ನಿನ್ನೆ ಗದರ್​ 2 ಇಂದು ಜವಾನ್​​: ಭಾರತದಲ್ಲೀಗ ಅತಿ ಹೆಚ್ಚು ಕಲೆಕ್ಷನ್​​ ಮಾಡಿದ ಹಿಂದಿ ಚಿತ್ರ 'Jawan​​'!

SRK Jawan Record: ಶಾರುಖ್​​ ಖಾನ್​ ಮುಖ್ಯಭೂಮಿಕೆಯ ಜವಾನ್​ ಸಿನಿಮಾ ಭಾರತದಲ್ಲೀಗ ಅತಿ ಹೆಚ್ಚು ಕಲೆಕ್ಷನ್​​ ಮಾಡಿದ ಹಿಂದಿ ಚಿತ್ರ. ನಿನ್ನೆ ಈ ಸ್ಥಾನದಲ್ಲಿ ಸನ್ನಿ ಡಿಯೋಲ್​ ಅವರ ಗದರ್ 2 ಇತ್ತು.

ಪ್ರಪಂಚದಾದ್ಯಂತ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಸಂಪಾದಿಸಿರುವ ಬಾಲಿವುಡ್​ ಕಿಂಗ್​​ ಶಾರುಖ್ ಖಾನ್ ಅವರಿಗೆ ಈ ವರ್ಷ ಬಹಳಾನೇ ವಿಶೇಷ. ನಾಲ್ಕು ವರ್ಷಗಳ ಬ್ರೇಕ್​ ಬಳಿಕ ಬಂದ ಶಾರುಖ್​​ 2023ರಲ್ಲಿ ಅದ್ಭುತ ಯಶಸ್ಸನ್ನು ಕಂಡಿದ್ದಾರೆ. ಈಗಾಗಲೇ ತೆರೆಕಂಡು ಚಿತ್ರಮಂದಿರಗಳಲ್ಲಿ ಧೂಳೆಬ್ಬಿಸಿರುವ ಪಠಾಣ್​, ಜವಾನ್​ ಬಾಕ್ಸ್​ ಆಫೀಸ್​ನಲ್ಲಿ 1,000 ಕೋಟಿ ರೂ. ಗಳಿಸುವಲ್ಲಿ ಯಶ ಕಂಡಿದೆ. ಡಿಸೆಂಬರ್​ನಲ್ಲಿ ತೆರೆಕಾಣಲು ಸಜ್ಜಾಗುತ್ತಿರುವ ಡಂಕಿ ಸಿನಿಮಾದ ಮೇಲೆ ಸಿನಿಪ್ರಿಯರು ಸಾಕಷ್ಟು ನಿರೀಕ್ಷೆಗಳನ್ನಿಟ್ಟುಕೊಂಡಿದ್ದಾರೆ. ಒಂದು ವೇಳೆ ಡಂಕಿ ಕೂಡ ಸಾವಿರ ಕೋಟಿ ರೂ. ಸಂಪಾದಿಸಿದರೆ ಅದು ಭಾರತೀಯ ಚಿತ್ರರಂಗದಲ್ಲೇ ದೊಡ್ಡ ಇತಿಹಾಸ ಆಗಲಿದೆ.

ಜವಾನ್ ದಾಖಲೆ...

ಗದರ್ 2 VS ಜವಾನ್​: ಈ ವರ್ಷಾರಂಭದಲ್ಲಿ ತೆರೆಕಂಡ 'ಪಠಾಣ್' ಚಿತ್ರ ಭಾರತೀಯ ಬಾಕ್ಸ್ ಆಫೀಸ್‌ನಲ್ಲಿ ಅತಿ ಹೆಚ್ಚು ಕಲೆಕ್ಷನ್​ ಮಾಡಿದ ಹಿಂದಿ ಚಲನಚಿತ್ರವಾಗಿ ಹೊರಹೊಮ್ಮಿತ್ತು. ಗುರುವಾರದಂದು, ಸನ್ನಿ ಡಿಯೋಲ್ ಅವರ ಇತ್ತೀಚಿನ ಸೂಪರ್​ ಹಿಟ್​ 'ಗದರ್ 2' ಸಿನಿಮಾ ಹಿಂದಿನ 'ಪಠಾಣ್' ದಾಖಲೆಯನ್ನು ಪುಡಿಗಟ್ಟಿತು. ಸನ್ನಿ ಡಿಯೋಲ್ ಮುಖ್ಯಭೂಮಿಕೆಯ ಸಿನಿಮಾ 'ಪಠಾಣ್' ದಾಖಲೆಯನ್ನು ಮೀರಿಸಿದ ಒಂದೇ ದಿನದ ಅಂತರದಲ್ಲಿ ಶಾರುಖ್ ಖಾನ್ ಅವರ ಇತ್ತೀಚಿನ ಸಿನಿಮಾ ನಂಬರ್​ ಒನ್ ಸ್ಥಾನಕ್ಕೆ ಏರಿದೆ. ಗದರ್ 2 ತೆರೆಕಂಡು ಸರಿಸುಮಾರು ಒಂದು ತಿಂಗಳ ನಂತರ ಬಿಡುಗಡೆಯಾದ ಬಹುನಿರೀಕ್ಷಿತ ಜವಾನ್ ಸಿನಿಮಾ ಈಗ ಭಾರತದಲ್ಲಿ ಅತಿ ಹೆಚ್ಚು ಗಳಿಕೆ ಮಾಡಿದ ಹಿಂದಿ ಚಲನಚಿತ್ರವಾಗಿದೆ.

