2023ಕ್ಕೆ ಬೈ ಹೇಳಿ 2024 ಸ್ವಾಗತಿಸಲು ಸರ್ವರೂ ಸಜ್ಜಾಗಿದ್ದಾರೆ. ಈ ಸಾಲಿನಲ್ಲಿ ಭಾರತೀಯ ಚಿತ್ರರಂಗ ಸಖತ್ ಸದ್ದು ಮಾಡಿದೆ. ಒಂದಾದ ಬಳಿಕ ಒಂದರಂತೆ ಚಿತ್ರಗಳು ತೆರೆಕಂಡಿವೆ. ಏಕಕಾಲಕ್ಕೆ ಬಹುನಿರೀಕ್ಷಿತ ಚಿತ್ರಗಳು ತೆರೆಕಂಡು ಬಾಕ್ಸ್ ಆಫೀಸ್ನಲ್ಲಿ ಗದ್ದಲ ಸೃಷ್ಟಿಸಿದ ಉದಾಹರಣೆಗಳೂ ನಮ್ಮ ಮಂದಿವೆ. ಅದ್ಭುತ ಸಿನಿಮೀಯ ಅನುಭವವನ್ನು 2023 ನೀಡಿದ್ದು, 2024ರಲ್ಲೂ ಒಂದಾದ ಬಳಿಕ ಒಂದರಂತೆ ತೆರೆಗಪ್ಪಳಿಸಲು ಬಹುನಿರೀಕ್ಷಿತ ಚಿತ್ರಗಳು ಸಜ್ಜಾಗಿವೆ.
ಸಂಕ್ರಾಂತಿ, ಗಣರಾಜ್ಯೋತ್ಸವದಿಂದ ಹಿಡಿದು ಸ್ವಾತಂತ್ರ್ಯ ದಿನ, ದೀಪಾವಳಿ, ಕ್ರಿಸ್ಮಸ್ವರೆಗೂ ಸಿನಿಮಾಗಳು ಬಿಡುಗಡೆ ಆಗಲಿವೆ. ಹಲವು ಸಿನಿಮಾಗಳ ರಿಲೀಸ್ಗೆ ಈಗಾಗಲೇ ದಿನ ಕೂಡ ನಿಗದಿ ಆಗಿವೆ. ಹಾಗಾದ್ರೆ 2024ರಲ್ಲಿ ತೆರೆಕಾಣಲಿರುವ ಬಹುನಿರೀಕ್ಷಿತ ಸಿನಿಮಾಗಳಾವುವು? ಯಾವ ಚಿತ್ರಗಳು ಬಾಕ್ಸ್ ಆಫೀಸ್ನಲ್ಲಿ ಮುಖಾಮುಖಿಯಾಗಲಿವೆ ಅನ್ನೋದನ್ನು ನೋಡೋಣ ಬನ್ನಿ.
- 'ಕಾಂತಾರ: ಎ ಲೆಜೆಂಡ್-ಅಧ್ಯಾಯ 1': 2022ರಲ್ಲಿ ಕನ್ನಡ ಚಿತ್ರರಂಗದಲ್ಲಿ ಧೂಳೆಬ್ಬಿಸಿದ್ದ ಸಿನಿಮಾ 'ಕಾಂತಾರ'. ಇದರ ಪ್ರೀಕ್ವೆಲ್ ಪ್ರೀ ಪ್ರೊಡಕ್ಷನ್ ಹಂತದಲ್ಲಿರೋದು ನಿಮಗೆ ತಿಳಿದಿರುವ ವಿಚಾರ. ಹೊಂಬಾಳೆ ಫಿಲ್ಮ್ಸ್ ಮತ್ತು ರಿಷಬ್ ಶೆಟ್ಟಿ ಸಾರಥ್ಯದ ಈ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆಗಳಿದ್ದು, 2024ರಲ್ಲಿ ತೆರೆಕಾಣಲಿದೆ. ಅಧಿಕೃತ ಬಿಡುಗಡೆ ದಿನಾಂಕವನ್ನು ಚಿತ್ರತಂಡ ಇನ್ನಷ್ಟೇ ಘೋಷಿಸಬೇಕಿದೆ.
