'ನಾಟು ನಾಟು' ಸಂಗೀತ ಸಂಯೋಜಕ ಎಂಎಂ ಕೀರವಾಣಿ ಕುರಿತ ಆಸಕ್ತಿದಾಯಕ ವಿಚಾರಗಳು ಗೊತ್ತಾ?

ಖ್ಯಾತ ಸಂಗೀತ ಸಂಯೋಜಕ ಎಂಎಂ ಕೀರವಾಣಿ ಅವರ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.

ಖ್ಯಾತ ನಿರ್ದೇಶಕ ಎಸ್​ಎಸ್​ ರಾಜಮೌಳಿ ಅವರ ಆರ್​ಆರ್​ಆರ್​ ಸಿನಿಮಾದ ನಾಟು ನಾಟು ಹಾಡು ಆಸ್ಕರ್​ ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿದೆ. ಅಕಾಡೆಮಿ ಪ್ರಶಸ್ತಿ ಸಮಾರಂಭಕ್ಕೆ ಇನ್ನೇನು ಕೆಲವೇ ಕ್ಷಣಗಳು ಬಾಕಿ ಉಳಿದಿವೆ. ಅತ್ಯುತ್ತಮ ಮೂಲ ಹಾಡು ವಿಭಾಗದಲ್ಲಿ ನಾಟು ನಾಟು ಹಾಡು ಆಸ್ಕರ್​ ಪ್ರಶಸ್ತಿಯನ್ನು ಪಡೆಯುವ ನಿರೀಕ್ಷೆಯಲ್ಲಿ ಇಡೀ ಭಾರತವೇ ಕಾಯುತ್ತಿದೆ. ಈ ಸುಸಂದರ್ಭದಲ್ಲಿ ನಾಟು ನಾಟು ಹಾಡಿನ ಸಂಗೀತ ಸಂಯೋಜಕ ಎಂಎಂ ಕೀರವಾಣಿ ಅವರ ಬಗ್ಗೆ ತಿಳಿದುಕೊಳ್ಳಬೇಕಿದೆ. ಅವರ ಬಗ್ಗೆ ಕೆಲವು ಆಸಕ್ತಿದಾಯಕ ವಿಚಾರಗಳು ಇಲ್ಲಿವೆ.

ತೆಲುಗು ಬ್ಲಾಕ್​ಬಸ್ಟರ್​ ಆರ್​ಆರ್​ಆರ್​ ಸಿನಿಮಾ ಯಶಸ್ಸಿನ ನಂತರ ಎಂಎಂ ಕೀರವಾಣಿ ಯಾರೆಂಬುದು ಎಲ್ಲರಿಗೂ ತಿಳಿದಿದೆ. ಆದರೆ ಅವರಿಂದು ಈ ಖ್ಯಾತಿಯನ್ನು ಪಡೆಯಲು ಸಾಕಷ್ಟು ಪರಿಶ್ರಮಪಟ್ಟಿದ್ದಾರೆ. ಅನೇಕ ಸೋಲುಗಳನ್ನು ಕಂಡಿದ್ದಾರೆ. ಬಳಿಕ ಎಸ್​ಎಸ್​ ರಾಜಮೌಳಿ ಅವರ ಮಗಧೀರ, ಬಾಹುಬಲಿ, ಆರ್​ಆರ್​ಆರ್​​ನಂತಹ ಸೂಪರ್​ಹಿಟ್​ ಸಿನಿಮಾಗಳು ಕೀರವಾಣಿ ಅವರನ್ನು ಭಾರತದಲ್ಲಿ ಹೆಚ್ಚು ಬೇಡಿಕೆಯ ಸಂಗೀತ ನಿರ್ದೇಶಕರಲ್ಲಿ ಒಬ್ಬರನ್ನಾಗಿ ಮಾಡಿವೆ. ಆದರೆ ಅವರಿಂದು ದಕ್ಷಿಣದಾಚೆಗೆ ಪಡೆದಿರುವ ಖ್ಯಾತಿಯನ್ನು ಗಳಿಸಲು ಅವರಿಗೆ ಹಲವು ವರ್ಷಗಳ ಕಠಿಣ ಪರಿಶ್ರಮ ಬೇಕಾಯಿತು.

