ಹೈದರಾಬಾದ್: ದಿವಂಗತ ನಟಿ ಶ್ರೀದೇವಿಯ ಎರಡನೇ ಮಗಳು ಕೂಡ ಇದೀಗ ಬಾಲಿವುಡ್ ಪ್ರವೇಶಕ್ಕೆ ಸಜ್ಜಾಗಿದ್ದು, ಖುಷಿ ಕಪೂರ್ ಅಭಿಯನದ ಮೊದಲ ಸಿನಿಮಾ ತೆರೆಗೆ ಬರಲು ಸಜ್ಜಾಗಿದೆ. ದಿ ಆರ್ಚೀಸ್ನಲ್ಲಿ ಮೊದಲ ಬಾರಿಗೆ ನಟಿಸಿರುವ ನಟಿ ಖುಷಿ ಕಪೂರ್, ಪ್ರಿಮೀಯರ್ ಶೋಗೆ ಆಗಮಿಸಿದ್ದ ವೇಳೆ ತೊಟ್ಟ ದಿರಿಸು ಇದೀಗ ಎಲ್ಲರ ಗಮನ ಸೆಳೆದಿದೆ. ಕಾರಣ, ಆಕೆ ತೊಟ್ಟಿದ್ದು, ತನ್ನ ಅಮ್ಮ ಶ್ರೀದೇವಿಯ ಗೌನ್. ಶ್ರೀ ದೇವಿ ಈ ಹಿಂದೆ ತೊಟ್ಟಿದ್ದ ಗೋಲ್ಡನ್ ಗೌನ್ ಅನ್ನೇ ಹಾಕಿ ರೆಡ್ ಕಾರ್ಪೆಟ್ ಮೇಲೆ ಹೆಜ್ಜೆ ಹಾಕಿದ್ದಾಳೆ ಖುಷಿ ಕಪೂರ್. ಈ ಮೂಲಕ ಭಾವನಾತ್ಮಕವಾಗಿ ಅಮ್ಮನನ್ನು ತನ್ನ ಹೊಸ ಆರಂಭದಲ್ಲಿ ಸ್ಮರಿಸಿದ್ದಾಳೆ.
ಇದೇ ಡಿಸೆಂಬರ್ 7ರಂದು ನೆಟ್ಫ್ಲಿಕ್ಸ್ನಲ್ಲಿ ಬಿಡುಗಡೆಯಾಗುತ್ತಿರುವ ವೆಬ್ ಸೀರೀಸ್ ಆರ್ಚೀಸ್ನಲ್ಲಿ ಬಾಲಿವುಡ್ ನಟ - ನಟಿಯರ ಮಕ್ಕಳು ನಟಿಸುವ ಮೂಲಕ ಗಮನ ಸೆಳೆದಿದ್ದಾರೆ. ಈ ಚಿತ್ರದ ಪ್ರೀಮಿಯರ್ ಶೋ ಮಂಗಳವಾರ ಆಯೋಜಿಸಲಾಗಿತ್ತು. ಈ ಕಾರ್ಯಕ್ರಮದಲ್ಲಿ ಖುಷಿ ಕಪೂರ್ ತನ್ನ ತಾಯಿ ಶ್ರೀದೇವಿಯ ಪ್ರಸಿದ್ಧ ಕೌಫ್ಮನ್ ಫ್ರಾಂಕೋ ಗೌನ್ ತೊಟ್ಟು ಎಲ್ಲರನ್ನು ಬೆರಗಾಗಿಸಿದರು. ಇದಕ್ಕೆ ಒಪ್ಪುವಂತೆ ಶ್ರೀದೇವಿಯ ಕಿವಿ ಓಲೆ ಮತ್ತು ನೆಕ್ಲೆಸ್ ಅನ್ನು ತೊಟ್ಟು ಖುಷಿ ಕಪೂರ್ ಗಮನ ಸೆಳೆದಿದ್ದಾರೆ.
