ವಾಷಿಂಗ್ಟನ್: ಉಕ್ರೇನ್ ರಾಜಧಾನಿ ಕೀವ್‌ ಮತ್ತು ಚೆರ್ನಿಹಿವ್‌ ಮೇಲೆ ಯುದ್ಧ ಕಡಿತ ಮಾಡುವುದಾಗಿ ರಷ್ಯಾ ನಿನ್ನೆ ಘೋಷಣೆ ಮಾಡಿರುವ ಬೆನ್ನಲ್ಲೇ ಈ ಬಗ್ಗೆ ಅಮೆರಿಕ ಅನುಮಾನ ವ್ಯಕ್ತಪಡಿಸಿದೆ.
ಶ್ವೇತಭವನದಲ್ಲಿ ಸಿಂಗಾಪುರದ ಪ್ರಧಾನಿ ಲೀ ಸಿಯೆನ್ ಲೂಂಗ್ ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆಗಳ ನಂತರ ಮಾತನಾಡಿದ ಅಧ್ಯಕ್ಷ ಜೋ ಬೈಡನ್‌, ಕೀವ್‌ ಬಳಿ ಸೇನಾ ಕಾರ್ಯಾಚರಣೆ ಕಡಿತ ಮಾಡುವ ರಷ್ಯಾದ ಘೋಷಣೆಯು ಯುದ್ಧದಲ್ಲಿ ಮೂಲಭೂತ ಬದಲಾವಣೆಗೆ ಕಾರಣವಾಗುತ್ತದೆ ಎಂದು ತನಗೆ ಇನ್ನೂ ಮನವರಿಕೆಯಾಗಿಲ್ಲ ಎಂದು ಹೇಳಿದ್ದಾರೆ.
ಉಕ್ರೇನ್ ಜೊತೆ ಮಾತುಕತೆಯಲ್ಲಿ ರಷ್ಯಾ ಎಂತಹ ಆಫರ್‌ ನೀಡುತ್ತದೆ ಮತ್ತು ತನ್ನ ಸೈನ್ಯವನ್ನು ಹೇಗೆ ಮರು ಹೊಂದಿಸುತ್ತದೆ ಎಂಬುದನ್ನು ನೋಡಲು ಕಾಯುತ್ತಿದ್ದೇನೆ ಎಂದಿದ್ದಾರೆ. ಟರ್ಕಿಯಲ್ಲಿ ಉಕ್ರೇನ್ ಮತ್ತು ರಷ್ಯಾದ ಅಧಿಕಾರಿಗಳ ನಡುವೆ ನಡೆಯುತ್ತಿರುವ ಮಾತುಕತೆಗಳಲ್ಲಿ ನಂಬಿಕೆಯನ್ನು ಹೆಚ್ಚಿಸುವ ಪ್ರಯತ್ನದಲ್ಲಿ ಕಾರ್ಯಾಚರಣೆ ಕಡಿತ ಮಾಡುವುದಾಗಿ ಮಂಗಳವಾರ ರಷ್ಯಾ ಘೋಷಣೆಯ ಬಗ್ಗೆ ಅಮೆರಿಕ ಮತ್ತು ಪಾಶ್ಚಿಮಾತ್ಯ ದೇಶಗಳು ಸಂದೇಹ ವ್ಯಕ್ತಪಡಿಸಿವೆ.
ಸಿಂಗಾಪುರ್ ಮತ್ತು ಇತರ ಪೆಸಿಫಿಕ್ ಮಿತ್ರರಾಷ್ಟ್ರಗಳಿಗೆ ಭದ್ರತೆಯ ಭರವಸೆ ನೀಡಲು ಬೈಡನ್‌ ಪ್ರಯತ್ನಿಸಿದ್ದಾರೆ. ಉಕ್ರೇನ್‌ನಲ್ಲಿ ರಷ್ಯಾದ ಆಕ್ರಮಣದ ಪತನವನ್ನು ಎದುರಿಸುತ್ತಿರುವಾಗಲೂ ಅಮೆರಿಕ ಇಂಡೋ - ಪೆಸಿಫಿಕ್ ಪ್ರದೇಶದ ಮೇಲೆ ಕೇಂದ್ರೀಕೃತವಾಗಿದೆ.
ಸಿಂಗಾಪುರದ ಪ್ರಧಾನಿ ಲೀ ಸಿಯೆನ್ ಲೂಂಗ್ ಅವರೊಂದಿಗಿನ ಓವಲ್ ಆಫೀಸ್ ಸಭೆಯ ಪ್ರಾರಂಭದಲ್ಲಿ ಬೈಡನ್‌, ತಮ್ಮ ಆಡಳಿತವು ಸಿಂಗಾಪುರ್ ಮತ್ತು ಈ ಪ್ರದೇಶದ ಇತರ ರಾಷ್ಟ್ರಗಳೊಂದಿಗೆ ಸಂಬಂಧವನ್ನು ಬಲಪಡಿಸುವ ಕೆಲಸವನ್ನು ಮುಂದುವರೆಸುವುದು ಅತ್ಯಗತ್ಯ ಎಂದು ಹೇಳಿದರು.
ಇದನ್ನೂ ಓದಿ: ಯಾವಾಗ ಮುಗಿಯುತ್ತೋ ಯುದ್ಧ.. ರಷ್ಯಾ ದಾಳಿಯಿಂದ ಉಕ್ರೇನ್ಗೆ ಬರೋಬ್ಬರಿ 1 ಲಕ್ಷ ಕೋಟಿ ರೂ. ನಷ್ಟ!