ಎಂಎಂ ಕೀರವಾಣಿ ಅವರು ಹೆಸರಾಂತ ಸಾಹಿತಿ ಕೊಡೂರಿ ಶಿವ ಶಕ್ತಿ ದತ್ತ ಅವರ ಪುತ್ರನಾದರೂ ಸಹ ಅವರಿಗೆ ಸುಲಭವಾಗಿ ಸಾಹಿತ್ಯ ರಂಗಕ್ಕೆ ಕಾಲಿಡಲು ಸಾಧ್ಯವಾಗಲಿಲ್ಲ. ಅವರೊಬ್ಬ ಸ್ವತಂತ್ರ ಸಂಗೀತ ಸಂಯೋಜಕರಾಗಿ ಕಾಲಿರಿಸುವ ಮುನ್ನ ತೆಲುಗು ಸಂಗೀತ ಸಂಯೋಜಕ ಕೆ ಚಕ್ರವರ್ತಿ ಮತ್ತು ಮಲಯಾಳಂನ ಸಂಗೀತ ಸಂಯೋಜಕ ಸಿ ರಾಜಮಣಿ ಅವರು ಕೀರವಾಣಿಗೆ ಸ್ಫೂರ್ತಿಯಾಗಿದ್ದರು. ಬಳಿಕ ಮನಸು ಮಮತಾ ಸಿನಿಮಾಗೆ ಅವರು ನೀಡಿರುವ ಸಂಗೀತ ಮನ್ನಣೆಯನ್ನು ತಂದುಕೊಟ್ಟಿತು. ಅಲ್ಲಿಯವರೆಗೂ ಕೀರವಾಣಿ ಅವರ ಪ್ರತಿಭೆ ಬೆಳಕಿಗೆ ಬಂದಿರಲಿಲ್ಲ.

ಇದನ್ನೂ ಓದಿ: ಪ್ರತಿಷ್ಠಿತ ಪ್ರಶಸ್ತಿ ಪಡೆಯಲು ಕ್ಷಣಗಣನೆ: ಆಸ್ಕರ್​ ವೇದಿಕೆ ಏರಲಿದ್ದಾರೆ ಭಾರತೀಯರು

ಅದಾಗಿ 20ರ ದಶಕದಲ್ಲಿ ಕೀರವಾಣಿ ಅವರಿಗೊಂದು ಸುವರ್ಣಾವಕಾಶ ಒದಗಿ ಬಂತು. ಆಗಿನ ಸೂಪರ್​​ಹಿಟ್​ ನಿರ್ದೇಶಕರೊಂದಿಗೆ ಕೆಲಸ ಮಾಡುವ ಅವಕಾಶ ಅವರಿಗೆ ಸಿಕ್ಕಿತು. ನಿರ್ದೇಶಕ ರಾಮ್ ಗೋಪಾಲ್​ ವರ್ಮಾ ಅವರ ಶ್ರೀದೇವಿ ಮತ್ತು ವೆಂಕಟೇಶ್​ ಅಭಿನಯದ, ಕ್ಷಣ ಕ್ಷಣಂ ಚಿತ್ರ ಕೀರವಾಣಿ ಅವರಿಗೆ ಖ್ಯಾತಿಯನ್ನು ತಂದುಕೊಟ್ಟಿತು. ರೋಮ್ಯಾಂಟಿಕ್​ ಮೆಲೋಡಿ ಹಾಡು ಜಾಮು ರಾತ್ರಿ ಅವರ ಬದುಕನ್ನೇ ಬದಲಾಯಿಸಿತು. ಕ್ಷಣ ಕ್ಷಣಂ ಬಿಡುಗಡೆಯಾದ ನಂತರ ಕೀರವಾಣಿಗೆ ಅವಕಾಶಗಳ ಕೊರತೆಯೇ ಬರಲಿಲ್ಲ.

