ಸಂಕ್ರಾಂತಿಗೆ ಟಾಲಿವುಡ್ನಲ್ಲಿ ಬಿಡುಗಡೆಯಾಗಲಿರುವ ಸಿನಿಮಾಗಳ ದೊಡ್ಡ ಪಟ್ಟಿಯೇ ಇದೆ. ಈ ಪೈಕಿ 'ಹನುಮಾನ್' ಚಿತ್ರವೂ ಒಂದು. ಈ ಚಿತ್ರತಂಡ ಮಹತ್ವದ ನಿರ್ಧಾರವೊಂದನ್ನು ಕೈಗೊಂಡಿದೆ. ಮಾರಾಟವಾಗುವ ಚಿತ್ರದ ಪ್ರತಿ ಟಿಕೆಟ್‌ನಲ್ಲಿ ಅಯೋಧ್ಯೆ ಶ್ರೀರಾಮ ಮಂದಿರಕ್ಕೆ 5 ರೂಪಾಯಿ ದೇಣಿಗೆ ನೀಡುವ ನಿರ್ಧಾರವನ್ನು ಮೆಗಾಸ್ಟಾರ್ ಚಿರಂಜೀವಿ ಘೋಷಿಸಿದ್ದಾರೆ.
ಭಾನುವಾರ ಸಂಜೆ ಹೈದರಾಬಾದ್‌ನಲ್ಲಿ ನಡೆದ ಸಿನಿಮಾದ ಪೂರ್ವಭಾವಿ ಸಮಾರಂಭದಲ್ಲಿ ಚಿರಂಜೀವಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು. ಈ ಸಂದರ್ಭದಲ್ಲಿ ಮಾತನಾಡಿದ ಅವರು, "ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣ ಇತಿಹಾಸದಲ್ಲಿ ಸ್ಮರಣೀಯ ಕ್ಷಣ. ದೇಗುಲದ ಉದ್ಘಾಟನಾ ಸಮಾರಂಭಕ್ಕೆ ನನಗೆ ಆಹ್ವಾನವಿದೆ. ಜನವರಿ 22ರಂದು ಕುಟುಂಬ ಸದಸ್ಯರೊಂದಿಗೆ ತೆರಳಲಿದ್ದೇನೆ" ಎಂದರು.
'ಹನುಮಂತ್' ಪ್ರೀ ರಿಲೀಸ್ ಸಮಾರಂಭದಲ್ಲಿ ಪಾಲ್ಗೊಂಡಿದ್ದ ಚಿರಂಜೀವಿ ಹಲವು ಕುತೂಹಲಕಾರಿ ಕಾಮೆಂಟ್‌ಗಳನ್ನೂ ಮಾಡಿದ್ದಾರೆ. "ಈ ಪ್ರೀ ರಿಲೀಸ್ ಈವೆಂಟ್‌ಗೆ ಬರಲು ಕೆಲವು ಕಾರಣಗಳಿವೆ. ನನ್ನ ಆರಾಧ್ಯದೈವ ಅಮ್ಮಣ್ಣನ ನಂತರ ಅನುಕ್ಷಣ ಪ್ರಾರ್ಥಿಸುವ ದೇವರು ಆಂಜನೇಯಸ್ವಾಮಿ. ಅವರನ್ನೇ ಪ್ರಧಾನವಾಗಿಟ್ಟುಕೊಂಡು ತಯಾರಾದ ಚಿತ್ರವಿದು. ಟ್ರೇಲರ್ ಮತ್ತು ಟೀಸರ್ ನೋಡಿದಾಗ ಪ್ರತಿ ದೃಶ್ಯದಲ್ಲೂ ನೈಪುಣ್ಯತೆ ನೋಡಿದ್ದೇನೆ. ಈ ಬಗ್ಗೆ ನಿರ್ದೇಶಕರೊಂದಿಗೆ ಮಾತನಾಡಿ ಸಾಕಷ್ಟು ವಿಚಾರ ತಿಳಿದುಕೊಂಡೆ. ಹನುಮಂತನನ್ನು ಶಿಸ್ತು, ಬದ್ಧತೆಯಿಂದ ಪೂಜಿಸಿ ಈ ಮಟ್ಟಕ್ಕೆ ಬೆಳೆದೆ. ಹೀಗೆ ವೇದಿಕೆಯಲ್ಲಿ ನಾನು ಹನುಮಂತನ ಬಗ್ಗೆ ಮಾತನಾಡಲೇಬೇಕು ಅನ್ನಿಸಿತು. ಅದಕ್ಕಾಗಿಯೇ ಈ ಕಾರ್ಯಕ್ರಮಕ್ಕೆ ಬರಬೇಕೆಂದು ಆಹ್ವಾನಿಸಿದಾಗ ಮರುಮಾತಿಲ್ಲದೆ ಒಪ್ಪಿಕೊಂಡೆ" ಎಂದು ಚಿರಂಜೀವಿ ಹೇಳಿದರು.
