ನಟ ಟೈಗರ್ ಶ್ರಾಫ್ ಹಾಗೂ ನಟಿ ಕೃತಿ ಸನೋನ್ ಅಭಿನಯದ ಮುಂದಿನ ಸೈನ್ಸ್ ಫಿಕ್ಷನ್ ಆ್ಯಕ್ಷನ್ ಎಪಿಕ್ ಸಿನಿಮಾ 'ಗಣಪತ್'. ಇತ್ತೀಚೆಗಷ್ಟೇ ಟ್ರೇಲರ್ ಬಿಡುಗಡೆಯಾಗಿದ್ದು, ಸಿನಿಪ್ರಿಯರ ಕುತೂಹಲ ಹೆಚ್ಚಿಸಿದೆ. ಸಿನಿಮಾ ವೀಕ್ಷಿಸಲು ಅಭಿಮಾನಿಗಳು ಕಾತರರಾಗಿದ್ದಾರೆ. ಇದೀಗ ಚಿತ್ರದ ಮತ್ತೊಂದು ಹಾಡು ರಿಲೀಸ್ ಆಗಿದೆ.
ಜೈ ಗಣೇಶ..: ಚಿತ್ರತಂಡ ಈಗಾಗಲೇ ಸಿನಿಮಾ ಕುರಿತು ಪ್ರಚಾರ ಪ್ರಾರಂಭಿಸಿದೆ. ಹೆಚ್ಚಿನ ಸಂಖ್ಯೆಯ ಪ್ರೇಕ್ಷಕರನ್ನು ಸೆಳೆಯುವ ಕೆಲಸದಲ್ಲಿ ಬ್ಯುಸಿಯಾಗಿದೆ. ಪ್ರಮುಖ ನಗರಗಳಲ್ಲಿ ನಟ, ನಟಿ ಸೇರಿದಂತೆ ಚಿತ್ರತಂಡ ಭರ್ಜರಿ ಪ್ರಮೋಶನ್ ಕೈಗೊಳ್ಳುತ್ತಿದೆ. ಪ್ರಚಾರದ ಭಾಗವಾಗಿ, ಸಿನಿಮಾದ ಹೊಸ ಟ್ರ್ಯಾಕ್ 'ಜೈ ಗಣೇಶ' ವನ್ನು ಬಿಡುಗಡೆಗೊಳಿಸಿದೆ.
ನಟನ ಕಟ್ಟುಮಸ್ತು ಮೈಕಟ್ಟು: ಅಕ್ಷಯ್ ತ್ರಿಪಾಠಿ ಸಾಹಿತ್ಯಕ್ಕೆ ವಿಶಾಲ್ ಮಿಶ್ರಾ ದನಿ ನೀಡಿದ್ದಾರೆ. ಸಂಗೀತ ಸಂಯೋಜಿಸಿದ್ದು ಕೂಡ ಶಾಲ್ ಮಿಶ್ರಾ ಅವರೇ. ಹೆಚ್ಚಿನ ಸಂಖ್ಯೆಯ ಸಹ ನೃತ್ಯಗಾರರ ನಡುವೆ ಟೈಗರ್ ಶ್ರಾಫ್ ಕುಣಿದು ಕುಪ್ಪಳಿಸಿದ್ದಾರೆ. ನಟನ ಸದೃಢ ಮೈಕಟ್ಟು ಅಭಿಮಾನಿಗಳನ್ನು ಆಕರ್ಷಿಸಿದೆ. ಹಾಡು ಭಕ್ತಿ, ಭವ್ಯತೆ ಮತ್ತು ಶಕ್ತಿಯಿಂದ ಕೂಡಿದೆ. ಸಿನಿಪ್ರಿಯರು ಮೆಚ್ಚುಗೆ ಸೂಚಿಸುತ್ತಿದ್ದಾರೆ.
