ಬೇಬಿ ನಿನಗಿಂತ ಸುಂದರವಾಗಿರುವವರು ಯಾರೂ ಇಲ್ಲ, ನನ್ನ ಬೊಮ್ಮಾ.. ನಟಿ ಜಾಕ್ವೆಲಿನ್​ಗೆ ಜೈಲಿನಿಂದಲೇ ಮತ್ತೆ ಪ್ರೇಮಪತ್ರ ಬರೆದ ಸುಕೇಶ್ ಚಂದ್ರಶೇಖರ್

ಮಂಡೋಲಿ ಜೈಲು ಸೇರಿರುವ ಸುಕೇಶ್ ಚಂದ್ರಶೇಖರ್, ಬಾಲಿವುಡ್ ನಟಿ ಜಾಕ್ವೆಲಿನ್ ಫರ್ನಾಂಡಿಸ್​ಗೆ ಮತ್ತೊಮ್ಮೆ ಲವ್​ ಲೆಟರ್​ ಬರೆದಿದ್ದಾನೆ.

ಅಕ್ರಮ ಹಣ ವರ್ಗಾವಣೆ ಆರೋಪ ಹೊತ್ತು ಜೈಲು ಸೇರಿರುವ ಸುಕೇಶ್ ಚಂದ್ರಶೇಖರ್, ಬಾಲಿವುಡ್ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಅವರಿಗೆ ಮತ್ತೊಂದು ಪ್ರೇಮಪತ್ರ ಬರೆದಿದ್ದಾನೆ. ತಾರೆ ಜಾಕ್ವೆಲಿನ್ ಫರ್ನಾಂಡಿಸ್ ತನ್ನ ಪ್ರೇಯಸಿ ಎಂದು ಹೇಳಿಕೊಂಡಿರುವ ಸುಕೇಶ್ ಚಂದ್ರಶೇಖರ್, ಆಗಾಗ್ಗೆ ಪ್ರೇಮಪತ್ರಗಳನ್ನು ಬರೆಯುವ ಮೂಲಕ ಸುದ್ದಿಯಾಗುತ್ತಾನೆ. ಅದರಂತೆ ಇದೀಗ ಮತ್ತೊಂದು ಪ್ರೇಮಪತ್ರ ಬರೆದಿದ್ದು, ಇತ್ತೀಚೆಗೆ 'ದೋಹಾ ಶೋ'ನಲ್ಲಿ ಕಾಣಿಸಿಕೊಂಡಿದ್ದಕ್ಕಾಗಿ ಬಾಲಿವುಡ್​ ಚಿತ್ರನಟಿಯನ್ನು ಹಾಡಿ ಹೊಗಳಿದ್ದಾರೆ.

ಸದ್ಯ ರಾಷ್ಟ್ರ ರಾಜಧಾನಿಯ ಮಂಡೋಲಿ ಜೈಲಿನಲ್ಲಿರುವ ಸುಕೇಶ್ ಚಂದ್ರಶೇಖರ್, ಜಾಕ್ವೆಲಿನ್‌ಗೆ ಕಾಂಪ್ಲಿಮೆಂಟ್ಸ್​​ ಕೊಡೋ ಮುಖೇನ ತಮ್ಮ ಪತ್ರ ಪ್ರಾರಂಭಿಸಿದ್ದಾನೆ. ನಟಿಯ ಸೌಂದರ್ಯ ಗುಣಗಾನ ಮಾಡಿದ ಸುಕೇಶ್​, ಇತ್ತೀಚೆಗೆ ದೋಹಾ ಶೋನಲ್ಲಿ ಕಾಣಿಸಿಕೊಂಡಿದ್ದಕ್ಕಾಗಿಯೂ ಮೆಚ್ಚುಗೆ ವ್ಯಕ್ತಪಡಿಸಿದ್ದಾನೆ.

"ಬೇಬಿ ನೀನು ದೋಹಾ ಶೋನಲ್ಲಿ ಸಖತ್​ ಹಾಟ್​​ ಹಾಗೂ ಸುಂದರವಾಗಿ ಕಾಣುತ್ತಿದ್ದಿ. ಬೇಬಿ ನಿನಗಿಂತ ಸುಂದರವಾಗಿರುವವರು ಯಾರೂ ಇಲ್ಲ, ನನ್ನ ಬೊಮ್ಮಾ" - ಆರೋಪಿ ಸುಕೇಶ್ ಚಂದ್ರಶೇಖರ್.

ನವರಾತ್ರಿ ಹಬ್ಬ ಸಮೀಪಿಸುತ್ತಿದ್ದಂತೆ, ಸುಕೇಶ್ ಚಂದ್ರಶೇಖರ್ ನಟಿಯ ಯೋಗಕ್ಷೇಮಕ್ಕಾಗಿ 9 ದಿನಗಳ ಕಾಲ ಉಪವಾಸ ಮಾಡುವ ಬಯಕೆ ವ್ಯಕ್ತಪಡಿಸಿದ್ದಾನೆ. ನಟಿಯ ಯೋಗಕ್ಷೇಮದ ಜೊತೆಗೆ ಇಬ್ಬರ ಜೀವನದ ಸುತ್ತಲಿನ ನಕಾರಾತ್ಮಕತೆಯನ್ನು ತೊಲಗಿಸುವ ಗುರಿಯೊಂದಿಗೆ ಉಪವಾಸ ಕೈಗೊಳ್ಳಲಿದ್ದಾನೆ. ಮಾತಾ ಶಕ್ತಿಯ ದೈವಿಕ ಆಶೀರ್ವಾದದಿಂದ ಎಲ್ಲವೂ ನಮ್ಮ ಪರವಾಗಿ ಬರುತ್ತದೆ, ಸತ್ಯ ಮೇಲುಗೈ ಸಾಧಿಸಲಿದೆ ಎಂದು ಪತ್ರದಲ್ಲಿ ವಿವರಿಸಿದ್ದಾನೆ.