"ಹನುಮಂತ ಎಲ್ಲರಿಗೂ ಸ್ಪೂರ್ತಿ. ನನ್ನ ತಂದೆ ಕಮ್ಯುನಿಸ್ಟ್. ಇಚ್ಛಿಸಿದಾಗಲೆಲ್ಲ ತಿರುಪತಿಗೆ ಹೋಗುತ್ತಿದ್ದರು. ಅದರಂತೆ ನಾನು ಏಳನೇ ತರಗತಿಯಲ್ಲಿ ಓದುತ್ತಿದ್ದಾಗ ಪೊನ್ನೂರಿನ ಆಂಜನೇಯಸ್ವಾಮಿ ದೇವಸ್ಥಾನಕ್ಕೆ ಹೋಗಿ ಪ್ರಾರ್ಥನೆ ಸಲ್ಲಿಸುತ್ತಿದ್ದೆ" ಎಂದು ನೆನಪಿಸಿಕೊಂಡರು.
"ಒಮ್ಮೆ ಲಾಟರಿಯಲ್ಲಿ ನನಗೆ ಆಂಜನೇಯ ಸ್ವಾಮಿಯ ಫೋಟೋ ಸಿಕ್ಕಿತ್ತು. ಅದನ್ನು ಫ್ರೇಮ್‌ ಹಾಕಿಟ್ಟು ಈಗಲೂ ಪೂಜಿಸುತ್ತಿದ್ದೇನೆ. ಹನುಮಂತನನ್ನು ಪೂಜಿಸುತ್ತಿದ್ದ ನನ್ನ ತಂದೆ ಬಯಸಿದ ಸ್ಥಳಕ್ಕೆ ವರ್ಗಾವಣೆಗೊಂಡರು. ಹೀಗಾಗಿ ಅವರೂ ಸಹ ಆಂಜನೇಯನ ದೊಡ್ಡ ಭಕ್ತರಾಗಿ ಬದಲಾದರು. ಆಂಜನೇಯ ಸ್ವಾಮಿ ನಮ್ಮ ಆತ್ಮದಲ್ಲಿ ನೆಲೆಸಿದ್ದಾನೆ. ಅವನ ಆಶೀರ್ವಾದ ಜೀವನದ ಕೊನೆಯವರೆಗೂ ನಮ್ಮೊಂದಿಗಿರುತ್ತದೆ. ಅವನು ನಿರಂತರವಾಗಿ ನಮ್ಮನ್ನು ಕಾಪಾಡಿ ಮಾರ್ಗದರ್ಶನ ಮಾಡುತ್ತಾನೆ" ಎಂದರು.
"ಇನ್ನು, ಈ ಸಿನಿಮಾ ಖಂಡಿತವಾಗಿಯೂ ಪ್ರೇಕ್ಷಕರಿಗೆ ಇಷ್ಟವಾಗುತ್ತದೆ. ಪ್ರಶಾಂತ್‌ ವರ್ಮಾ ಅವರ ಆಲೋಚನೆಗಳು ಮತ್ತು ನಾಯಕ ತೇಜ ಪರಿಶ್ರಮ ವ್ಯರ್ಥವಾಗದು. ಹನುಮಾನ್ ಚಿತ್ರದ ಬಗ್ಗೆ ಮೊದಲು ಹೇಳಿದ್ದು ಗೆಟಪ್ ಶ್ರೀನು. ಇದು ಪರೀಕ್ಷಾ ಅವಧಿ. ಬ್ಯಾಕ್ ಟು ಬ್ಯಾಕ್ ಸಿನಿಮಾಗಳು ಕೈಸೇರಿದಾಗ ಹೆಚ್ಚು ಚಿತ್ರಮಂದಿರಗಳು ಇಲ್ಲದಿರಬಹುದು. ಇವತ್ತಲ್ಲದಿದ್ದರೆ ನಾಳೆ, ಮೊದಲ ಶೋ ಅಲ್ಲದಿದ್ದರೆ ಎರಡನೇ ಶೋ ನೋಡಿ. ವಿಷಯ ಚೆನ್ನಾಗಿದ್ದರೆ ಪ್ರೇಕ್ಷಕರು ಗುರುತಿಸುತ್ತಾರೆ. ಚಿತ್ರತಂಡ ಎದೆಗುಂದಬಾರದು. ಯಶಸ್ಸು ನಿಮ್ಮದಾಗುತ್ತದೆ. ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣಕ್ಕೆ ನಿಮ್ಮ ಸಹಾಯ ಶ್ಲಾಘನೀಯ" ಎಂದು ಇದೇ ವೇಳೆ ಚಿರಂಜೀವಿ ಹೇಳಿದರು.
ಇದನ್ನೂ ಓದಿ: ಮಹೇಶ್ ಬಾಬು ಅಭಿನಯದ 'ಗುಂಟೂರು ಖಾರಂ' ಸಿನಿಮಾ ಟ್ರೇಲರ್ ಬಿಡುಗಡೆ-ನೋಡಿ
