾರ ಸ್ಥಾಪನೆಯ ವಿರುದ್ಧ ನಿರ್ಬಂಧವಾಗಿ 'ಷೇರುದಾರರ ಹಕ್ಕುಗಳ ಯೋಜನೆ'ಯನ್ನು ರೂಪಿಸಿದೆ.
ವಿಶ್ವದ ಶ್ರೀಮಂತ ವ್ಯಕ್ತಿಯಾದ ಎಲಾನ್ ಮಸ್ಕ್ ಟ್ವಿಟರ್ನಲ್ಲಿ 100 ಪ್ರತಿಶತ ಪಾಲನ್ನು ಖರೀದಿಸುವ ಪ್ರಸ್ತಾಪವನ್ನು ಮುಂದಿಟ್ಟಿದ್ದರು. ಇದಕ್ಕಾಗಿ ಅವರು ನಗದು ಹಣ ಪಾವತಿಗೆ ಸಿದ್ಧ ಎಂದು ಹೇಳಿದ್ದರು. ಆದರೆ, ಇದೀಗ ಟ್ವಿಟರ್ ಸಂಸ್ಥೆ ಮಸ್ಕ್ ಅವರ ಈ ಆಫರ್ಅನ್ನು ತಿರಸ್ಕರಿಸಿದೆ. ನಿರ್ದೇಶಕರ ಮಂಡಳಿಯು ಅಧಿಕೃತ ಪತ್ರಿಕಾ ಪ್ರಕಟಣೆ ಹೊರಡಿಸಿದ್ದು, ಟ್ವಿಟ್ಟರ್ ಅನ್ನು ಸ್ವಾಧೀನಪಡಿಸಿಕೊಳ್ಳಲು ಅಪೇಕ್ಷಿಸದ, ಕ್ರಮಬದ್ಧವಲ್ಲದ ರೀತಿಯಲ್ಲಿ ಹಕ್ಕುಗಳನ್ನು ಸ್ಥಾಪಿಸಲು ಮುಂದಾದ ಎಲಾನ್ ಮಸ್ಕ್ರ ನಿರ್ಧಾರ ಸಮಂಜಸವಲ್ಲ. ಷೇರುದಾರರ ಹಕ್ಕುಗಳ ರಕ್ಷಣೆ ಯೋಜನೆ ರೂಪಿಸಲಾಗುವುದು ಎಂದು ಅದು ತಿಳಿಸಿದೆ.
ಎಲಾನ್ ಮಸ್ಕ್ ಟ್ವಿಟ್ಟರ್ನಲ್ಲಿ ಶೇ.9ರಷ್ಟು ಹೂಡಿಕೆ ಮಾಡಿದ್ದಾರೆ. ಅಲ್ಲದೇ, ಇತ್ತೀಚೆಗಷ್ಟೇ ಸಂಸ್ಥೆಯ ಆಡಳಿತ ಮಂಡಳಿಯ ಸದಸ್ಯತ್ವ ಸ್ಥಾನವನ್ನು ತಿರಸ್ಕರಿಸಿದ್ದರು. ಬಳಿಕ ಪೂರ್ಣವಾಗಿ ಟ್ವಿಟ್ಟರ್ ಖರೀದಿ ಮಾಡುವೆ. ಇಲ್ಲವಾದರೆ, ಕಂಪನಿಯ ಜೊತೆಗಿನ ನನ್ನ ಸಹಭಾಗಿತ್ವವನ್ನು ಪರಿಶೀಲಿಸುವೆ ಎಂದು ತಿಳಿಸಿದ್ದರು.
ಓದಿ: ಮೂರೇ ದಿನದಲ್ಲಿ ₹4 ಕೋಟಿ ದೇಣಿಗೆ ಸಂಗ್ರಹ: 3 ಲಕ್ಷ ಭಕ್ತರಿಂದ ಶಿರಡಿ ಸಾಯಿಬಾಬಾ ದರ್ಶನ
