ಮುಂಬೈ: ತಾರಕ್ ಮೆಹ್ತಾ ಕಾ ಉಲ್ಟಾ ಚಶ್ಮಾ ಖ್ಯಾತಿಯ ನಟ ಸುನೀಲ್ ಹೋಲ್ಕರ್ ಅವರು ಶುಕ್ರವಾರ ವಿಧಿವಶರಾಗಿದ್ದಾರೆ. ಲಿವರ್ ಸೋರಿಯಾಸಿಸ್ ಕಾಯಿಲೆಯಿಂದ ಬಳಲುತ್ತಿದ್ದ ಸುನೀಲ್ ತಮ್ಮ ನಲವತ್ತನೇ ವಯಸ್ಸಿಗೆ ಜೀವನದ ಪಯಣವನ್ನ ಮುಗಿಸಿದ್ದು, ತಾಯಿ, ತಂದೆ, ಹೆಂಡತಿ ಮತ್ತು ಇಬ್ಬರು ಮಕ್ಕಳನ್ನು ಅಗಲಿದ್ದಾರೆ. ಸಿನಿಮಾ, ಟಿವಿ ಶೋ, ನಾಟಕ ಮೂಲಕ ಖ್ಯಾತಿ ಪಡೆದಿದ್ದ ಸುನೀಲ್, ಕೊನೆಯದಾಗಿ ರಾಷ್ಟ್ರಪ್ರಶಸ್ತಿ ವಿಜೇತ ಚಿತ್ರ 'ಗೋಸ್ಟ್ ಏಕ ಪೈಥಾನಿಚಿ'ಯಲ್ಲಿ ಕಾಣಿಸಿಕೊಂಡಿದ್ದರು.
ಹಾಸ್ಯ ರಂಗಕ್ಕೆ ಹೆಸರುವಾಸಿಯಾಗಿರುವ ಸುನೀಲ್ ಅವರು ಹಿಂದಿಯಲ್ಲಿ ಮಾತ್ರವಲ್ಲದೇ ಮರಾಠಿ ಚಿತ್ರಗಳಾದ ತುಮ್ಚ್ಯಾಸತಿ ಕೇ ಪಾನ್, ಸಗ್ಲಾ ಕರುಣ್ ಭಾಗ್ಲೆ, ಲೌ ಕಾ ಲಾಥ್ ಸೇರಿದಂತೆ ಹಲವು ಚಿತ್ರಗಳಲ್ಲಿ ನಟಿಸುವ ಮೂಲಕ ಅಭಿಮಾನಿಗಳ ಹೃದಯದಲ್ಲಿ ಸ್ಥಾನ ಗಿಟ್ಟಿಸಿಕೊಂಡಿದ್ದರು. ಸುದೀರ್ಘವಾಗಿ 12 ವರ್ಷಗಳ ಕಾಲ ಹಾಸ್ಯ ರಂಗದಲ್ಲಿ ನಟಿಸುವ ಮೂಲಕ ಚಿತ್ರರಂಗಕ್ಕೆ ದೊಡ್ಡ ಕೊಡುಗೆ ಕೊಟ್ಟಿದ್ದಾರೆ. ಟಿವಿ ಶೋಗಳನ್ನು ಹೊರತು ಪಡಿಸಿ ನಟ ಸುನೀಲ್ ಹೋಲ್ಕರ್ ಅವರು ರಂಗಭೂಮಿಯಲ್ಲೂ ಸುಮಾರು ವರ್ಷಗಳ ಕಾಲ ಕೆಲಸ ಮಾಡಿದ್ದಾರೆ. ಅವರು ಅಶೋಕ್ ಹಂದೆಯವರ ಚೌರಂಗ್ ನಾಟ್ಯ ಸಂಸ್ಥಾನದಲ್ಲಿಯೂ ಕೆಲಸ ಮಾಡಿದ್ದರು.
ಸಾವಿನ ಬಗ್ಗೆ ಮೊದಲೇ ಅರಿತಿದ್ದ ಸುನೀಲ್: ಇನ್ನೂ ತಮ್ಮ ಸಾವಿನ ಬಗ್ಗೆ ಮೊದಲೇ ಅರಿತಿದ್ದ ಸುನೀಲ್, ಅವರ ಸ್ನೇಹಿತರೊಬ್ಬರ ಸಹಾಯದಿಂದ ತಮ್ಮ ವಾಟ್ಸ್ಆ್ಯಪ್ಗೆ ಸ್ಟೇಟಸ್ ಹಾಕುವಂತೆ ಕೋರಿ, ಸ್ಟೇಟಸ್ ಅಲ್ಲಿ ತಮ್ಮ ಕೊನೆಯ ಪೋಸ್ಟ್ ಎಂದು ಬರೆದು ತಮ್ಮನ್ನು ಬೆಂಬಲಿಸಿದರಿಗೆ ಧನ್ಯವಾದ ತಿಳಿಸಿ, ತಮ್ಮ ತಪ್ಪುಗಳಿಗೆ ಕ್ಷಮೆ ಇರಲಿ ಎಂದು ಪೋಸ್ಟ್ ಅನ್ನು ಹಂಚಿಕೊಂಡಿದ್ದರು ಎಂದು ಮೂಲಗಳು ತಿಳಿಸಿವೆ.
