ರೆಬೆಲ್ ಸ್ಟಾರ್ ಪ್ರಭಾಸ್ ಮತ್ತು ಕೆಜಿಎಫ್ ಖ್ಯಾತಿಯ ಪ್ರಶಾಂತ್ ನೀಲ್ ಕಾಂಬಿನೇಶನ್ನ ಬಹುನಿರೀಕ್ಷಿತ ಚಿತ್ರ 'ಸಲಾರ್'. ಡಿಸೆಂಬರ್ 22ರಂದು ಸಲಾರ್ ತೆರೆಗಪ್ಪಳಿಸಲಿದೆ. ರಿಲೀಸ್ಗೆ ಇನ್ನೆರಡೇ ದಿನ ಬಾಕಿ ಉಳಿದಿದ್ದು, ಸಿನಿಮಾ ಸುತ್ತಲಿನ ನಿರೀಕ್ಷೆ ಗರಿಗೆದರಿದೆ. ಬಹುನಿರೀಕ್ಷಿತ ಚಿತ್ರ ಬಿಡುಗಡೆಗೂ ಮುನ್ನವೇ ದಾಖಲೆ ಬರೆಯುತ್ತಿದೆ.
ಸಿನಿಮಾದ ಮುಂಗಡ ಬುಕ್ಕಿಂಗ್ ಪ್ರಕ್ರಿಯೆ ಜೋರಾಗೇ ನಡೆಯುತ್ತಿದೆ. ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್ ಮತ್ತು ಕೆಜಿಎಫ್ ಖ್ಯಾತಿಯ ಪ್ರಶಾಂತ್ ನೀಲ್ ಸೇರಿ ಸಿನಿಮಾ ಮಾಡಿರೋ ಹಿನ್ನೆಲೆ 'ಸಲಾರ್' ಟಿಕೆಟ್ಗಳು ಶರವೇಗದಲ್ಲಿ ಮಾರಾಟವಾಗುತ್ತಿದೆ. ಹೊರದೇಶಗಳಲ್ಲಿ ಕೂಡ ಈ ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಅದಾಗ್ಯೂ, ಅನೇಕ ದೇಶಗಳಲ್ಲಿ ಇನ್ನಷ್ಟೇ ಅಡ್ವಾನ್ಸ್ ಟಿಕೆಟ್ ಪ್ರೊಸೆಸ್ ಓಪನ್ ಆಗಬೇಕಷ್ಟೇ. ಸದ್ಯ ವಿಶ್ವದಾದ್ಯಂತ ಮುಂಗಡ ಬುಕ್ಕಿಂಗ್ನಲ್ಲಿ 'ಸಲಾರ್' 21 ಕೋಟಿ ರೂ. ಕಲೆಕ್ಷನ್ ಮಾಡಿದೆ ಎಂದು ವರದಿಯಾಗಿದೆ.
ಉತ್ತರ ರಾಜ್ಯಗಳಲ್ಲಿ 'ಸಲಾರ್' ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ಭಾನುವಾರ (ಡಿಸೆಂಬರ್ 17) ಆರಂಭವಾಗಿದೆ. ಇಲ್ಲಿ ಸಲಾರ್ ವೀಕ್ಷಿಸಲು ಹೆಚ್ಚಿನ ಸಂಖ್ಯೆಯ ಟಿಕೆಟ್ಗಳು ಖರೀದಿಯಾಗಿವೆ. ಹಿಂದಿಯಲ್ಲಿ 15 ಸಾವಿರ ಟಿಕೆಟ್ಗಳು ಮಾರಾಟವಾಗಿವೆ. ಇತರೆ ಭಾಷೆಗಳ 10,000ಕ್ಕೂ ಹೆಚ್ಚು ಟಿಕೆಟ್‌ಗಳನ್ನು ಪ್ರೇಕ್ಷಕರು ಮುಂಗಡವಾಗಿ ಕಾಯ್ದಿರಿಸಿದ್ದಾರೆ. ಪಿವಿಆರ್ ಮತ್ತು ಐನಾಕ್ಸ್ ಸ್ಕ್ರೀನ್ಗಳಲ್ಲಿ ಸುಮಾರು 25 ಸಾವಿರ ಅಡ್ವಾನ್ಸ್ ಟಿಕೆಟ್ಗಳು ಬುಕ್ ಆಗಿವೆ. ಈ ಮೂಲಕ 5 ಕೋಟಿ ರೂ.ಗೂ ಹೆಚ್ಚಿನ ವ್ಯವಹಾರ ನಡೆದಂತಿದೆ. ಆದರೆ, ಮೊದಲ ದಿನದ ಮುಂಗಡ ಬುಕಿಂಗ್ನ ಕಲೆಕ್ಷನ್ 4.29 ಕೋಟಿ ರೂಪಾಯಿ ಆಗಿದೆ ಎಂದು ವರದಿಯಾಗಿದೆ.