- ಮೆರ್ರಿ ಕ್ರಿಸ್ಮಸ್: ಶ್ರೀರಾಮ್ ರಾಘವನ್ ನಿರ್ದೇಶನದ ಮೆರ್ರಿ ಕ್ರಿಸ್ಮಸ್ ಸಿನಿಮಾ ಹೊಸ ವರ್ಷಾರಂಭದಲ್ಲೇ ತೆರೆಕಾಣಲಿದೆ. ಬಾಲಿವುಡ್ ಮತ್ತು ದಕ್ಷಿಣದ ಬಹುಬೇಡಿಕೆ ತಾರೆಯರಾದ ಕತ್ರಿನಾ ಕೈಫ್ ಮತ್ತು ವಿಜಯ್ ಸೇತುಪತಿ ಇದೇ ಮೊದಲ ಬಾರಿ ತೆರೆಹಂಚಿಕೊಂಡಿದ್ದು, ಈ ಕಾಂಬಿನೇಶನ್ನ ಕೆಮಿಸ್ಟ್ರಿ ನೋಡಲು ವೀಕ್ಷಕರು ಉತ್ಸುಕರಾಗಿದ್ದಾರೆ. ರೊಮ್ಯಾಂಟಿಕ್, ಸಸ್ಪೆನ್ಸ್ ಕಥೆಯಾಧಾರಿತ ಸಿನಿಮಾ 2024ರ ಜನವರಿ 12ರಂದು ತೆರೆಕಾಣಲಿದೆ.
- ಫೈಟರ್: ಪಠಾಣ್ ಖ್ಯಾತಿಯ ಸಿದ್ಧಾರ್ಥ್ ಆನಂದ್ ನಿರ್ದೇಶನ ಫೈಟರ್ ಸಿನಿಮಾ ಗಣರಾಜ್ಯೋತ್ಸವ ಸಂದರ್ಭ ತೆರೆಕಾಣಲಿದೆ. ವೈಮಾನಿಕ ಆ್ಯಕ್ಷನ್ ಮೂವಿ 2024ರ ಜನವರಿ 25ರಂದು ಬಿಡುಗಡೆ ಆಗಲಿದೆ. ದೀಪಿಕಾ ಪಡುಕೋಣೆ ಮತ್ತು ಹೃತಿಕ್ ರೋಷನ್ ಇದೇ ಮೊದಲ ಬಾರಿ ಸ್ಕ್ರೀನ್ ಶೇರ್ ಮಾಡಿದ್ದು, ಅದ್ಭುತ ಆ್ಯಕ್ಷನ್ ಸೀಕ್ವೆನ್ಸ್ ಅನ್ನು ಚಿತ್ರದಿಂದ ನಿರೀಕ್ಷಿಸಲಾಗಿದೆ.
- ಮೇ ಅಟಲ್ ಹೂ: ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಜೀವನಾಧಾರಿತ ಕಥೆ ಜನವರಿ 19ರಂದು ರಿಲೀಸ್ ಆಗಲಿದೆ. ರವಿ ಜಾಧವ್ ನಿರ್ದೇಶನದ ಈ ಚಿತ್ರದಲ್ಲಿ ರಾಷ್ಟ್ರ ಪ್ರಶಸ್ತಿ ವಿಜೇತ ನಟ ಪಂಕಜ್ ತ್ರಿಪಾಠಿ ಸೇರಿದಂತೆ ಹಲವರು ನಟಿಸಿದ್ದಾರೆ.
- ಲವ್, ಸೆಕ್ಸ್ ಔರ್ ಧೋಖಾ 2: ನಿರ್ದೇಶಕ ದಿಬಾಕರ್ ಬ್ಯಾನರ್ಜಿ ಅವರು ತಮ್ಮ 'ಲವ್, ಸೆಕ್ಸ್ ಔರ್ ಧೋಖಾ'ದ ಸೀಕ್ವೆಲ್ನೊಂದಿಗೆ ಬರಲು ಸಜ್ಜಾಗಿದ್ದಾರೆ. 2010ರಲ್ಲಿ ಮೊದಲ ಭಾಗ ತೆರೆಕಂಡಿತ್ತು. ಎರಡನೇ ಭಾಗ ಫೆಬ್ರವರಿ 16 ರಂದು ರಿಲೀಸ್ ಆಗಲಿದೆ.
