ಟೋಕಿಯೋ: ಮಹಾಮಾರಿ ಕೊರೊನಾ ವೈರಾಣು ಸೋಂಕು ಇದೀಗ ವಿಶ್ವದ ಪ್ರತಿಷ್ಠಿತ ಕ್ರೀಡಾಕೂಟದ ಮೇಲೂ ಬಿದ್ದಿದ್ದು, ಜಪಾನ್ನಲ್ಲಿ ನಡೆಯಬೇಕಾಗಿದ್ದ ಒಲಿಂಪಿಕ್ ಮುಂದೂಡಿಕೆಯಾಗಿ ಆದೇಶ ಹೊರಬಿದ್ದಿದೆ. ಇದೇ ವರ್ಷ ನಡೆಯಬೇಕಾಗಿದ್ದ ಐತಿಹಾಸಿಕ ಒಲಿಂಪಿಕ್ ಮುಂದಿನ ವರ್ಷ ನಡೆಸಲು ನಿರ್ಧಾರ ಕೈಗೊಳ್ಳಲಾಗಿದೆ.
ಜಪಾನ್ ಪ್ರಧಾನಿ ಹಾಗೂ ಅಂತಾರಾಷ್ಟ್ರೀಯ ಒಲಿಂಪಿಕ್ ಸಮಿತಿ (ಐಒಸಿ) ಈ ಮಹತ್ವದ ನಿರ್ಧಾರ ಕೈಗೊಂಡಿದ್ದು, ಇಡೀ ವಿಶ್ವವೇ ಕೊರೊನಾ ಸೋಂಕಿನಿಂದ ತತ್ತರಿಸುತ್ತಿದ್ದು, ಟೋಕಿಯೋ 2020 ಒಲಿಂಪಿಕ್ ಕ್ರೀಡಾಕೂಟ ಮುಂದೂಡಿಕೆ ಮಾಡುವಂತೆ ಅನೇಕ ರಾಷ್ಟ್ರಗಳು ಮನವಿ ಮಾಡಿದ್ದವು. ಜತೆಗೆ ಭಾರತ, ಕೆನಡಾ, ನಾರ್ವೆ ಸೇರಿದಂತೆ ಅನೇಕ ದೇಶಗಳು ತನ್ನ ಕ್ರೀಡಾಪಟುಗಳನ್ನ ಈ ಕ್ರೀಡಾಕೂಟಕ್ಕೆ ಕಳುಹಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದವು.
ಅತಿಥ್ಯ ವಹಿಸಿರುವ ಜಪಾನ್ ಪ್ರಧಾನಮಂತ್ರಿ ಶಿಂಜೋ ಅಬೆ ಮಾತನಾಡಿದ್ದು, ವಿವಿಧ ದೇಶಗಳ ಅಥ್ಲೀಟ್ಗಳು ಮತ್ತು ಕ್ರೀಡಾ ಸಂಸ್ಥೆಗಳು ವ್ಯಾಪಕ ಒತ್ತಡ ಹೇರುತ್ತಿರುವುದರಿಂದ ಒಲಿಂಪಿಕ್ ಆಯೋಜನೆ ಮುಂದೂಡಿಕೆ ಮಾಡಿ ಆದೇಶ ಹೊರಡಿಸಲಾಗಿದೆ ಎಂದು ತಿಳಿಸಿದೆ.
ಟೋಕಿಯೋ-2020ರ ಗೇಮ್ಸ್ ನಿಗದಿಯಾಗಿರುವಂತೆ ಜುಲೈ 24ರಿಂದ ಆರಂಭವಾಗಬೇಕಾಗಿತ್ತು. ಆದರೆ ರಕ್ಕಸ ಕೊರೊನಾ ತನ್ನ ವ್ಯಾಪಕತೆ ದಿನದಿಂದ ದಿನಕ್ಕೆ ವಿಸ್ತರಿಸುತ್ತಿರುವ ಹಿನ್ನೆಲೆಯಲ್ಲಿ ಈ ಮಹತ್ವದ ನಿರ್ಧಾರ ಕೈಗೊಳ್ಳಲಾಗಿದೆ.