ಸಾಗರೋತ್ತರ ಪ್ರದೇಶದಲ್ಲಿನ 'ಸಲಾರ್' ಕಲೆಕ್ಷನ್: 'ಸಲಾರ್' ವಿದೇಶದಲ್ಲೂ ಸಖತ್ ಸದ್ದು ಮಾಡುತ್ತಿದೆ. ಅಮೆರಿಕ ಮತ್ತು ಕೆನಡಾದಲ್ಲಿ 1.2 ಮಿಲಿಯನ್ ಡಾಲರ್ ಕಲೆಕ್ಷನ್ ಮಾಡಿದೆ. ಯುಎಇ ಮತ್ತು ಮಧ್ಯಪ್ರಾಚ್ಯದಲ್ಲಿ 1 ಲಕ್ಷ ಡಾಲರ್ ಮತ್ತು ಯುಕೆಯಲ್ಲಿ 2 ಲಕ್ಷ ಪೌಂಡ್‌ ನಷ್ಟು ವ್ಯವಹಾರ ನಡೆಸಿದೆ. ಈ ಮೂಲಕ ವಿಶ್ವದಾದ್ಯಂತ ಮುಂಗಡ ಟಿಕೆಟ್ ಬುಕಿಂಗ್ ಪ್ರಕ್ರಿಯೆಯಲ್ಲಿ 'ಸಲಾರ್' ಒಟ್ಟು 21 ಕೋಟಿ ರೂ. ವ್ಯವಹಾರ ನಡೆಸಿದೆ. ಸಿನಿಮಾ ಮೊದಲ ದಿನವೇ 100 ಕೋಟಿ ರೂ.ಗೂ ಅಧಿಕ ಗಳಿಕೆ ಮಾಡಲಿದೆ ಎಂದು ಸಿನಿಮಾ ವಿಶ್ಲೇಷಕರು ಭವಿಷ್ಯ ನುಡಿದಿದ್ದಾರೆ.
ಇದನ್ನೂ ಓದಿ: ಕೆಂಪಂಗಿಯಲ್ಲಿ ಕಿಲ್ಲರ್ ಲುಕ್ ಕೊಟ್ಟ 'ಅನಿಮಲ್' ನಟಿ; ಹೆಚ್ಚಿತು ತೃಪ್ತಿ ಡಿಮ್ರಿ ಪಾಪ್ಯುಲಾರಿಟಿ
ಕೆಜಿಎಫ್ ಮತ್ತು ಕಾಂತಾರದಂತಹ ಸೂಪರ್ ಹಿಟ್ ಸಿನಿಮಾಗಳನ್ನು ನಿರ್ಮಾಣ ಮಾಡಿರುವ ಖ್ಯಾತ ನಿರ್ಮಾಣ ಸಂಸ್ಥೆ ಹೊಂಬಾಳೆ ಫಿಲ್ಮ್ಸ್ ಸಲಾರ್ ಸಿನಿಮಾವನ್ನು ನಿರ್ಮಿಸಿದೆ. ಪ್ರಭಾಸ್ ಜೊತೆಗೆ ಶ್ರುತಿ ಹಾಸನ್, ಪೃಥ್ವಿರಾಜ್ ಸುಕುಮಾರನ್, ಮೀನಾಕ್ಷಿ ಚೌಧರಿ, ಈಶ್ವರಿ ರಾವ್, ಶರಣ್ ಶಕ್ತಿ ಸೇರಿದಂತೆ ಮುಂತಾದವರು ಸಿನಿಮಾದಲ್ಲಿ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.
ಇದನ್ನೂ ಓದಿ: ನಿರ್ದೇಶಕ ರೋಹಿತ್ ಜುಗರಾಜ್ಗೆ ಜೀವ ಬೆದರಿಕೆ
