ನ್ಯೂಯಾರ್ಕ್: ಕೋವಿಡ್-19 ಹೆಸರಲ್ಲಿ ಇಮೇಲ್ ಮೂಲಕ ವಂಚನೆಯ ಪ್ರಕರಣಗಳು ವಿಪರೀತ ಹೆಚ್ಚಾಗುತ್ತಿವೆ. ಕಳೆದ ಫೆಬ್ರುವರಿ ಅಂತ್ಯಕ್ಕೆ ಕೊರೊನಾ ವೈರಸ್ ನೆಪದಲ್ಲಿ ನಡೆಸಲಾದ ಇಮೇಲ್ ದಾಳಿ ಪ್ರಕರಣಗಳ ಸಂಖ್ಯೆಯಲ್ಲಿ ಶೇ.667 ರಷ್ಟು ಏರಿಕೆಯಾಗಿದೆ ಎಂದು ಅಂತಾರಾಷ್ಟ್ರೀಯ ಅಧ್ಯಯನವೊಂದು ತಿಳಿಸಿದೆ.
ವಿಶ್ವಾದ್ಯಂತ ಕೋವಿಡ್ ಭೀತಿ ಹರಡಿರುವ ಈ ಸಂದರ್ಭವನ್ನೇ ಬಂಡವಾಳವನ್ನಾಗಿ ಮಾಡಿಕೊಂಡಿರುವ ಸೈಬರ್ ಖದೀಮರು ಬಳಕೆದಾರರ ಇಮೇಲ್ಗಳಿಗೆ ಮಾಲ್ವೇರ್ ಕಳಿಸುತ್ತ ಅವರ ಖಾಸಗಿ ಮಾಹಿತಿಗಳನ್ನು ಭಾರಿ ಪ್ರಮಾಣದಲ್ಲಿ ಕದಿಯುತ್ತಿದ್ದಾರೆ. ಜೊತೆಗೆ ಆಸೆ, ಆಮಿಷಗಳನ್ನೊಡ್ಡುವ ಮೂಲಕ ಜನರಿಂದ ಹಣ ಲಪಟಾಯಿಸುತ್ತಿದ್ದಾರೆ ಎಂದು ಬರ್ರಾಕುಡಾ ನೆಟ್ವರ್ಕ್ಸ್ ಸಂಸ್ಥೆ ತಿಳಿಸಿದೆ. ಬರ್ರಾಕುಡಾ ನೆಟ್ವರ್ಕ್ಸ್ ಇದು ಕ್ಲೌಡ್ ಆಧರಿತ ಸೈಬರ್ ಸೆಕ್ಯೂರಿಟಿ ಮತ್ತು ಡೇಟಾ ಸಂರಕ್ಷಣೆ ಸೇವೆ ಒದಗಿಸುವ ಪ್ರಖ್ಯಾತ ಕಂಪನಿಯಾಗಿದೆ.
ಮೊದಲಿನಂತೆ ನಡೆಯುತ್ತಿದ್ದ ಫಿಶಿಂಗ್ ತಂತ್ರಗಳನ್ನೇ ಈಗಲೂ ಬಳಸಲಾಗುತ್ತಿದೆಯಾದರೂ, ಈಗ ಕೊರೊನಾ ವೈರಸ್ ಹೆಸರಲ್ಲಿ ಸಾಮಾನ್ಯ ಜನರನ್ನು ಹಾಗೂ ಸಂತ್ರಸ್ತರನ್ನು ಸುಲಭವಾಗಿ ಸೈಬರ್ ಖದೀಮರು ತಮ್ಮ ಗಾಳಕ್ಕೆ ಬೀಳಿಸುತ್ತಿದ್ದಾರೆ ಎನ್ನಲಾಗಿದೆ.
ಮಾ.1 ರಿಂದ 23 ರ ಅವಧಿಯಲ್ಲಿ 4,67,825 ಈಮೇಲ್ ಫಿಶಿಂಗ್ ದಾಳಿಗಳು ನಡೆದಿದ್ದು, ಇದರಲ್ಲಿ 9,116 ದಾಳಿಗಳು ಕೋವಿಡ್ಗೆ ಸಂಬಂಧಿಸಿದವಾಗಿವೆ ಎಂದು ಬರ್ರಾಕುಡಾ ತಂತ್ರಜ್ಞರು ಪತ್ತೆ ಹಚ್ಚಿದ್ದಾರೆ. ಈ ವರ್ಷದ ಜನೇವರಿಯಲ್ಲಿ 137 ಹಾಗೂ ಫೆಬ್ರುವರಿಯಲ್ಲಿ 1,188 ಕೊರೊನಾ ಸಂಬಂಧಿತ ಫಿಶಿಂಗ್ ದಾಳಿಗಳು ನಡೆದಿವೆ.
ಪ್ರಸ್ತುತ ಬೇರೆಲ್ಲ ರೀತಿಯ ಫಿಶಿಂಗ್ಗೆ ಹೋಲಿಸಿದಲ್ಲಿ ಕೊರೊನಾ ಸಂಬಂಧಿತ ಫಿಶಿಂಗ್ ಪ್ರಕರಣಗಳು ಕಡಿಮೆ ಇದ್ದರೂ ಬರುವ ದಿನಗಳಲ್ಲಿ ಇದರ ಸಂಖ್ಯೆ ವಿಪರೀತ ಹೆಚ್ಚಾಗುವ ಸಾಧ್ಯತೆಗಳಿವೆ.
ಕೊರೊನಾ ವೈರಸ್ ಹೆಸರಿನಲ್ಲಿ ವಂಚನೆ, ಬೇರೊಂದು ಕಂಪನಿಯ ಹೆಸರಲ್ಲಿ ಮೋಸ ಮತ್ತು ಕಚೇರಿ ಇಮೇಲ್ ಹ್ಯಾಕಿಂಗ್ ಈ ಮೂರು ರೀತಿಯ ಫಿಶಿಂಗ್ ದಾಳಿಗಳು ನಡೆಯುವ ಸಾಧ್ಯತೆಗಳು ಹೆಚ್ಚಾಗಿವೆ ಎನ್ನುತ್ತಾರೆ ಬರ್ರಾಕುಡಾ ತಂತ್ರಜ್ಞರು.
