ಮಾಸ್ಕೋ (ರಷ್ಯಾ): ಅಫ್ಘಾನ್ ಅಧ್ಯಕ್ಷರಾಗಿದ್ದ ಅಶ್ರಫ್ ಘನಿ ದೇಶ ತೊರೆಯುವ ಮುನ್ನ ನಾಲ್ಕು ಕಾರು ಮತ್ತು ಹೆಲಿಕಾಪ್ಟರ್ಗೆ ಹಣ ತುಂಬಿಕೊಂಡು ಹೋಗಿದ್ದಾರೆ ಎಂದು ಕಾಬೂಲ್‌ನಲ್ಲಿರುವ ರಷ್ಯಾದ ರಾಯಭಾರ ಕಚೇರಿ ಆರೋಪಿಸಿದೆ. ಘನಿ ಸದ್ಯ ಎಲ್ಲಿದ್ದಾರೆ ಎಂಬ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ.
ತಾಲಿಬಾನ್ ಉಗ್ರ ಪಡೆ ಕಾಬೂಲ್ ಪ್ರವೇಶಿಸಿದ್ದರಿಂದ ಅಧ್ಯಕ್ಷ ಘನಿ ಶರಣಾಗಿ ದೇಶವನ್ನು ತೊರೆದರು. ಅವರು ಅಫ್ಘಾನ್ ತೊರೆಯುವುದಕ್ಕೂ ಮುನ್ನ ರಕ್ತಪಾತ ತಪ್ಪಿಸಲು ನಾನು ಈ ನಿರ್ಧಾರ ಕೈಗೊಳ್ಳುತ್ತಿದ್ದೇನೆ ಎಂದು ಹೇಳಿದ್ದರು.
ಕಾಬೂಲ್‌ನಲ್ಲಿ ರಷ್ಯಾವು ರಾಜತಾಂತ್ರಿಕ ಅಸ್ತಿತ್ವವನ್ನು ಉಳಿಸಿಕೊಳ್ಳುವುದಾಗಿ ಹೇಳಿದೆ. ತಾಲಿಬಾನಿಗಳನ್ನು ದೇಶದ ಆಡಳಿತಗಾರರನ್ನಾಗಿ ಗುರುತಿಸಲು ಯಾವುದೇ ಆತುರವಿಲ್ಲ. ಅವರ ನಡವಳಿಕೆಯನ್ನು ಸೂಕ್ಷ್ಮವಾಗಿ ಗಮನಿಸುವುದಾಗಿ ಹೇಳಿದ್ದು, ಅವರೊಂದಿಗೆ ಬಾಂಧವ್ಯ ವೃದ್ಧಿಸಿಕೊಳ್ಳುವ ಭರವಸೆ ಹೊಂದಿದೆ.
ಇದನ್ನೂ ಓದಿ: ಅಫ್ಘಾನ್‌ನಲ್ಲಿನ ಅನಿಶ್ಚಿತತೆ: ಭಾರತ ವ್ಯಾಪಾರದ ಮೇಲೆ ಪರಿಣಾಮ
ತಾಲಿಬಾನ್ ಕಾಬೂಲ್ ಆಕ್ರಮಿಸಿಕೊಳ್ಳುತ್ತಿದ್ದಂತೆ ಘನಿ, ಸರ್ಕಾರ ತೊರೆದು ಪಲಾಯನ ಮಾಡಿದ ರೀತಿ ಸರಿಯಿಲ್ಲ. ನಾಲ್ಕು ಕಾರುಗಳು ಮತ್ತು ಹೆಲಿಕಾಪ್ಟರ್ಗೆ ಹಣ ತುಂಬಿಸಿಕೊಂಡು ಹೋಗಿದ್ದಾರೆ. ಈ ವೇಳೆ ರಸ್ತೆಯಲ್ಲೆಲ್ಲಾ ಹಣ ಬಿದ್ದಿದೆ ಎಂದು ರಷ್ಯಾದ ರಾಯಭಾರ ಕಚೇರಿಯ ವಕ್ತಾರರಾದ ಇಶ್ಚೆಂಕೊ ದೂರಿದ್ದಾರೆ.
