ಕೆಲವು ನಿರ್ದೇಶಕರು ಹಾಗೂ ನಟರು ವಿಭಿನ್ನ ಕಥೆ ಮಾಡಿರುತ್ತಾರೆ. ಆದರೆ ಅಂತಹ ಸಿನಿಮಾವನ್ನು ನಿರ್ಮಾಣ ಮಾಡಲು ಯಾರೂ ಮುಂದೆ ಬರೋಲ್ಲ. ಅಂಥವರಿಗೆ ಕೃಷಿ ಸಚಿವ ಬಿ.ಸಿ.ಪಾಟೀಲ್ ಅಪೂರ್ವ ಅವಕಾಶ ಕೊಟ್ಟಿದ್ದಾರೆ. ಈ ಹಿಂದೆ ಸೃಷ್ಟಿ ಬ್ಯಾನರ್ ಅಡಿಯಲ್ಲಿ ನಿಷ್ಕರ್ಷ, ಕೌರವ, ಶಾಪ ಎಂಬೆಲ್ಲ ಹಿಟ್ ಸಿನಿಮಾಗಳನ್ನು ನಿರ್ಮಿಸಿರುವ ಬಿ.ಸಿ.ಪಾಟೀಲ್, ಮುಂದಿನ ದಿನಗಳಲ್ಲಿ ಕೌರವ ಎಂಬ ಪ್ರೊಡಕ್ಷನ್ ಸಂಸ್ಥೆಯನ್ನು ಹುಟ್ಟು ಹಾಕಿ ವರ್ಷಕ್ಕೆರಡು ಅಥವಾ ಮೂರು ಸಿನಿಮಾಗಳನ್ನು ಈ ಸಂಸ್ಥೆಯಡಿ ನಿರ್ಮಿಸಲು ಮುಂದಾಗಿದ್ದಾರೆ.
ಬಿ.ಸಿ.ಪಾಟೀಲ್ ಅಭಿನಯಿಸುತ್ತಿರುವ ಗರಡಿ ಸಿನಿಮಾ ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯವನ್ನು ಪ್ರಸ್ತಾಪಿಸಿದರು. 'ಹೊಸ ನಿರ್ದೇಶಕರು ಹಾಗೂ ನಟರು ಒಳ್ಳೆಯ ಕಥೆಗಳನ್ನು ಮಾಡಿಕೊಂಡು ಬಂದರೆ ಆ ಕಥೆ ನಮಗೆ ಚೆನ್ನಾಗಿದೆ ಅಂತ ಅನ್ನಿಸಿದರೆ ಸಿನಿಮಾ ನಿರ್ಮಾಣ ಮಾಡಲಾಗುವುದು. ಪ್ರೊಡಕ್ಷನ್ ಕೆಲಸವನ್ನು ನನ್ನ ಮಗಳು ಸೃಷ್ಟಿ ಪಾಟೀಲ್ ನೋಡಿಕೊಳ್ಳಲಿದ್ದಾರೆ. ನಮ್ಮ ಕೌರವ ಪ್ರೊಡಕ್ಷನ್ ಸಂಸ್ಥೆ ಸಾಮಾಜಿಕ ಕಳಕಳಿಯ ಜೊತೆಗೆ ಮನರಂಜನಾತ್ಮಕ ಸಿನಿಮಾಗಳನ್ನು ಮಾಡುವ ಉದ್ದೇಶ ಹೊಂದಿದೆ' ಎಂದರು.
ನಟಿ ಸೃಷ್ಟಿ ಪಾಟೀಲ್ ಮಾತನಾಡಿ, 'ನಾನು ಹುಟ್ಟಿದಾಗಿನಿಂದಲೂ ಸಿನಿಮಾ ನೋಡಿಕೊಂಡು ಬರ್ತಿದ್ದೀನಿ. ನಮ್ಮ ಸಂಸ್ಥೆಯಲ್ಲಿ ಒಳ್ಳೆಯ ಸಿನಿಮಾಗಳು ಬಂದಿವೆ. 1993ರಲ್ಲಿ ನಿಷ್ಕರ್ಷ ಬಂದಿತ್ತು. ನಾನು ಸಿನಿಮಾ ರಂಗದಲ್ಲಿ ಏನೇ ಸಿನಿಮಾ ಮಾಡಿದರೂ ಅದಕ್ಕೆ ನಮ್ಮ ತಂದೆಯವರು ಕಾರಣ. ಯಾಕೆಂದರೆ ಈ ಚಿತ್ರರಂಗದಲ್ಲಿ ನೋಡಿ ಕಲಿಯುವುದು ತುಂಬಾ ಇದೆ. ಅದಕ್ಕೆ ನಮ್ಮ ಅಪ್ಪನೇ ಕಾರಣ' ಎಂದು ಹೇಳಿದರು.
ಇದನ್ನೂ ಓದಿ: ನಿರ್ಮಾಪಕರಿಗೆ ವಂಚಿಸಿದ ಆರೋಪ : 'ಕಮಲಿ' ಧಾರಾವಾಹಿ ನಿರ್ದೇಶಕ ಅರೆಸ್ಟ್