- ಯೋಧ: ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ದಿಶಾ ಪಟಾನಿ ಅಭಿನಯದ ಯೋಧ ಸಿನಿಮಾ ಮಾರ್ಚ್ 15ರಂದು ತೆರೆಕಾಣಲಿದೆ. ಧರ್ಮ ಪ್ರೊಡಕ್ಷನ್ಸ್ ನಿರ್ಮಾಣದ ಚಿತ್ರವನ್ನು ಪುಷ್ಕರ್ ಓಜಾ ಮತ್ತು ಸಾಗರ್ ಅಂಬ್ರೆ ನಿರ್ದೇಶಿಸಿದ್ದಾರೆ.
- ಮೆಟ್ರೋ ಇನ್ ದಿನೋ: ಆದಿತ್ಯ ರಾಯ್ ಕಪೂರ್ ಮತ್ತು ಸಾರಾ ಅಲಿ ಖಾನ್ ನಟನೆಯ ಮೆಟ್ರೋ ಇನ್ ದಿನೋ ಸಿನಿಮಾ ಮಾರ್ಚ್ 29ರಂದು ತೆರೆಕಾಣಲಿದೆ. ಪ್ರಸ್ತುತ ರಿಲೇಶನ್ಶಿಪ್ ಸುತ್ತ ಕಥೆ ಸಾಗುತ್ತದೆ ಎಂದು ಹೇಳಲಾಗಿದೆ.
- ಬಡೇ ಮಿಯಾನ್ ಚೋಟೆ ಮಿಯಾನ್: ಅಲಿ ಅಬ್ಬಾಸ್ ಜಾಫರ್ ಅವರ ಆ್ಯಕ್ಷನ್ ಪ್ಯಾಕ್ಡ್ ಸಿನಿಮಾ ಏಪ್ರಿಲ್ 10ರಂದು ತೆರಕಾಣಲಿದೆ. ಬಾಲಿವುಡ್ ಸೂಪರ್ಸ್ಟಾರ್ಗಳಾದ ಅಕ್ಷಯ್ ಕುಮಾರ್, ಮಾನುಷಿ ಛಿಲ್ಲರ್, ಪೃಥ್ವಿರಾಜ್ ಸುಕುಮಾರನ್, ಸೋನಾಕ್ಷಿ ಸಿನ್ಹಾ ಮತ್ತು ಟೈಗರ್ ಶ್ರಾಫ್ ಸೇರಿದಂತೆ ಹಲವರು ನಟಿಸಿದ್ದಾರೆ.
- ತೇರೆ ಇಷ್ಕ್ ಮೇ: ಧನುಷ್, ಆನಂದ್ ಎಲ್ ರೈ ಅವರ ತೇರೆ ಇಷ್ಕ್ ಮೇ ಜೂನ್ 22 ರಂದು ತೆರೆಕಾಣಲಿದೆ.
- ಚಂದು ಚಾಂಪಿಯನ್: ಕಬೀರ್ ಖಾನ್ ನಿರ್ದೇಶನದ ಚಂದು ಚಾಂಪಿಯನ್ ಜೂನ್ 14ರಂದು ತೆರೆಕಾಣಲಿದೆ. ಕಬೀರ್ ಖಾನ್ ನಿರ್ದೇಶನದ ಈ ಚಿತ್ರ ಭಾರತದ ಮೊದಲ ಪ್ಯಾರಾಲಿಂಪಿಕ್ಸ್ ಗೋಲ್ಡ್ ಮೆಡಲ್ ವಿನ್ನರ್ ಮುರಳಿಕಾಂತ್ ಪೆಟ್ಕರ್ ಅವರ ಜೀವನಾಧಾರಿತ ಕಥೆಯಾಗಿದೆ. ಕಾರ್ತಿಕ್ ಆರ್ಯನ್ ಮುಖ್ಯಭೂಮಿಕೆಯಲ್ಲಿದ್ದಾರೆ.
- ಸ್ತ್ರೀ 2: ಹಾರರ್ ಕಾಮಿಡಿ ಸ್ತ್ರೀ ಸಿನಿಮಾದ ಸೀಕ್ವೆಲ್ ಆಗಸ್ಟ್ನಲ್ಲಿ ತೆರೆಕಾಣಲಿದೆ. ಶ್ರದ್ಧಾ ಕಪೂರ್, ರಾಜ್‌ಕುಮಾರ್ ರಾವ್, ಅಪರಶಕ್ತಿ ಖುರಾನಾ ಮತ್ತು ಪಂಕಜ್ ತ್ರಿಪಾಠಿ ನಟಿಸಿದ್ದಾರೆ.