2023ರಲ್ಲಿ ಹಲವು ಸಿನಿಮಾಗಳು ಬಿಡುಗಡೆಗೊಂಡಿವೆ. ಸಿನಿಪ್ರಿಯರಿಗೆ ಮನರಂಜನೆಯ ರಸದೌತಣ ಉಣಬಡಿಸಿದೆ. ಗಣಪತ್ ಸೇರಿದಂತೆ ಇನ್ನೂ ಹಲವು ಚಿತ್ರಗಳು ಬಿಡುಗಡೆಗೆ ಸಜ್ಜಾಗಿವೆ. ಅಭಿಮಾನಿಗಳು ಬಹಳ ದಿನಗಳಿಂದ ಕುತೂಹಲದಿಂದ ಕಾಯುತ್ತಿರುವ ಪ್ಯಾನ್ ಇಂಡಿಯಾ ಚಿತ್ರ ಈ 'ಗಣಪತ್'. ಟೈಗರ್ ಶ್ರಾಫ್ - ಕೃತಿ ಸನೋನ್ ಅವರ ಸಾಹಸ ಸನ್ನಿವೇಶಗಳಿಂದ ಸಿನಿಮಾ ರೆಡಿ ಆಗಿದೆ. ಕೃತಿ ಸನೋನ್ ಕಂಪ್ಲೀಟ್ ಆ್ಯಕ್ಷನ್ ಲುಕ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಯಂಗ್ ಸ್ಟಾರ್ಸ್ ಜೊತೆ ಅಮಿತಾಭ್ ಬಚ್ಚನ್‍ ಕೂಡ ನಟಿಸಿದ್ದಾರೆ.
ಇದನ್ನೂ ಓದಿ: ದೇಶದ ಮೊದಲ ಫೀಲ್ಡ್‌ ಮಾರ್ಷಲ್ ಸ್ಯಾಮ್ ಮಾಣೆಕ್‌ ಶಾ ಜೀವನಾಧಾರಿತ 'ಸ್ಯಾಮ್ ಬಹದ್ದೂರ್' ಸಿನಿಮಾ ಪೋಸ್ಟರ್ ಬಿಡುಗಡೆ
ಇತ್ತೀಚೆಗೆ ಅನಾವರಣಗೊಂಡ ಟ್ರೇಲರ್ನಲ್ಲಿ ಆ್ಯಕ್ಷನ್ ಸನ್ನಿವೇಶಗಳು ತುಂಬಿದ್ದವು. ಪ್ರೇಕ್ಷಕರನ್ನು ನಮ್ಮ ಸಿನಿಮಾ ಆ್ಯಕ್ಷನ್ ಪ್ರಪಂಚಕ್ಕೆ ಕೊಂಡೊಯ್ಯಲಿದೆ ಎಂದು ಚಿತ್ರತಂಡ ವಿಶ್ವಾಸ ವ್ಯಕ್ತಪಡಿಸಿತ್ತು. ನುರಿತ ಗ್ರಾಫಿಕ್ಸ್ ತಜ್ಞರು ಈ ಚಿತ್ರದಲ್ಲಿ ಕೆಲಸ ಮಾಡಿದ್ದಾರೆ. ಬಾಲಿವುಡ್‍ನ ಖ್ಯಾತ ನಿರ್ಮಾಣ ಸಂಸ್ಥೆ ಪೂಜಾ ಎಂಟರ್ಟೈನ್ಮೆಂಟ್ ಬ್ಯಾನರ್ ಅಡಿ ವಶು ಭಗ್ನಾನಿ, ಜಾಕಿ ಭಗ್ನಾನಿ, ದೀಪಶಿಖಾ ದೇಶ್ ಮುಖ್ ಮತ್ತು ವಿಕಾಸ್‍ ಬಹ್ಲ್ ಜಂಟಿಯಾಗಿ ನಿರ್ಮಾಣ ಮಾಡಿದ್ದಾರೆ. ವಿಕಾಸ್‍ ಬಹ್ಲ್ ಆ್ಯಕ್ಷನ್ ಕಟ್ ಹೇಳಿರುವ ಗಣಪತ್ ಸಿನಿಮಾ ಅಕ್ಟೋಬರ್ 20ಕ್ಕೆ ಹಿಂದಿ, ಕನ್ನಡ, ತಮಿಳು, ತೆಲುಗು, ಮಲಯಾಳಂನಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಲಿದೆ.
ಇದನ್ನೂ ಓದಿ: ಸೌಂದರ್ಯದ ಪ್ರತಿರೂಪ ನಟಿ ತಮನ್ನಾ : ಸ್ಟೈಲಿಶ್ ಸೀರೆಯುಟ್ಟ ಹಾಲ್ಗೆನ್ನೆ ಚೆಲುವೆಯ ಬೆಡಗು ಭಿನ್ನಾಣ