ಇನ್ನು ಇದಕ್ಕೂ ಮುನ್ನ 'ತಾರಕ್ ಮೆಹ್ತಾ ಕಾ ಊಲ್ಟಾ ಚಶ್ಮಾ'ದಲ್ಲಿ ನಟ್ಟು ಕಾಕಾ ಪಾತ್ರದಲ್ಲಿ ನಟಿಸಿದ್ದ ಘನಶ್ಯಾಮ್ ನಾಯಕ್ ಅವರು 76ನೇ ವಯಸ್ಸಿಗೆ ಇಹಲೋಕ ತ್ಯಜಿಸಿದರು. ಕ್ಯಾನ್ಸರ್ ಕಾಯಿಲೆಯಿಂದ ಬಳಲುತ್ತಿದ್ದ ನಟ್ಟು ಕಾಕಾ ಅಲಿಯಾಸ್ ಘನಶ್ಯಾಮ್ ಕ್ಯಾನ್ಸರ್ನೊಂದಿಗೆ ದೀರ್ಘಕಾಲದ ಹೋರಾಟ ನಡೆಸಿ 76ನೇ ವಯಸ್ಸಿಗೆ ನಿಧನ ಹೊಂದಿದ್ದರು. ನಟ್ಟು ಕಾಕಾ ಸಾವಿಗೆ ನಿರ್ಮಾಪಕ ಅಸಿತ್ ಮೋದಿ ಸೇರಿದಂತೆ ಅಭಿಮಾಗಳು, ಚಿತ್ರರಂಗದ ಗಣ್ಯರು ಕಂಬನಿ ಮಿಡಿದಿದ್ದರು. ಅಲ್ಲದೇ ಪ್ರಧಾನಿ ಮೋದಿ ಅವರು ಕೂಡ ಟ್ವಿಟರ್‌ನಲ್ಲಿ ಅವರ ನಿಧನಕ್ಕೆ ಸಂತಾಪ ಸೂಚಿಸಿದ್ದರು.
ಇದನ್ನೂ ಓದಿ: ಹಿರಿಯ ನಟಿ ತಬಸ್ಸುಮ್ ಗೋವಿಲ್ ಹೃದಯಾಘಾತದಿಂದ ನಿಧನ
ಇತ್ತೀಚೆಗೆ ಹಿರಿಯ ನಟಿ ತಬಸ್ಸುಮ್ ಗೋವಿಲ್ ಹೃದಯಾಘಾತದಿಂದ ಸಾವನ್ನಪ್ಪಿದ್ದರು. ದೆಹಲಿಯ ಆಸ್ಪತ್ರೆಯಲ್ಲಿ ಹೃದಯಾಘಾತದಿಂದ 78 ವರ್ಷದ ನಟಿ ತಬಸ್ಸುಮ್ ನಿಧನರಾಗಿದ್ದರು. 1947ರಲ್ಲಿ ಬಾಲನಟಿ ಬೇಬಿ ತಬಸ್ಸುಮ್ ಆಗಿ ತನ್ನ ವೃತ್ತಿಜೀವನವನ್ನು ಪ್ರಾರಂಭಿಸಿದ್ದರು. ತಬಸ್ಸುಮ್ ತನ್ನ ಫೂಲ್ ಖಿಲೆ ಹೈ ಗುಲ್ಶನ್ ಗುಲ್ಶನ್ ಕಾರ್ಯಕ್ರಮಕ್ಕೆ ಹೆಸರುವಾಸಿಯಾಗಿದ್ದರು. ಅವರ ದೂರದರ್ಶನ್ ಸೆಲೆಬ್ರಿಟಿ ಟಾಕ್ ಶೋ 1972 ರಿಂದ 1993 ರವರೆಗೆ ನಡೆಯಿತು.
ಇದನ್ನೂ ಓದಿ: ಬೆಂಗಳೂರಲ್ಲಿ ಫ್ಯಾಟ್ ಸರ್ಜರಿ ವೇಳೆ ನಟಿ ಸಾವು
ದೇಹದ ಕೊಬ್ಬಿನಾಂಶ ತೆಗೆದು ಹಾಕುವ (ಫ್ಯಾಟ್) ಸರ್ಜರಿ ವೇಳೆ ಕಿರುತರೆ ನಟಿ 21 ವರ್ಷದ ಚೇತನಾ ರಾಜ್ ಅವರು ಸಾವನ್ನಪ್ಪಿದ್ದರು. ಪ್ಯಾಟ್ ಸರ್ಜರಿ ಮಾಡಿಸಿಕೊಳ್ಳಲು ಇವರು ನವರಂಗ್ ಸರ್ಕಲ್‌ನಲ್ಲಿರುವ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದರು. ಸರ್ಜರಿ ವೇಳೆ ಶ್ವಾಸಕೋಶದಲ್ಲಿ ನೀರಿನ ಅಂಶ ಶೇಖರಣೆಯಾಗಿದ್ದರಿಂದ ಸಾವು ಸಂಭವಿಸಿತ್ತು. ಕಲರ್ಸ್ ಕನ್ನಡ ವಾಹಿನಿಯ ಗೀತಾ, ದೊರೆಸಾನಿ, ಒಲವಿನ ನಿಲ್ದಾಣ ಧಾರವಾಹಿಗಳಲ್ಲಿ ಚೇತನಾ ರಾಜ್ ನಟಿಸುತ್ತಿದ್ದರು.
ಇದನ್ನೂ ಓದಿ: ಕಾಸ್ಮೆಟಿಕ್ ಸರ್ಜರಿ ಒಳ್ಳೆಯದಲ್ಲ.. ಗಾಳಿಪಟದ ನಟಿ ನೀತು