10 ವರ್ಷದ ಹಿಂದೆ ತೊಟ್ಟಿದ್ದ ಗೌನ್: 2013ರಲ್ಲಿ ಶ್ರೀ ದೇವಿ ಐಐಎಫ್ಎ ಪ್ರಶಸ್ತಿ ಪ್ರಧಾನ ಸಮಾರಂಭದಲ್ಲಿ ಈ ಧಿರಿಸನ್ನು ತೊಟ್ಟಿದ್ದರು. ಇನ್ನು ಖುಷಿ ತೊಟ್ಟ ಆಭರವಣ 2011ರ ಐಐಎಫ್ಎ ಪ್ರಶಸ್ತಿಯಲ್ಲಿ ಶ್ರೀದೇವಿ ಹಾಕಿದ್ದರು. ಅಮ್ಮನ ಧಿರಿಸಿನಲ್ಲಿ ಮಗಳು ಮಿಂಚುತ್ತಿದ್ದಂತೆ ಸಾಮಾಜಿಕ ಜಾಲತಾಣದಲ್ಲಿ ಇಬ್ಬರು ಒಂದೇ ಧಿರಿಸು ತೊಟ್ಟ ಫೋಟೋಗಳು ಹೋಲಿಕೆ ಮಾಡಿರುವ ಚಿತ್ರಗಳು ಹರಿದಾಡುತ್ತಿದೆ. ಅಷ್ಟೇ ಅಲ್ಲದೆ, ಖುಷಿಯ ಡ್ರೆಸ್ ಡಿಸೈನರ್ ಪ್ರಿಯಾಂಕಾ ಕಪಾಡಿಯಾ ಕೂಡ ಈ ಚಿತ್ರವನ್ನು ತಮ್ಮ ಇನ್ಸ್ಟಾಗ್ರಾಂನಲ್ಲಿ ಪೋಸ್ಟ್ ಮಾಡಿದ್ದಾರೆ. ಇದಕ್ಕೆ ಅಡಿ ಬರಹ ಬರೆದಿರುವ ಪ್ರಿಯಾಂಕಾ, ವಿಶೇಷ ರಾತ್ರಿಯಲ್ಲಿ ಆಕೆಯ ತಾಯಿಯ ವಿಶೇಷ ಉಡುಪು ಎಂದು ತಿಳಿಸಿದ್ದಾರೆ.
ಈಗಾಗಲೇ ಬಾಲಿವುಡ್ನಲ್ಲಿ ಸಿನಿಮಾದಲ್ಲಿ ಮಿಂಚುತ್ತಿರುವ ಖುಷಿ ಅಕ್ಕ ಜಾಹ್ನವಿ ಕಪೂರ್ ಪ್ರೀಮಿಯರ್ ಶೋಗೆ ತಂದೆ ಬೋನಿ ಕಪೂರ್ ಜೊತೆಗೆ ಆಗಮಿಸಿದ್ದರು. ಪ್ರೀಮಿಯರ್ ಶೋ ಸಂಪೂರ್ಣವಾಗಿ ಬಾಲಿವುಡ್ ನಟ-ನಟಿಯರಿಂದ ತುಂಬಿ ಹೋಗಿತ್ತು. ಅಮಿತಾಬ್ ಬಚ್ಚನ್ - ನಂದ ಕುಟುಂಬ ಮತ್ತು ಶಾರುಖ್ ಖಾನ್ ಕುಟುಂಬವೂ ಆಗಮಿಸಿತು. ಇದರ ಜೊತೆಗೆ ಕತ್ರಿನಾ ಕೈಫ್, ಜೂಹಿ ಚಾವ್ಲಾ, ಕರಣ್ ಜೋಹರ್ ಮತ್ತಿತ್ತರು ಆಗಮಿಸಿದ್ದರು.
ಜೋಯಾ ಅಖ್ತರ್ ನಿರ್ದೇಶನದಲ್ಲಿ ದಿ ಆರ್ಚೀಸ್ ಚಿತ್ರ ಮೂಡಿ ಬಂದಿದೆ. ಅಮೆರಿಕದ ಪ್ರಖ್ಯಾತ ಕಾಮಿಕ್ ಬುಕ್ ಆಧಾರಿತದ ಕಥೆಯ ಸಿನಿಮಾ ಇದಾಗಿದೆ. ಸಿನಿಮಾದಲ್ಲಿ ಬೆಟ್ಟಿ ಕೂಪರ್ ಪಾತ್ರದಲ್ಲಿ ಖುಷಿ ಕಪೂರ್ ಕಾಣಿಸಿಕೊಂಡಿದ್ದರೆ, ಸುಹಾನಾ ಖಾನ್ ವೆರೋನಿಕಾ ಪಾತ್ರದಲ್ಲಿ, ಆಗಸ್ತ್ಯ ನಂದ ಆರ್ಚೀ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಇದನ್ನೂ ಓದಿ: ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ 'ಕೃಷ್ಣಂ ಪ್ರಣಯ ಸಖಿ' ಚಿತ್ರೀಕರಣ ಮುಕ್ತಾಯ