• View this post on Instagram

  A post shared by Red Chillies Entertainment (@redchilliesent)

ಜವಾನ್​​ ಸಿನಿಮಾ ನಿರ್ಮಾಣ ಮಾಡಿರುವ ರೆಡ್ ಚಿಲ್ಲೀಸ್ ಎಂಟರ್‌ಟೈನ್‌ಮೆಂಟ್ ಇಂದು ಸಾಮಾಜಿಕ ಮಾಧ್ಯಮದಲ್ಲಿ ಜವಾನ್ ಕಲೆಕ್ಷನ್​ ಮಾಹಿತಿಯನ್ನು ಹಂಚಿಕೊಂಡಿದೆ. ಫೈರ್ ಎಮೋಜಿಯೊಂದಿಗೆ ''ಓರ್ವ ರಾಜ, ಒಂದರ ಹಿಂದೆ ಒಂದರಂತೆ ಬಾಕ್ಸ್ ಆಫೀಸ್ ದಾಖಲೆಗಳನ್ನು ಪುಡಿಗಟ್ಟಿದ. ಅತಿ ಹೆಚ್ಚು ಕಲೆಕ್ಷನ್​ ಮಾಡಿದ ಸಿನಿಮಾ ಜವಾನ್. ಎಲ್ಲ ದಾಖಲೆಗಳ ರಾಜ. ಸಿನಿಮಾದ ಜಾಗತಿಕ ಕಲೆಕ್ಷನ್​​ 1043 ಕೋಟಿ ರೂ.'' ಎಂದು ಪೋಸ್ಟ್​ನಲ್ಲಿ ಬರೆಯಲಾಗಿದೆ. ಪಠಾಣ್ ಹಿಂದಿಕ್ಕಿದ ಸನ್ನಿ ಡಿಯೋಲ್ ಅವರ 'ಗದರ್ 2' ಸ್ಥಾನವನ್ನೀಗ ಜವಾನ್​ ಆಕ್ರಮಿಸಿದೆ. ಬಿಗ್​ ಸ್ಟಾರ್ ಕಾಸ್ಟ್ ಹೊಂದಿದ 'ಜವಾನ್' ಹಿಂದಿಯಲ್ಲಿ 584 ಕೋಟಿ ರೂ. ಗಳಿಸಿದೆ. 'ಪಠಾಣ್'​ ಕಲೆಕ್ಷನ್​​ 524.53 ಕೋಟಿ ರೂ.

ಇದನ್ನೂ ಓದಿ: 'ಪಠಾಣ್'​ ಹಿಂದಿಕ್ಕಿ ಅತಿ ಹೆಚ್ಚು ಗಳಿಕೆ ಮಾಡಿದ ಹಿಂದಿ ಚಿತ್ರವಾಗಿ ಹೊರಹೊಮ್ಮಿದ 'ಗದರ್​ 2'

ಗದರ್ 2 ಸಿನಿಮಾ ಹಲವು ಥಿಯೇಟರ್​ಗಳಲ್ಲಿ ಪ್ರದರ್ಶನ ಮುಂದುವರಿಸಿದೆ. ಬಿಡುಗಡೆ ಆದ 7ನೇ ವಾರ 524.75 ಕೋಟಿ ರೂಪಾಯಿ ಗಳಿಸುವ (ಗುರುವಾರ, ನಿನ್ನೆ) ಮೂಲಕ ಪಠಾಣ್ ದಾಖಲೆಯನ್ನು ಮುರಿಯಿತು. ಈ ಮೂಲಕ ಭಾರತದಲ್ಲಿ ಅತಿ ಹೆಚ್ಚು ಗಳಿಕೆ ಮಾಡಿದ ಹಿಂದಿ ಚಲನಚಿತ್ರವಾಗಿ ಹೊರಹೊಮ್ಮಿತು. ಈ ಸಂತೋಷ ಕೇವಲ ಒಂದೇ ದಿನಕ್ಕೆ ಸೀಮಿತ. ಜವಾನ್ ಇಂದು (ಸೆಪ್ಟೆಂಬರ್ 29, ಶುಕ್ರವಾರ) 584.32 ಕೋಟಿ ರೂಪಾಯಿ ಸಂಪಾದಿಸಿಸುವ ಮೂಲಕ ಭಾರತದಲ್ಲಿ ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಮೊದಲ ಹಿಂದಿ ಚಲನಚಿತ್ರವಾಗಿ ಹೊರಹೊಮ್ಮಿದೆ. ಜವಾನ್ ಜಾಗತಿಕ ಬಾಕ್ಸ್ ಆಫೀಸ್​ ಕಲೆಕ್ಷನ್ 1043.21 ಕೋಟಿ ರೂಪಾಯಿ.

ಇದನ್ನೂ ಓದಿ: ಕಂಗನಾ ರಣಾವತ್​​ - ರಾಘವ ಲಾರೆನ್ಸ್ ಮುಖ್ಯಭೂಮಿಕೆಯ 'ಚಂದ್ರಮುಖಿ 2' ಗಳಿಸಿದ್ದಿಷ್ಟು!