- ಸಿಂಗಮ್ ಎಗೈನ್: ರೋಹಿತ್ ಶೆಟ್ಟಿ ನಿರ್ದೇಶನದ ಈ ಚಿತ್ರ ಆಗಸ್ಟ್ನಲ್ಲಿ ತೆರೆಕಾಣಲಿದೆ. ದೀಪಿಕಾ ಪಡುಕೋಣೆ, ಕರೀನಾ ಕಪೂರ್ ಖಾನ್, ಅಜಯ್ ದೇವಗನ್, ಅಕ್ಷಯ್ ಕುಮಾರ್, ಟೈಗರ್ ಶ್ರಾಫ್, ರಣ್ವೀರ್ ಸಿಂಗ್ ಮತ್ತು ಅರ್ಜುನ್ ಕಪೂರ್ ಸೇರಿದಂತೆ ಹಲವರು ನಟಿಸಿದ್ದಾರೆ.
- ಪುಷ್ಪ 2: ದಕ್ಷಿಣದ ಬಹುನಿರೀಕ್ಷಿತ ಸಿನಿಮಾ ಪುಷ್ಪ 2 ಆಗಸ್ಟ್ 15ರಂದು ತೆರೆಕಾಣಲಿದೆ. ಚಿತ್ರಕ್ಕೆ ಸಂಬಂಧಿಸಿದಂತೆ ಅಲ್ಲು ಅರ್ಜುನ್ ಅವರ ಒಂದು ನೋಟ ಈಗಾಗಲೇ ಅನಾವರಣಗೊಂಡಿದ್ದು, ಪ್ರೇಕ್ಷಕರ ಕುತೂಹಲ ಹೆಚ್ಚಿಸಿದೆ.
- ಭೂಲ್ ಭುಲೈಯಾ 3: 2024ರ ದೀಪಾವಳಿ ಸಂದರ್ಭ ಭೂಲ್ ಭುಲೈಯಾ 3 ಬಿಡುಗಡೆ ಆಗಲಿದೆ. ಕಾರ್ತಿಕ್ ಆರ್ಯನ್ ಚಿತ್ರದಲ್ಲಿದ್ದಾರೆ. ಅಕ್ಷಯ್ ಕುಮಾರ್ ನಟಿಸಿದ್ದಾರಾ ಅನ್ನೋದು ಸಸ್ಪೆನ್ಸ್ ಆಗಿಯೇ ಉಳಿದಿದೆ.
- ಚಾವ: ಛತ್ರಪತಿ ಸಂಭಾಜಿ ಮಹಾರಾಜರ ಜೀವನಾಧಾರಿತ ಕಥೆ ಡಿಸೆಂಬರ್ನಲ್ಲಿ ತೆರೆಕಾಣಲಿದೆ. ವಿಕ್ಕಿ ಕೌಶಲ್ ಪ್ರಮುಖ ಪಾತ್ರದಲ್ಲಿದ್ದಾರೆ.
ಇದನ್ನೂ ಓದಿ: ಚಿತ್ರರಂಗದಲ್ಲಿ 7 ವರ್ಷ ಪೂರೈಸಿದ ರಶ್ಮಿಕಾ ಮಂದಣ್ಣ: 'ಕಿರಿಕ್ ಪಾರ್ಟಿ' ಚೆಲುವೆಯ ಸಿನಿಪಯಣ
ಇದಲ್ಲದೇ 2024ರಲ್ಲಿ ಕಾಂತಾರ ಪ್ರೀಕ್ವೆಲ್, ಎಮರ್ಜೆನ್ಸಿ, ಮೈದಾನ್, ಕಲ್ಕಿ 2898 ಎಡಿ ಅಂತಹ ಸಿನಿಮಾಗಳು ಬಿಡುಗಡೆ ಆಗಲಿದೆ. ಆದ್ರೆ ಈ ಚಿತ್ರಗಳ ಅಂತಿಮ ಅಧಿಕೃತ ಬಿಡುಗಡೆ ದಿನಾಂಕವನ್ನು ಇನ್ನೂ ಘೋಷಿಸಿಲ್ಲ.
