ಜಿನೀವಾ (ಸ್ವಿಟ್ಜರ್ಲ್ಯಾಂಡ್): ಭಾರತದಲ್ಲಿ ಪತ್ತೆಯಾದ ಕೋವಿಡ್ ರೂಪಾಂತರಿ ವೈರಸ್ ಹಲವು ದೇಶಗಳಲ್ಲಿ ಕಂಡು ಬಂದಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ತಿಳಿಸಿದೆ.
ಅಕ್ಟೋಬರ್‌ನಲ್ಲಿ ಭಾರತದಲ್ಲಿ ಮೊದಲ ಬಾರಿಗೆ ಪತ್ತೆಯಾದ ಕೋವಿಡ್-19 ಬಿ.1.617 ರೂಪಾಂತರಿಯು, ವಿಶ್ವದಾದ್ಯಂತ ಸುಮಾರು 4,500 ಜನರಲ್ಲಿ ಕಂಡು ಬಂದಿದೆ ಎಂದು ಡಬ್ಲ್ಯುಹೆಚ್ಒಗೆ ಒಳಪಡುವ 44 ದೇಶಗಳು ಓಪನ್ ಆಕ್ಸೆಸ್ ಡೇಟಾ ಬೇಸ್ನಲ್ಲಿ ಅಪ್ಲೋಡ್ ಮಾಡಿದ ಮಾಹಿತಿಯಿಂದ ತಿಳಿದು ಬಂದಿದೆ.
ಇದರೊಂದಿಗೆ ಇನ್ನೂ ಐದು ದೇಶಗಳಲ್ಲಿ ರೂಪಾಂತರಿ ಪತ್ತೆಯಾದ ಬಗ್ಗೆ ಡಬ್ಲ್ಯುಹೆಚ್ಒಗೆ ಮಾಹಿತಿ ಸಿಕ್ಕಿದ್ದು, ವಾರ ಕಳೆದಂತೆ ಈ ಸೋಂಕಿನ ಪ್ರಮಾಣ ಹೆಚ್ಚಾಗುತ್ತಿದೆ ಎಂದು ಹೇಳಿದೆ. ಭಾರತದ ಹೊರಗೆ ಬ್ರಿಟನ್ನಲ್ಲಿ ಈ ರೂಪಾಂತರಿ ವೈರಸ್ ಹೆಚ್ಚಾಗಿ ಕಂಡು ಬಂದಿದೆ. ಬಿ.1.617 ರೂಪಾಂತರಿ ವೈರಸ್ ಮೂರು ವಿಭಿನ್ನ ಉಪ-ವಂಶಾವಳಿಗಳಿಂದ ಸ್ವಲ್ಪ ಭಿನ್ನವಾದ ರೂಪಾಂತರಗಳು ಮತ್ತು ಗುಣಲಕ್ಷಣಗಳನ್ನು ಹೊಂದಿರುತ್ತದೆ ಎಂದು ಕಳೆದ ವಾರ ಡಬ್ಲ್ಯುಹೆಚ್ಒ ಹೇಳಿತ್ತು.
ಈ ರೂಪಾಂತರಿ ವೈರಸ್ ಭಾರತದ ಹೊರಗೆ ಬ್ರಿಟನ್, ಬ್ರೆಜಿಲ್ ಮತ್ತು ದಕ್ಷಿಣ ಆಫ್ರಿಕಾದಲ್ಲಿ ಕಂಡು ಬಂದಿದೆ. ರೂಪಾಂತರಿ ವೈರಸ್ ಮೂಲ ವೈರಸ್ಗಿಂತ ಹೆಚ್ಚು ಅಪಾಯಕಾರಿ ಎಂದು ಪರಿಗಣಿಸಲಾಗಿದೆ. ಯಾಕೆಂದರೆ ಅವುಗಳು ಹೆಚ್ಚು ಹರಡುತ್ತದೆ ಮತ್ತು ಲಸಿಕೆಯ ರಕ್ಷಣಾ ಗೋಡೆಯನ್ನೂ ದಾಟುವ ಸಾಮರ್ಥ್ಯ ಹೊಂದಿದೆ.