ಎಂಎಂ ಕೀರವಾಣಿ ಅವರ ಬಗ್ಗೆ ಇನ್ನೊಂದು ಕುತೂಹಲಕಾರಿ ವಿಷಯವಿದೆ. ಅವರು ಮೂರು ಮಾದರಿಯ ಹಾಡುಗಳಲ್ಲಿ ಛಾಪು ಮೂಡಿಸಿರುವ ಭಾರತದ ಏಕೈಕ ಸಂಗೀತ ನಿರ್ದೇಶಕರಾಗಿದ್ದಾರೆ. ಟಾಲಿವುಡ್​ ಸಿನಿ ರಂಗದಲ್ಲಿ ಅವರನ್ನು ಎಂಎಂ ಕೀರವಾಣಿ ಎಂದು ಕರೆದರೇ, ತಮಿಳು ಚಿತ್ರೋದ್ಯಮ ಅವರನ್ನು ಮರಕತಮಣಿ ಎಂಬ ಹೆಸರಿನಿಂದಲೇ ಕರೆಯುತ್ತದೆ. ಇನ್ನು, ಬಾಲಿವುಡ್​ ರಂಗದಲ್ಲಿ ಕೀರವಾಣಿ ಅವರು ಎಂಎಂ ಕ್ರೀಂ ಎಂದೇ ಹೆಸರುವಾಸಿಯಾಗಿದ್ದಾರೆ.

ಆರ್​ಆರ್​ಆರ್​ ಚಿತ್ರದ ನಾಟು ನಾಟು ಹಾಡಿಗೆ ಗೋಲ್ಡನ್​ ಗ್ಲೋಬ್​ ಗೆಲುವಿನೊಂದಿಗೆ ಕೀರವಾಣಿ ಭಾರತೀಯ ಚಿತ್ರರಂಗವನ್ನು ಜಾಗತಿಕ ಮಟ್ಟದಲ್ಲಿ ಯಶಸ್ವಿಯಾಗಿ ಮೇಲಕ್ಕೆತ್ತಿದ್ದಾರೆ. ಇದೀಗ ಈ ವರ್ಷದ ಆಸ್ಕರ್​ ಪ್ರಶಸ್ತಿಯಲ್ಲಿ ಅವರ ನಾಟು ನಾಟು ಹಾಡು ಸ್ಪರ್ಧಿಸುತ್ತಿದ್ದು, ಇಡೀ ಭಾರತವೇ ಉಸಿರನ್ನು ಬಿಗಿ ಹಿಡಿದು ಗೆಲುವಿನ ಕ್ಷಣಕ್ಕಾಗಿ ಕಾತರದಿಂದ ಕಾಯುತ್ತಿದೆ. ಒಂದು ವೇಳೆ ಆಸ್ಕರ್​ ಪ್ರಶಸ್ತಿಯನ್ನು ನಾಟು ನಾಟು ಮುಡಿಗೇರಿಸಿಕೊಂಡರೆ, ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಅತ್ಯುತ್ತಮ ಮೂಲ ಗೀತೆ ವಿಭಾಗದಲ್ಲಿ ಮೊದಲ ಆಸ್ಕರ್​ ಪಡೆದ ಕೀರ್ತಿಗೆ ಪಾತ್ರವಾಗಲಿದೆ.

ಇದನ್ನೂ ಓದಿ: ಆಸ್ಕರ್‌ಗೆ ಕ್ಷಣಗಣನೆ​​! ನಾಟು ನಾಟು ಹಾಡಿಗೆ ಅಮೆರಿಕನ್ ನರ್ತಕಿಯಿಂದ ಡ್ಯಾನ್ಸ್ ರಿಹಾರ್ಸಲ್‌​