ಅಲ್ಲದೇ ಸುಕೇಶ್, ಜಾಕ್ವೆಲಿನ್‌ಗೆ ಒಗ್ಗಟ್ಟಿನ ಭರವಸೆ ನೀಡಿದ್ದಾನೆ. "ನಾವು ಶೀಘ್ರದಲ್ಲೇ ಒಂದಾಗಲಿದ್ದೇವೆ. ಬೇಬಿ, ಅದೇನೆ ಆಗಲಿ, ಅದೇನೆ ಎದುರಾಗಲಿ ನಾವಿಬ್ಬರೂ ಕೊನೆವರೆಗೂ ಒಟ್ಟಿಗೆ ಜೀವನ ನಡೆಸಲಿದ್ದೇವೆ" ಎಂದು ಪತ್ರದಲ್ಲಿ ಭರವಸೆ ವ್ಯಕ್ತಪಡಿಸಿದ್ದಾನೆ.

ಇದನ್ನೂ ಓದಿ: ಟ್ರೆಂಡಿಂಗ್‍ ಆ್ಯಕ್ಟರ್, ಐಕಾನಿಕ್ ಡೈರೆಕ್ಟರ್‌ ಪ್ರಶಸ್ತಿ ಮುಡಿಗೇರಿಸಿಕೊಂಡ ರಕ್ಷಿತ್ - ರಿಷಬ್

ನವರಾತ್ರಿಯ ಒಂಭತ್ತನೇ ದಿನದಂದು ಮಾ ವೈಷ್ಣೋ ದೇವಿ ದೇವಸ್ಥಾನ ಮತ್ತು ಮಹಾಕಾಳೇಶ್ವರ ದೇವಸ್ಥಾನದಲ್ಲಿ ವಿಶೇಷ ಪೂಜೆ ಮತ್ತು ಆರತಿಯನ್ನು ತಮ್ಮಿಬ್ಬರ ಹೆಸರುಗಳೊಂದಿಗೆ ಮಾಡಿಸುವುದಾಗಿಯೂ ಬಹಿರಂಗಪಡಿಸಿದ್ದಾರೆ. ಅಲ್ಲದೇ ತಮಗೆ ವಿಜಯ ಸಿಗುವುದಾಗಿ ಮತ್ತು ವಿರೋಧಿಗಳು ಶೀಘ್ರದಲ್ಲೇ ಪರೀಕ್ಷೆ ಎದುರಿಸುವ ಬಗ್ಗೆ ತಮ್ಮ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

"ಬೇಬಿ, ನನ್ನನ್ನು ನಂಬಿ. ನಿಮ್ಮ ಹಾಗೂ ನನ್ನ ಬಗ್ಗೆ ನೆನೆದು ನಗುವ, ಅವಮಾನ ಮಾಡುವ, ನಮ್ನನ್ನು ಜಡ್ಜ್ ಮಾಡಿದ ಎಲ್ಲರ ಮುಂದೆ ನಾವು ಖುಷಿಯ ಕ್ಷಣ ಕಳೆಯಲಿದ್ದೇವೆ. ಶೀಘ್ರದಲ್ಲೇ ಸತ್ಯದ ಕ್ಷಣ ಬರಲಿದ್ದು, ಅವರುಗಳಿಗೆ ಮುಖ ತೋರಿಸಲಾಗದ ಸ್ಥಿತಿ ಬರುತ್ತದೆ" ಎಂದು ಚಂದ್ರಶೇಖರ್ ತಿಳಿಸಿದ್ದಾರೆ.

ಇದನ್ನೂ ಓದಿ: ಇಂಡಿಯಾ vs ಪಾಕ್: ಅರಿಜಿತ್ ಸಿಂಗ್ ಕಂಠಸಿರಿಗೆ ಮನಸೋತ ಫ್ಯಾನ್ಸ್ - ಧೋನಿ ಎಂಜಾಯ್​ ವಿಡಿಯೋ ವೈರಲ್​

ಜಾಕ್ವೆಲಿನ್‌ಗೆ ಅಚಲ ಬೆಂಬಲ, ರಕ್ಷಣೆಯ ಭರವಸೆಯೊಂದಿಗೆ ಸುಕೇಶ್ ತಮ್ಮ ಪತ್ರ ಪೂರ್ಣಗೊಳಿಸಿದ್ದಾರೆ. "ಬೇಬಿ ಈ ಜಗತ್ತಿನಲ್ಲಿರುವ ಯಾವುದೇ 'ಪಂಜರ' (ಜೈಲು) ನಾನು ನಿಮ್ಮನ್ನು ಪ್ರೀತಿಸುವುದನ್ನು, ರಕ್ಷಿಸುವುದನ್ನು, ನಿಮ್ಮ ಪರ ನಿಲ್ಲುವುದನ್ನು ತಡೆಯಲು ಸಾಧ್ಯವಿಲ್ಲ. ಬೇಬಿ, ನೀವು ನನ್ನನ್ನು ಎಷ್ಟು ಪ್ರೀತಿಸುತ್ತೀರೆಂಬುದು ನನಗೆ ಗೊತ್ತು. ಈ ಲವ್​ ಯೂ ಬೇಬಿ'' ಎಂದು ಬರೆದು ಪತ್ರ ಪೂರ್ಣಗೊಳಿಸಿದ್ದಾರೆ.